GAANI KURU APANGBANGA

“Ani Adu Zaaza Kidu na Bakere Nyemuse Ngbadurani Yo Kisusi gu Naadu Mbata”

RAGO aima tona ka faa rogo gu Rago Bisue re wiso rogo Mbirinvuo 1922 wa aboro nga 8,000 adunguratiyo ku ba bakere dunguratise yo. Basungu-rii-kiti atingidi gupai nga ti regbo gi nyanyakipa paparaha re, gu boro naida ka kura, ni ima rengba ka kura, ono ka ni rimingo berewe ku ba bakere dunguratise yo te.

I abi abia ti regbo tonatona “Kpara fu Mbori,” ti fuani, Joseph F. Rutherford ki ndu kurii tambara yo. Badungu agu aboro naadu pati bakere dunguratise asungu kini ngere tipa gupai naaye kumbatayo. Bete kura aboro aata ata kindi rogo faa rago. Bagumbapai angarasi yo i susungu ki degetuyo. Wa gumbapai atona, ya mo boro ho naini pa gu bakere kpe roko i akaihe ni gigirihe ki asihe ariyo mbatayo?

Wiriba Rutherford aamanga gu gumbapai riihe adu nga “Gu Kindo nga ga ngbangbaturũ ima mbeda.” Tipa bagizo regbo naima mbeda kuti saa sa na beberehe, fugoko aapaa kuari na ome rogoho wa ko aasakapai tipa wai agu anebi naadu mbata atakipande pa gu Kindo naye kumbatayo. Ho ko aambeda ni ka digiso gako gumbapai, ko asanahe nga, “Ya mo oni idi kuti gupai nga Bakindo nga ga taarimo ko ima tona gako zogarago?” Agu aboro naadu pati bakere dunguratise akaragapai na fugoyo kuari ki ya: “Ii!”

Wiriba Rutherford apoi kuari ki ya, “Sidu, oni ga tie gu gene tungusapai yo, oni nga awiri gu Mbori nga Bahe Kisusi!” “Oni bi Bakindo wa ko azogarago! Oni nga gako abandusunge. Sidu tie, oni takipande, oni takipande, oni takipande.”

Ti gu regbo re, gu kpe roko naadu ni kaikaihe ariyo azaki na kekeapai ti ni nga: “Oni takipande Bakindo na Kindo.”

Ray Bopp naadu ti gu regbo re ape gupai nga, “Agu aboro naadu pati gu bakere dunguratise re angbiko na ngbarago.” Anna Gardner asakipa wai “angua bambu aawo be woro tata bee.” Fred Twaros ape gupai nga, “Aboro dunduko aguari kuari wa sa.” Evangelos Scouffas aya, “Si adu wa ka i ya bakere ome du naatumba rani kuari rii gaani akiti, na ani aru kuari abangirani ki hiki be aume.”

Dungu agu aboro naadu pati bakere dunguratise aima digo nitungusi gu wene pangbanga nga ga Kindo. Ono wa si avura duwo, i aima ye kadu awere na vovo berãpa sunge. Ethel Bennecoff ape gupai nga agu aBawiriki Ziazia Kekeapai re “adu zaaza kidu na bakere nyemuse [ngbaduyo] yo kisusi gu naadu mbata.” Ho Odessa Tuck, nga guri garãri adu ti gu regbo re nga 18 aguari ni tifuo bakere dunguratise, ri aima diaberã ka karagapai kuti gu yambahe nga “Da nikandu tipa rani?” Ri aya: “Mi aainongo ka ndu kuari, wai ka ndu, na ka ndu tipagine te. Gupai sa mi ainihe nga mi aaida kadu wa Yesaya, nga guko naaya: ‘Mi du re! Mo kédi re!’ ” (Yes. 6:⁠8) Ralph Leffler aya, “Gu bakerepa uru re angia ndikidi tonatona gu tua nga ga takapande pa Kindo nga gu gbandaka areme rogo zegino dunduko.”

Si airiwonga te nga gu bakere dunguratise naamangi rogo 1922 Cedar Point, Ohio yo re, aima du ni gu bakere dunguratise namangi nyanyakipa ariapai rogo gu pangbanga yo nga ga gaani riigbu! George Gangas ape gupai nga, “Gu bakere dunguratise re arimisi gu nyemupai ku rogo re yo nga ka mi akpanga bakere dunguratise ya.” Na nirengo, awa ko arengbe ka tingidaha, ko aakpanga bakere dunguratise berewe te. Julia Wilcox akepai ki ya: “Ka mi sakingo pa gu bakere ngbarago du mi na ni ho mi ageda pa gu bakere dunguratise ni naadu Cedar Point yo rogo 1922 rogo gaani awaraga te. Mi naaida ka ya ti aregbo dunduko wẽ, ‘Tambuahe foro, Yekova, tipa ka idaha fere mi du pati ni.’ ”

Si nawira wa, badungu rani areme natingidapa bawene adunguratise nga gu naafu bakere ngbarago ku kpotorani yo na ki sarani ani du zaaza, kidu na nyemuse tipa gaani bakerepa Mbori gbiati gako Bakindo. Wa ani aberãkuriipa agu adunguratise re, si nafõngbadurani yo a ani ya, “Tambuahe foro, Yekova, tipa ka idaha fere mi du pati ni.”

Agu Aboro I Aabingo Yo ya Agbia Karagapai Kuti Gayo Kparakpee

Arthur na Nellie Claus aima da ti regbo tipa ka gbia wene abasungo ka sungo riihe. Arthur aya, “Mi aadega ture kuti apai dunduko.” Wa ikpirogumba, vuko yo atona kaa igirã. Ko akuru ku zegiyo dindikodindiko, ki ima ino gupai nga ko arimongo berewe ku bambu bakere dunguratise yo te. Boro sa dagba agu aboro naafu ba fu aboro asanako ki ya, “Wai du rengbe mo ka kura ti regbo wa gere?” Arthur aima ino gupai nga si naida ko kuru akura.

Ho Arthur aakaraga tiko ni, ko agi woro tata bee kuari bambu bakere dunguratise yo. Ko atona ka gbata wiri bangiriba zegiyo nga gu rengbe ko ka du rogoho ka gia gupai naamanga ku dimoyo, sidu, ko abi ba nga gu ko arengbe ka bita rogoho kurii bambu yo, nga gu bagbangaha adu wa ametere 5 kuari yo. Fuani, ko abiti kuari yo kini tona kaa ngera ku dimoyo ti bangiri bambu naadu ni zazaha.

Sidu, ho Arthur adu ni ariyo, ko abi dungu awirina i ningana bagumbapai kusende yo wa agu aboro naadu rogo kpakarapai ka i ainongo gupai ka i mangihe ya. I afu gu rugapai fuyo nga i kati agu agire naadu ti kaikai kpe roko kina sa. Ono tipa ka kata agu agire re kina sa, si aida kura sape. Ya mo Arthur adu na sape beko ni tĩtĩhe mongu ko yo? Si adu ni pa ngbarago ka ino gupai nga si adu kina beko. Arthur na kura awirina ambakadi bayo kini pidi gupai nika yugoho fuyo nga i katihe awere. Ho Wiriba Rutherford aya ni wẽ “Oni takipande!” ti ue regbo, i akati agu agire re.

Adezire binibangirise apeke pa wai gu bakiki kpe roko naadu na arangi ti ni biata re azaki wenengai. Sura Yesu adu bebere gu kpe roko re.

Tingbafuoho, agu awirina re ape gupai fu Arthur nga i abiti kurii bambu yo ti songoro, na fuani boro kini di gu songoro re kusayo mbuyo kuari yo. Gene aadunga beyo wa ka i zoro ka gbata undo te, sidu, i kini kpari fu Yekova ko kedi wirina na sape fuyo. Agu awirina re aima ida kuti gupai nirengo nga Yekova aima karagapai kuti gayo kparakpee rogo yangara iiriwo gene.