Ya Mo Oni Nagunde be Kpikpi Aboro?

DUNGU aboro rengbe ka karagapai kuti gu sanahe du kuari re na gu fugo nga, “Oó. Tipagine tigu ka mi naagunde ti ni be kpikpi aboro?” I idi kuti gupai nga, gu boro naima kpi, ní ti ni te. Ono tie, badungu amirioni aboro idi kuti gupai nga, kpikpi aboro naraka araka rogo kura rago ni atoro.

Rogo gu ringara nga Benin du pavuru Afirika ku Dioyo, na rogo kura aringara a, badungu aboro idi kuti gupai nga, kpikpi aboro rengbe arengba ka imo agu agumeyo du kindi tiunga. Aboro naababaga gayó ahe watadu ka rogoda abape tipa ka ngbeka anyaa ka fu ra nimotumo tipa ka zeresa ngbadu agu agumeyo kpiki. Gu kura aboro namanga sangbaatoro, na gupai berãyo yo nga, toro boro naraka tigaha kindi ho boro akpi ni, na si rengbe arengba kaa fura na agu aboro du niungayo. Badungu aboro kinaho kereapai amangi yó nga gu i aberãha ya si aye be atoro kpikpi aboro.

Kumba sa ngbatunga gupai re amangiko nga Agboola, naraka ti ngbanda Benin na Nigeria. Fugoko nga: “Ome sangbaatoro ima kio rogo gaani rago. Si nisino aboro i naazunda kangba na gu berã nga, i nagiriso gu boro re ní ndu kurogo gu ngbii nga ga atoro. Mi anaadungura gu yangara sazundu dedede i anaazunda akangba nani, kini kodihe na kura akpe. Mi anirimisihe kungba gimi bundu yo, ki sima he kuari gbe ti rimo gu nyaa mi aida ka no ru. Badungu aboro namanga ngbatunga gipai re, na si wa si nakusa weneapai akusa. Ono tie, kura asino sangbaatoro kinaho naba kina gunde ti boro.

“Ho awire akpiki ni ue ngba iiriwo gene, mi aberẽ gupai nga, boro du nano yó na mangu. Mi andu fuo kura gbinza kumba sa tipa ko wisigi pakpio agu awire re. Ko ayawee kina rengo du nga, boro du nano yó na mangu. Gupai nagberẽ berewe nga, ko ayawee agu awire re sungu awere rogo ngbii atoro tipa kadu ni akanga fu gu boro naimi yó re ho ní nika kpi ni. Gu gbinza kumba re ayawee biata wire napido kina gu bangisapai namangi aunvuruako re. Fuo bete arame ngbutuko, gu gude re aima kpi nirengo.”

Fuo gure, Agboola agbia John, nga boro sa dagba aDezire Yekova naraka Nigeria yo. John asakipai fuko tipa gupai du tipa kpikpi aboro a wa Ziazia Kekeapai agumbaha. Gu sakarogopai re asa Agboola ko mbu merafuo sangbaatoro. Si rengbe arengba ka sa roni a oni mbu merafuo sangbaatoro.

Ya Mo Kpikpi Aboro Nikina Unga Yó?

Da rẽ gbe ka karagapai sa gi sanahe re? Boro ho rengbe ka karagapai sa gu sanahe re te, ka rimo ní vura kaa wo kina wai vurũ. Ono kina Yekova sa, nga gu boro nakusi unga ahe “ngbangbaturũ yo na auru kpotosende, gu i abi na gu i abi nga ya.” (AKorosaio 1:16) Ko akusi amaraika i naaraka rogo ngbii atoro na ki kusi aboro i naaraka auru kpotosende gbiati anyaa. (Atambuahe 104:4, 23, 24) Unga ahe rogo arago dunduko naraka mbiko kinako. (Yugoti 4:11) Ani bingo gupai tie Ziazia Kekeapai nga Fugoko agumbaha tipa guhe nga kpio.

Yekova nangia gu bambata boro nafura tipa kpio. Ko aya fu Adamu na Eva wee ka i basa sangbako, i akpi akpi. (Bambata Pai 2:17) Rogo gu fugo yo re nga gine? Yekova ayaa: ‘Mo akaraga tiro ku sende yo bambiko mi adi ro kina rogo ho.’ (Bambata Pai 3:19) Ho boro akpi ni, kpotoni nazirõ ki sa tihe nisende. Gure wa ka i yawee unga nakaragatihe ti gu regbo re fu Mbori nga gu boro unga aenge tiní. (Batungusipai 12:7) Atambuahe 104:29, 30 nayaa: “Ho mo nirogo ongara ni, ami ki kpiki ki karaga tira ku rogo nvutu sende.”

Adamu na Eva ataino aino kini basasangba Mbori na Mbori ki saringbanga yó sa kpio. Ono tie, i nangia gu bambata aboro nakpiki te. Wiriyo nangia Ebere nakpi mbata fuyó. Unvuruako nangia Kaina naimiko. (Bambata Pai 4:8) Kaina aagundenga ki yawee gu tameko ko aimiko re, ko nika irobape kutiko te, mbiko ko aadunga ti ni te. Ono Kaina agunde be gupai unga aboro arengbe ka mangako nani.—Bambata Pai 4:10-16.

Fuo badungu agarã kusa, rago agberẽ ti Bakindo Erode ho ko agi gupai ni ngba airatatamana nga, i batika “Bakindo aYudo” nangia Yesu rogo gako ngbii. Erode agbata gu gene ka ko imi Yesu ngbaha, sidu, ko adiberã i imi agu akumbagude dunduko garãyo atona ti ue ka ye kusende. Ono tie, maraika arugu Yosefa ko di fogo Yesu na Maria “ki oro ku Ezipeta yo.”—Matayo 2:1-14.

Ho Erode akpi ni, maraika aya fu Yosefa wee ko karagatiko ku Yisaraere yo, ‘mbiko agu aboro naʹasadi ka imo tooni gude, i aima kpiko.’ (Matayo 2:19, 20) Gu maraika nangia kina toro re aima ino gupai nga, Erode aarengbanga ka manga Yesu gbegberẽe berewe te, bambiko ko aima kpi. Yosefa aagundenga a be Erode naima kpi te. Ono tie, Yosefa agunde kina be gu gbegberẽ wiri Erode nangia Arukerao, nangia gu boro nadu tiunga. Si du Yosefa asungu ti ni na gako aborokporo kina Gariraya yo, nga gu rago naadunga rogo ga Arukerao ngbii ya.—Matayo 2:22.

Gi pangbanga re naundo rani ani ini gupai nga, kpikpi aboro na ome tiyó ka mangapai te. Ono ginipai tie namangi tipa awiri Agboola, na ninaamanga tipa kura aboro a?

“Adaimona”

Ho Yesu adani nikumba, ko agbiatiko na adaimona, nga gbigbita atoro. Agu adaimona re aima ino Yesu, si du i ayambuko ti ni nga “Wiri Mbori.” Yesu aima inoyo a. I aangianga atoro kpikpi aboro te. Ono tie, Yesu aya tipa yó wee i nga “adaimona,” watadu gbigbita atoro.—Matayo 8:29-31; 10:8; Marako 5:8.

Ziazia Kekeapai nagumbapa wene atoro nga aguyo du niruruyo fu Mbori, gbiati aguyo nasamungu kutiko. Bambata Pai nayawee ho Yekova ado Adamu na Eva ni kusayo ati Edene yo, ko amoi akeruba, watadu amaraika ku uroyo i niibanda gu ati re boro andu ka rimo koyo. (Bambata Pai 3:24) Si nawira gupai nga, gure nangia bambata regbo tipa aboro bi atoro.

Fuo bete agarã kusa, dungu amaraika azoro ku auru kpotosende ki sa tiyó ni aboro. Anga Yekova du nakedi yó ku sende no tipa i ye ka mangapai te. Ono kina yó nitiyo ‘naakanga kuti gayó bambata rago’ ngbangbaturũ yo ya. (Yuda 6) I aye tipa gupai nangba ti kina yó. I arogodi adee ki vuvungu agude nangia diangbadiangba aboro. Gi diangbadiangba aboro re gbiati abayo ahisi kpotosende na zuũ gbiati gu kura gbegberẽ mangaapai. (Bambata Pai 6:1-5) Yekova asaringbanga yó niye ko na Ime Akangbii ti rago Noa. Gu Ime Akangbii re agbarasi gbegberẽ aboro naabayo dunduko kodihe na gu diangbadiangba aboro re. Ginipai tigaha namangi tipa agu amaraika re?

Gu Ime Akangbii re asa yó ngbaome i karaga tiyó kurogo ngbii atoro yo, yo i ayeni. Ono tie, Yekova aambunga yó i karagatiyo kurogo “gayo bambata rago” nadu ngbangbaturũ yo dagba ruru amaraika te. (Yuda 6) Ziazia Kekeapai naya furani wee: “Mbori ahe nga ha fu yo te, ono ko aba yo ku rogo bambusa yo, ki fu yo ku rogo azogbo bitimo ka banda yo sa rago sapangbanga.”—2 Petero 2:4.

Anga gu bambusa re nga ndikidi ba te; ono si nga gu dingisoro du yó rogoho du wakina ga bambukiso, yo i amanganga sunge ni nga ga ngbangbaturũ ya. Amaraika arengbanga ka sa tiyó ni aboro berewe te, ono wa vura duhe wo, i kindi na bakere ome tiyó ka aria berã aboro na ka aria ga aboro raka. I rengbe arengba ka rimo kurogo aboro yo na kurogo anyaa yo. (Matayo 12:43-45; Ruka 8:27-33) Agi adaimona re nananga aboro a i niberẽ gupai nga, adaimona nga atoro agu atitayo nakpiki. Tipagine i amanga gipai re ti ni? I namanga gipai re bambiko i naida ka sa aboro ka i nairisongo Yekova ngba gu gene ko aidaha ya, na tipa ka vundo riyo yo nibipa gupai nzunzu du tipa kpikpi aboro.

Oni Mbu Gunde be Kpikpi Aboro

Agboola abi gupai nga, ru gupai aru Ziazia Kekeapai agumbaha tipa kpio na tipa agu aboro naraka rogo ngbii atoro. Ko abi gupai nga, si naida ko wiriki dungu apai berewe. Ko atona ka geda Ziazia Kekeapai gbiati agu awaraga du mburuhe rii Ziazia Kekeapai. John nanaaundo ko nani. Agboola agbia wasa wa ko aini gupai nga, awiriko aara ara muro yo, angianga i adu rogo ngbii atoro naasungudo gu regbo i nikadu ni akanga ya.—Yoane 11:11-13.

Agboola arugutiko a na gupai nga, si naida ko mbu agu apai nga ga sangbaatoro naabaha dunduko. Ko azokodi agu aũsangbaatoro dunduko nadu beko. (Amokedi 19:19) Gu kura aboro aya fuko wee, atoro nika mangako amanga gbegberẽe mbiko gupai ko amangihe re. Ono Agboola aagundenga mbiko gupai i agumbaha re te. Ko andu kina kuti gupai du rogo AEfeso 6:11, 12 nayaa: “Oni úkadi ga Mbori ũvura dunduko. . . . Bambiko gaani kenahe sa . . . rimbasa agu atoro nga ga gbegberẽpai yo.” Agi aũvura nga ga toro re nakoda rengo, rurupai, gu wene pangbanga nga ga zereda, idapase, gbiati gu basape nga ga toro, nga Fugo Mbori. Agi aũvura re aenge yo du Mbori ni, na si na bakere ome ti ni!

Gu kura abakurea Agboola gbiati agumeko atona ka soga ko mbiko gipai ko amangihe re nga ka mbu agu apai nga ga sangbaatoro. Ono tie, ko aima gbia vovo abakure nangia aDezire Yekova, nga agu aboro idi kuti agu apai Ziazia Kekeapai agumbaha.

Agboola ini gupai awere nga, regbo ima mbeda tipa Yekova di gbegberẽ apai kusayo auru kpotosende na ki kisi adaimona ku bambukiso yo ka i arengbanga ka manga aboro na pai ya. Niyangaraha, ko nika gbarasa yó kusayo nyeanye kindi. (Yugoti 20:1, 2, 10) Mbori nika zingisa agu aboro “dunduko du rogo amurã yo.” (Yoane 5:28, 29) Bete agu aboro i nika zingisa yó re nga Ebere, agu agude Bakindo Erode aimi yó, gbiati gu kura badungu aboro. Agboola na gu idapase nga, agu awiriko biata nakpiki re, i nika zinga azinga bekpio. Isoke gu gaoni aboro kpiki, i nika zinga azinga a. Agu aboro nika zingabekpio re, i nika pe gupai ape nga, ho i adu ni nikpikpi yó, i aainongo wiripai te, zavura agu apumbo agumeyo amangihe ti regbo kpioyo vurũ.

Ndupai ho si aida ti ni oni naagunde be kpikpi aboro te. Ono si naida oni naamaabangironi tipa ka bi gu gaoni aboro berewe nakpiki. Ono wa du rago re, tipagine ka oni awisigongo Ziazia Kekeapai ti ni tipa si nyakasi gaoni idapase ya? Oni naakoda tironi na agu aboro idi kuti agu apai Ziazia Kekeapai ayugoho. Ka si du nga oni namanga sangbaatoro, si naida oni mbuhe nibasa. Oni bandatironi be adaimona niukadi oni tironi na “ga Mbori ũvura dunduko.” (AEfeso 6:11) ADezire Yekova nikadu na ngbarago ka undo roni. I naawisigo Ziazia Kekeapai na aboro nimangayó sunge na gu buku nga What Does the Bible Really Teach?a zanga sana agu aboro re i fu marã fuyó.

Agboola agundenga berewe be kpikpi aboro te, na ko ima wirikapai tipa wai rengbeko ka sovura kuti adaimona. Fugoko nga: “Mi ainongo gu boro naimi awire biata te. Ono tona ti gu regbo mi atona ka iriso Yekova kada ku awere, mi vungu agude saba. Boro ho rogo ngbii atoro mangi wire gbegberẽe te.”

[Gu rukutu kekeapai du bandu kpewaraga yo]

[Gu kpiahe du ti kpewaraga 27]

Kaina aagundenga ki yawee gu tameko ko aimiko re, ko nika irobape kutiko te

[Gu kpiahe du ti kpewaraga 28]

Agboola agundenga berewe be kpikpi aboro te, na ko ima wirikapai tipa wai ka sovura kuti adaimona