Tipagine Aboro Aya ti ni Wee Mbori Nga Gbegberẽ Sino Boro?

YA MO kina gunde zi ro be gu sanahe du ti kpoto gi magazini re? Ii, wo kura aboro aberãha, ono dungu aboro areme nawakana ha awakana riyo yo singia Mbori nga gbegberẽ sino boro watadu i du nabiko wo. Tipagine?

Gu kura aboro nabati be agberango nasanahe nga: “Tipagine Mbori nambugene ti ni fu agi apai re si nimangi? Ko aberãnga pa aboro te? Watadu gbegberẽ sino boro nga ko?”

Aguyo nifudifudiyo ho i ageda Ziazia Kekeapai ni. Ho i adani ti agu apangbanga duwa ga Noa na Ime Akangbii, i nasanahe nga: ‘Kangia Mbori nga boro nyemuse, tipagine ko aimi agi aboro re ti ni dunduko? Ya mo gbegberẽ sino boro nga ko te?’

Ya mo mo naasana tiro na asanahe wa gure ti kura aregbo? Ya mo si nidu foro nikpakarapai ka karagapai fu agu aboro nabakabangiriyo singia Mbori nga gbegberẽ sino boro? Kangia pai dagbaha yo aima manga ro, mo bingo gu sanahe du kia rengbe ka undo ro.

TIPAGINE ANI ASOGA GBEGBERẼ SINO TI NI?

Ka pepai niguruhe, ani nasoga gbegberẽ sino mbiko ani ima ino rurupai na irairaha. Si nga ndu gupai du ani ti ni kia ti anyaa. Bakusirani akusi rani rogo “kpiako” yo. (Bambata Pai 1:27) Rogoyo nga gine? Ko akusi rani nga ani rengbe arengba ka yugo asinoko, na gu gako arugute du tipa ruru mangapai, gbiati rurupai na irairaha. Ani makianga gipai re: Kangia ani adi gu sino nga ga ino rurupai na irairaha ti Mbori, nga gu nasarani ani sogo gbegberẽ sino, ya mo si ayugongo gupai nga ko nasogaha asoga a te?

Ziazia Kekeapai ima ida kuti gipai re mbiko Mbori nakido rani rogoyo niyaa: “Gimi apai ku ari ki susi gaoni apai, na gimi aberã ki susi gaoni aberã.” (Yesaya 55:9) Ka ani asapangbanga Mbori nga gbegberẽ sino boro nga ko, ya mo ani amanganga gupai dukia tigu Ziazia Kekeapai apehe, nga gaani apai du kuari kisusi gako te? Si adu niwenepai ka rugatirani na rengo mbata fu ani pepai wa gure. Anga gu sanahe si aida ani sanaha nga padu Mbori na gbegberẽ sino te, ono tipagine si awira wagu kura gako mangapai nigbegberẽhe? Ani wisigingo guhe “gbegberẽ sino” ayugoho tipa si undo rani.

Ho ani aya ni ti boro gbegberẽ sino boro nga ní, ani nabi gani ndu mangaapai nga si angbanga te. Gbegberẽ sino boro nga gu boro duna ngbarago ka bi kura aboro i nirungo, watadu aberãnga pa gayo arungo ya. Gu bagude nafu rugute fu wirini mbiko ní na ngbarago ka bi wai rago agbera ti ru, ní nga gbegberẽ sino boro. Ono gu ní nafu rugute fu wirini tipa ka ruga ru watadu ka banda ru ní nga wene sino boro. Kura aregbo kinaho ani asarangbanga aboro zanga ani rugutirani na ndu gayo mangapai, isoke pai aima manga ro wo.

Ani wisigingo gu nduapai ue nasa aboro i yaa Mbori nga gbegberẽ sino boro, agu agberango ani abihe areme gbiati agu apangbanga du tipa wai Mbori aafu mbusa fu aboro rogo Ziazia Kekeapai. Ya mo si nayugo gupai nzunzu nga Mbori nga gbegberẽ sino boro?