Gonásyibu Jesús

Jesús né xpiin godudyibu toib láach ni góc laa Cedrón par bidxinyibu dainy de los Olivos. Ma tayoo góc guirá ndeʼ né dzúcu merpa noʼ beʼo goyal. Órni bidxinyibu toib lagary móz ni góc laa Getsemaní, Jesús góoch layibu: «Colcués naʼ reʼ né diti gaisyto». Ór cú, Jesús golsit tidxó né bixixipbu. Nigolú goyoʼ nabambu por ngú goninébu Jehová: «Sagac mod ni nálo». Ór cú Jehová bixel toib ángel par gocné láabu. Después, Jesús bibiguet ro bisiambu tzón xpiimbu né órni bidxinbu xpiimbu natiasy. Jesús góoch layibu: «¡Colcueʼ bacaʼal lóto! Diti ór ni non gaisyto ndeʼ. Ma bidxin ór ni gonycuentyibu naʼ ladxña buñ ni rianladx naʼ».

Ór cú bidxin Judas né xidal buñ ni bitné yac né espad. Gondxichbu pu guidzelbu Jesús portín xidal buelt goyné Jesús láabu cú né stipnés xpiimbu. Judas gochbu guirá sodad ximod naslooybu chú ngú Jesús. Judas goyee ro sagaʼ Jesús né goniʼbu: «Mextra, xitalsa», né biduidybu toib bixit xac Jesús. Jesús góoch láabu: «Judas, ¿né toib bixit ronycuentlo naʼ la?».

Jesús biduidy toib pas nislóyibu né gonabdiitzbu: «¿Chú láabu cayopyto?». Layibu cuapyibu: «Jesús ni nac de Nazaret». Jesús cuapy: «Naʼ ngú Jesús». Layibu bidzuibyibu né biduidyibu toib pas nisraxitz né biabyibu layoo. Jesús gonabdiitz layibu stoib: «¿Chú láabu cayopyto?». Layibu cuapyibu: «Jesús ni nac de Nazaret». Jesús goniʼ: «Ma goodxi lóoto que naʼ ngú Jesús. Por ngú colguiduidy lagary guirá xpiina tzee».

Órni Pedro biduidy cuent ma guinásyibu Jesús, goleʼbu espad né bichocbu guidiag Malco ni góc xomós toib sumo sacerdote. Per Jesús godanbu guidiag Malco né bisialbu láani. Ór cú gochbu Pedro: «Goloʼtzay espad xtunylo. Portín pal radíilo né espad, por espad saitylo». Soldad gonásyibu né bilipyibu Jesús, né xpiimbu bixony. Guirá buñcu goynéyibu Jesús ronoʼ sacerdote Anás. Láabu bunybu xidal galrranabdiitz a Jesús né después bixelbu Jesús lidx sumo sacerdote Caifás. Per ¿xí buny guirá xpiimbu?