Barac, Débora né Jael

Josué gosanir nisló xcudx Jehová por xidal íz né goitybu dzú ni napbu 110 íz. Israelitas bienyibu Jehová laʼga goyoʼ Josué né layibu. Per órni goitybu, gosaló bienyibu dioxh falz xomodca buñ de gudx Canaán. Jehová biduidy lagary que toib rey ni goyoʼ Canaán ñony mandary buñ israelitas, portín ma diti bisobyibu Jehová. Ór cú gonabyibu Jehová ñacné layibu. Por ngú Jehová golú toib buñ ni góc laa Barac par nasanir nislóyibu. Láabu gocnébu buñ israelitas par ñen Jehová stoib.

Goyoʼ toib buñgonaʼ ni goniʼ profecías ni góc laa Débora. Láabu bixelcaʼbu Barac né goniʼbu ni ná Jehová: «Goyné 10.000 buñ ronoʼ golas xtuny Cisón par guicalólo soldad xtuny Jabín. Cú sonylo gan guirá soldad xtuny Sísara, buñguieeu ni rasanir nisló guirá soldad xtuny Jabín». Barac cuapy: «Siaʼya, per pal rieelo né naʼ». Débora goniʼ: «Siaʼya né looy, per non ganlo que diti looy sagaitylo Sísara. Jehová ma goniʼ que toib buñgonaʼ sagaity láabu».

Débora biaʼpy laidy dainy Tabor toibsi né Barac né guirá soldad par tzoʼyibu puext tíilyibu. Órni Sísara gon láani, órcuca bitopbu guirá xcamionbu ni rinébu ló guerr né guirá soldad xtunybu. Débora gochbu Barac: «Dzureʼ Jehová sacné looy par gonylo gan». Ór cú Barac né guiráca 10.000 soldad xtuny bietjyibu laidy dainycu né godíilyibu né soldad xtuny Sísara.

Después, Jehová buny que golas ni noʼ Cisón naniʼsni né dada bibixni, por ngú xcamión Sísara gogni lainy been. Sísara bietj lainy xcamión né bixony. Barac né soldad xtunybu bunyibu gan guirá soldad xtuny Sísara, per Sísara bixony né bicachlan lainy yoʼ lairy xtuny toib buñgonaʼ ni góc laa Jael. Buñgonaʼ reʼ bigueʼbu lech Sísara né después biguacbu toib lairygueʼel laidy Sísara. Gonásca bacaʼal láabu portín nigolú cadzagbu. Ór cú Jael nalandiguié bibig né bitzaʼisbu toib estak guic Sísara né goitybu.

Más godzu bidxin Barac cayopybu Sísara. Jael bitzalnéz láabu né goniʼbu: «Bioʼ, né guilooya looy buñguieeu ni cayopylo». Barac bioʼ né bibiʼbu Sísara náaxh ma goity. Ór cú Barac né Débora bíilyibu toib canción par bunyxiroʼyibu Jehová, Dios ni gocné layibu bunyibu gan ló guerr. Buñ israelitas bibanyibu goxtiguie por 40 íz.