Ya mo Oni Regerege Tipa Kadu “Ni Adikumbo Zegino”?

YA MO MO NGA REGEREGE KA SA KPOTOSENDE NI PARADIZO?

Ho Yekova afu zinahe ni fu aboro tipa i ‘hisi kpotosende na ki zogo ho,’ ko aayugo gupai nga kpotosende dunduko nika da ni paradizo. (Bam. P. 1:28) Si naida agu aboro nika raka nyeanye kindi gisangba gu zinahe re agia. Kpotosende adu nga ni paradizo ti tonatonaha te mbiko ati Edene ho ti ni berewe te. Nibasa tifuo Aramegido, dungu asunge nika du berani ka mangaha tipa ka giriso agu apapara kpotosende i nagbarasihe. Gipai re nikaa ida na bakere sunge!

Gipai re natingida rani na pa gu sunge si aaida aYisaraere mangihe ho i ayego ni Babera yo. Tipa agarã 70, boro ho naraki rogo gayo ringara te. Ono Yesaya aima gumba gupai kumbatayo nga, na ga Yekova undo, i nika duadu na rengba ka sa gayo rago ni bawenehe berewe. Gu sangbanebi re aya: ‘Ko amanga gaha angbakungba wa Edene, na gaha ngbi ngume wa gu ati nga ga Yekova.’ (Yes. 51:3) Yekova aima undo aYisaraere tipa i sa gayo ringara ni bawene ba. Wakina gure a, na ga Yekova maku, agu aboro nika diakumbo zegino nika duadu na rengba ka saha ni bawene paradizo. Na kura apai kinaho rengbe mo ka mangaha awere tipa ka yugo gupai nga mo naida aida ka manga gu sunge re.

Gene sa rengbe mo ka manga gipai re ngbaha nga, nimanga mo gupai rengbe na omero tipa ka banda gamo kporo si du ni gigirihe na bibihe kidu ni wenehe. Mo ima rengba ka manga gipai re ka si vura du vurũ nga gamo amurakporo nigigiri yo te. Mo ima rengba a ka undo na giriso gu Bambu Kindo du mo rogoho na kini bandaha gbiati Bambu Bakere Dunguratise. Ka si du nga agu apai du tipa ro mbu gene foro, mo ima rengba a ka sanahe tipa ka undo na gu sunge nga ga fu undo. Gere nayugo gupai nga, mo na nyemu ka undo awirinamo ka si du nga zingo ho. Mo sananga tiro nga, ‘Ya mo mi rengbe ka wirika kura abirĩ-sunge nga gu rengbe mi ka mangasunge na ni ka si du nga Yekova nika mbu re mi raki nyeanye kindi auru kpotosende?’

YA MO MO NGA REGEREGE KA NGERAFUO AGU ABORO I NIKA ZINGISAYO BE KPIO?

Nibasa tifuo Yesu zingisi wiri Yairo be kpio, ko agumba gupai nga si naida i fuhe furi ri rihe. (Mk. 5:42, 43) Si aarengbanga kadu ni nyanyaki sunge tipa ka ngerafuo gu tooni degude garãri adu nga 12 re te. Ono oni berẽnga pa bakio gu sunge ani nika mangaha ho Yesu nika digiso gu gako kidohe ni nga, “ho agu yo ka gia fugoko ni dunduko du rogo amurã yo, ki kuru.” (Yo. 5:28, 29) Wa vura duhe nga Ziazia Kekeapai apenga dungu futufutuapai te, ani ima rengba ka berã gupai nga, agu aboro i nika zingisayo be kpio nikaa ida aida na undo tipa ka gbia riahe, ba tipa ka raka rogoho, gbiati aroko. Zavura awere, mo ima rengba ka yugoho nga mo naida aida ka kadu regerege ka undo. Bete apai du re nga gu rengbe mo ka mangaha.

Ho i nimangi tingidapai ni nga babi adungurati naye ka bi gu dungurati du mo rogoho, ya mo mo naafu tiro tipa ka yamba ko ku kpuro yo tipa riahe? Ho i akusa agu aboro ni Betere yo ninaamanga sunge Kindo ti aregbo dũ na ki kedi yo ku rogo gamo dungurati, watadu ho babi adungurati adigiso gako sunge ni tingba sunge ta kaa biko adungurati, ya mo mo rengbe ka fu tiro ka undo yo i gbia gu ba ka i aaraka rogoho? Ka si du nga i nika manga bakere dunguratise watadu kparakpara bakere dunguratise rogo gamo dagbarago, ya mo mo rengbe ka fu tiro tipa ka mangasunge mbata fu bakere dunguratise watadu tifuo bakere dunguratise watadu kadu ho kaa dia agu boro kugume naye tipa bakere dunguratise?

YA MO MO NGA REGEREGE KA YUGOPAI FU AGU ABORO I NIKA ZINGISA YO BE KPIO?

Mbiko gupai ani agedaha rogo Amokedi 24:15, ani namaabangirani nga, i nika zingisa abirioni aboro be kpio. Badungu yo nika ngia agu aboro naainongo Yekova mbata fu i kpiki ya. Ono i nika du na gu momu nga ga wirikapai tipa Yekova tifuo i zingisi yo be kpio.a Gu ga Yekova amoyambu du ni ruruyo du na bakere inohe nika undo ka yugopai fuyo. (Yes. 11:9) Charlotte, nga guri naima tungusapai Putu yo, South America yo, na Afirika yo nangera kumbatayo tipa gupai re. Ri ape gupai na ngbarago nga: “Mi nangera kumbatayo ka yugopai fu agu aboro i nika zingisa yo be kpio. Ho mi agedapai ni tipa gu boro naaraki bakuru kusayo, mi naaberã gupai dedede nga: ‘Ka gi boro re aini Yekova, ka gani raka adu kia.’ Mi nangera kumbatayo ka pepa Yekova fu agu aboro i nika zingisa yo be kpio na ka pepa wai gayo raka nika du ni bawenehe ka i irisiko.”

Zavura gu ga Yekova ruru amoyambu naraki mbata fu Yesu ye ku auru kpotosende nika duadu na dungu apai tipa ka wirikaha. Oni berẽnga pa bakio wai ani nika du na ngbarago na si ki du ni pa irisa ka saka pa wai fu Daniere gu gako sangbaanebi ko akehe zanga ko giarogo yo adigisitihe. (Dan. 12:8) Watadu ani nika undo aRuta na Naomi tipa i wiriki gupai nga atitayo akodi Masiya. Ani nika gbia ngbarago ti yugopai fu aboro dunduko auru kpotosende, na ani agbianga tirani na asoapai gbiati agu apai nagbeberã boro kusayo du rogo gi gbegberẽ zegino du areme re te!

Ginipai rengbe mo ka mangaha awere tipa gupai nga mo du regerege ka undo agu aboro i nika zingisayo be kpio? Gene sa nga, ni manga ani gupai rengbe na omerani tipa kadu ni wene abayugupai na kini tungusipai dedede. (Mt. 24:14) Ka si vura du vurũ nga mo arengbanga ka tungusapai awere ni bakerehe wa gu mo akpinyemuhe te mbiko garãro watadu kura nduapai, mo ima rengba ka yugo gupai nga mo na bakere nyemu ka yugopai fu agu aboro i nika zingisayo be kpio ni manga mo gupai rengba na omero awere tingba sunge tungusapai.

Si ni wenepai ka berãkurii gi nyanyakipa asanahe re: Ya mo mo nangera nzunzu kumbatayo tipa ka diakumbo zegino? Ya mo mo nangera kumbatayo tipa ka sa kpotosende ni paradizo, ka ngerafuo agu aboro i nika zingisayo be kpio, na ka yugopai fuyo? Mo ima rengba ka yugo gupai nga mo nga regerege ka raka nyeanye kindi auru kpotosende ni manga mo agu asunge du wakina gu napido ro kumbatayo ho mo nika diakumbo ringara ni!