Ya mo Mo Rengbe ka Kido Kuti Mbori?

MO BERẼNGA gupai nga mo na bakureamo ti ni mo akpinyemuni gbe, ono ní mangi gupai mo aruganga tiro nani ya. Kura aboro nabisirapa ní na kini ya gani andu mangapai angbanga te, na gbegberẽ sino boro nga ní. Ya mo mo idihe kungba yó niipo, watadu mo pidi bakureamo ka giaha kina ngbani? Kangia ní ho tipa ka saka gupai mangi foro te, ya mo mo dunga na hipai zanga sarangbanga ní te?

Mbata fu mo karagapai, mo idi aida ka ino dungu apai. Mo ima rengba ka sana tiro nga: ‘Ya mo mi ini gu bakureami re wenengai, na gini nduapai du bere tipa ka kpinyemuni?’ Gure ka ngba gbe. Mo berẽnga gipai re: Anga kina gu bangisapai re si aida ani mangisunge nani ka ino singia Mbori nga gbegberẽ sino boro te?

Si ima rengba kadu foro nimbumbupai tipa mo girogo bete agu apai Mbori amangihe, watadu kina ngbaro rengbe ka zera be agu apai ko nambugene fuhe. Dungu aboro rengbe ka ya foro wee Mbori nga gbegberẽ sino boro na rengbe ka sa ro mo bihe nga ndu mangapai angbanga te. Ya mo mo rengbe ka sapangbanga ko mbata fu mo rugutiro na gu kura apai? Gamo karagapai sa gi sanahe re nabipa wai ini mo Mbori wenengai. Mo sananga tiro nga, ‘Gini wene apai Mbori amangingo ho fere?’

Kangia raka nidu foro nikpakarakpakaraha, mo ima rengba ka ya Mbori amanganga wenepai foro te. Ono mo berẽnga tooni. Ya mo Mbori du ninaasa gbegberẽ apai si nimangi ro, watadu weneapai? A wa ani abihe, Satana nga “gbia gi zegino re” angianga Yekova ya. (Yoane 12:31) Satana du du kugii gu gbegberẽ apai na gu iraira apai namanga rogo zegino. Ya mo mo aidanga kuti gupai nga gaani zangarengba gbiati gu dungu apai du tipa rani naye na akpakarapai furani te?

Ono ginipai rengbe ani ka yaa Mbori du ninaasa ha si nimangi? Mo bingo gupai Ziazia Kekeapai apehe nga: Mbori “nafu ngbangbaturũ na kpotosende”; na gako asunge nakoda kpotorani nga gu ko ambakadihe ngba “iiriwo” gene; na ko nga ‘gu Mbori du ungarani beko.’ (Atambuahe 124:8; 139:14; Daniere 5:23) Agi apai re dunduko nayugo gine?

Si nayugo gupai nga Bakusirani nasa gupai nga ani ongo na kidu niunga rani. (Amokedi 17:28) Si nayugo gupai nga, gu ungarani, gu wene arago du pati rani, gu ngbarago ani agbiaha ti nyemuse gbiati abakure, hiahe, zadahe, worohe, na fuohe, agi ahe re dunduko nga gamahe be Mbori. (Yakoba 1:17) Ya mo mo aidanga kuti gupai nga agi ahe re nasako nigu wene bakure si aida ani biko na kikiipa ko na kini kido kutiko te?

Nirengo, mo rengbe ka bihe nga si ima kpakara foro mo kido kuti Mbori. Isoke, mo nabihe nga mo ata inongo ko wenengai tipa ka kido kutiko te. Kina rengo du. Rogo gi guru kekeapai re, gene berani tipa ka fura tipa gu nduapai dunduko aboro aya ti ni Mbori nga gbegberẽ sino boro te. Ya mo anga wenepai ngaha tipa mo ini Mbori wenengai te?a Ani naa kido nga ka mo mangihe wo, mo nika ino rengo tipa ko. Ya mo gbegberẽ sino boro nga ko? Oó, “Mbori nga nyemuse.”—1 Yoane 4:8.