Waigu Rengbe Mo ka Raka Rogo Vovo Zegino

Gu kekeapai ye mbata fu gere ima yugo gupai nga, barambeda kumbatayo Mbori nika digiso gi gbegberẽ zegino nga ga wiri aboro re na gaha apai dunduko. Ani ima rengba kadu na gu kido nga gipai re nika manga amanga. Tipagine? Bambiko Fugo Mbori nga Baibiri ima fu gu kido re:

“Zegino napaya apaya.”—1 YOANE 2:17.

Ani ima rengba kadu na gu kido nga aboro nika bata abata mbiko gu veresi re ima kidohe:

“Gu ni ka amanga gu pai Mbori akpi nyemu he ni nye anye kindi.”

Sidu tie, tipa ka bata si naida ani mangi gupai Mbori akpinyemuhe. Tipa ka ino gupai Mbori akpinyemuhe, si naida ani iniko mbata.

MO “INI” MBORI TIPA KA BATA TI DIGIDO ZEGINO

Asura: 1. Nangerefuo aboro kaza sungu sande bambungua yo, ome re ima bata na ome apai ima fu ri ri. 2. Ri sungu kaa ongoda ba riahe yo na ri ki bi gu kura gari badiasunge ri ni gedi magazini na ngbarago. 3. Gari badiasunge gedi veresi furi rogo Baibiri na ki fu gu karete nga ga jw.org.

Yesu aya: “nyenye unga nga gere, nga i ini ro nga bangisa ndikidi Mbori.” (Yoane 17:3) Tipa ka bata ti digido gi zegino re na ki raki nyeanye kindi si naida ani ‘ini’ Mbori. Gere ayugongo gupai nga si naida gupai gbua nga ani idi kuti gupai nga Mbori kina ti ni watadu ka ino bete arengo tipa ko te. Si naida ani zi bakure na ko. Ka ani aaida gaani pabakure na kura aboro du nyanyaki, si naida ani di regbo na yo. Kina gu bangisapai re du tipa zio bakure na Mbori a. Ani wisigingo gu bete nyanyakipa arengo nga gu ani awirikaha rogo Baibiri yo nga gu rengbe ka undo rani tipa ani sonosi pabakure na Mbori na ki bandaha.

Agu Arengo Ani Awirikaha Vuru Baibiri Yo

Ani nawirika gupai nga Mbori aaida ani raki rogo paradizo.

Mbori akusi bambata aboro nangia aAdamu na Eva, na ki moi yo rogo bawene rago rimoho angia ati Edene. I angia rengberengbe aboro, na Mbori afu agu ahe fuyo dunduko i aaidaha tipa ka gbia ngbarago ti raka. I arengbe ka raka nyeanye kindi. Ka i anye ni abakure Mbori ka i akpingo te. Ono i adiberã ka basa gu wiri taata rugute Mbori afuhe fuyo.

Ani ini ndu gupai ani arungo ti ni.

Ho gu bambata kumba nangia Adamu abasasangba Mbori ni, ko gbiati gu kura aboro dunduko azanga gu momu nga ga raka nyeanye kindi. Baibiri nasaka gupai nga: “Wa gbegberẽpai akuru ku zegino mbiko boro sa, kpio ki du mbiko gbegberẽpai; si du kpio andu andu ti ni sa aboro dũ.” (ARomo 5:12) Kina wai boro narengbe ka dia kaza ti avunguni, awiri Adamu dunduko adi zangarengba be ko. Ni sangbana gipai re, ani nasona kini gbinza na kini kpiki.

Ani nawirikapai tipa gupai Mbori namangihe tipa ka undo rani.

Baibiri naya: “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.” (Yoane 3:16) Mbori akedi Yesu ku zagino tipa ko ye ka kpi tipa rani. Nibipa gi mangapai nga ga nyemuse re, Prabhakar du garãko nga 86 naraka Indian yo aya: “Si nayugo ga Yekovaa dudunguro nyemuse tipa re. Gi gako nyemuse re ima fu maabangirise fere tipa nyenye unga.”

Ani nawirika wai rengbe ani ka yugo tambuahe tipa gupai Mbori namangihe furani.

Baibiri nape gupai fu rani nga ani rengbe ka yugo gaani tambuahe tipa gupai Mbori amangihe furani ni “ka kuti gako rugute.” (1 Yoane 2:3) Mbiko nyemuse Yekova Mbori nayugo gupai furani si aida ani mangihe tipa ka gbia ngbarago ti raka awere. (Yesaya 48:17, 18) Mbori aidanga ani rungo te. Ko nakidohe nga ka ani aapekafuo gako arugapai, ani araka nga kina awere sa na ngbarago te ono ani nika du na gu momu nga ga raka nyeanye kindi.

MO GEDI FUGO MBORI NAˈAURU DŨ

Gu nangerefuo aboro kaza re nangera ku ngbangbaturũ yo tingbafuo geda ri Baibiri ti regbo gu ongoda nga ga bebere uru zegi. — Mo ima rengba ka bata ti digido gi zegino re ni manga mo kparakpee tipa ga Mbori undo na ni manga mo gupai ko akpinyemuhe

Ani ni naarihe dedede tipa kaa raka. Ono Yesu aya: “Boro anye nga ni ungani mbiko kina riahe te, ono mbiko agu apai dunduko naye ngba Mbori yo.”—Matayo 4:4.

Areme, ani nabi afugo Yekova rogo Baibiri yo. A wa mo nikaa wisigo gi ziazia buku re, mo nika wirika nyanyakipa arengo tipa gupai Mbori amangihe kusayo, gu ko amangaha awere, gbiati gupai ko nika mangaha kumbatayo.

MO KPARI FU MBORI TIPA UNDO

Ginipai rengbe mo ka mangaha ka si du nga mo naida ka giasangba Mbori ono si ki du foro ni ba mbumbuhe tipa ka mbu manga gu kura apai ko aya furani si ni gbegberẽhe? Rogo gi bangiriba re, pa ino mo Mbori wenengai ima rengba ka undo ro.

Oni bingo gu kura pai sa tipa gu kura dee ani ka yamba ri nga Sakura, nga gu ri naaraka wasiwasi raka nga ga kodaba. Ho ri atona wisigo Baibiri ni, ri awirikipai tipa gu ga Mbori rugute nga “oni né pa bari.” (1 AKorindo 6:18) Sakura amangi kparakpee fu Mbori tipa ome na ri ki dibe manga gu gbegberẽpai re. Ono si aida ri naasovura aso kindi kuti gu gbegberẽpai re. Ri aya, “Ho wasiwasi aberã aye ni kurire yo, mi naapeka agu apai du ngbadureyo dunduko fu Yekova rogo kparakpee yo, ki ini gupai nga mi arengbanga ka so gi vura re ni tire te. Gu ome du ti kpara fu Mbori ima sa re mi mbedi na Yekova.” Wakina Sakura, dungu amirioni aboro ima ye ki ini Mbori. Ko nafu gu ome fuyo i aidaha tipa i mangi agu aˈariapai si aidaha rogo gayo raka yo na i raki ngba gu gene nasa ngbarago tiko.—AFiripoio 4:13.

Ka mo ini Mbori wenengai ko nika ye ki ‘ini ro’ a gbe ni wene bakureako. (AGaratio 4:9; Atambuahe 25:14) Na mo nika rẽ ka bata ku rogo ga Mbori vovo zegino. Ono waigu gu vovo zegino re nika du? Gu kekeapai ngbefuo gere nika sakapai tipa gipai re.

a Yekova nga rimo Mbori du ni yuguyuguhe rogo Baibiri yo.