Agu Asanahe Ziazia Kekepai Akaragapai Kutini
Ya mo Mbori rengbe ka mbupai furani ti gaani aingapai?
Si akpakaranga tipa ani mangi gupai rengbe ka sa Mbori ko idi na ani te
Ringbisihe kuti Ziazia Kekeapai, aboro dunduko nga aboro ingapai. Ani adi gi sino nga ga ingapai re ti gu kumba nangia Adama. Sidu, kura aregbo kinaho ani amanga gbegberẽ apai na kini ru kusa ka bira tirani tipa gupai mangi ani he. Wiri Mbori nga Yesu Kristo atumo tipa gaani aingapai nikpiko tipa rani. Gako motumo tumorii nazaki gene tipa Mbori nimbupai furani ti gaani aingapai. Gere nga gamahe be Mbori.—Oni gedi ARomo 3:23, 24.
Gu kura aboro amangi kere ingapai na kini bakibangiriyo singia Mbori rengbe ka mbupai fuyo. Ono si nipa ngbarago nga Fugo Mbori nayaa: ‘Kure Yesu nga Wiriko nagirisa rani ti ingapai dũ.’ (1 Yoane 1:7) Yekova na nyemu ka mbupai a ti kere ingapai ka si du nga ani na wene berã gbiati wene bipai tipa saberã.—Oni gedi Yesaya 1:18.
Ginipai si aida ani mangihe tipa i mbupai furani ti gaani aingapai?
Ani naida Yekova Mbori mbupai furani, si naida ani wirikipai tipa ko, ka rugatirani na gako agene mangapai, arugute, na agu apai ko akpinyemuhe. (Yoane 17:3) Yekova nambupai na kpotokoyo dunduko fu agu aboro nasaberã tigayo gbegberẽ mangapai na kini asadi ka mbuhe.—Oni gedi Amokedi 3:19.
Si akpakaranga tipa ani mangi gupai rengbe ka sa Mbori ko idi na ani te. Ko ima ino gaani arungbura. Ko na inapai na kidu na weneringise. Ya mo gi gako weneringise re asanga ro tipa mo idi ka wirika dungu apai tipa gupai rengbe ka fu ngbarago fuko te?—Oni gedi Atambuahe 103:13, 14.