Mod rasuidyno buñ non gacni galán
1. ¿Xí non gony toib herman ni rasuidy buñ?
1 Pal Jehová diti nagobiobu buñ ni toib labúu ñony xchiimbu (Juan 6:44). Ná scú nacni, herman ni casuidy a toib buñ, non gonyibu xtem par gacnéyibu buñ guibigax roʼ noʼ Jehová (Sant. 4:8). Par gonyibu ndeʼ, raquiin guisuidyibu xquiichyibu. Pal nosi roʼolyibu párrafos, né ronyibu galrranabdiitz diti tampa sacnéni buñ guieen ni ná la Biblia né diti saniʼsbu lainy congregación.
2. ¿Xí raquiin gonyno par guisuidytzayno buñ?
2 Par labúu guisuidyno buñ non gacnéno layibu gonyibu tzón cós: 1) guientzaaybu ni la Biblia rasuidy, 2) guicacuentbu ni la Biblia rasuidy né 3) guibanybu mod rasuidy la Biblia (Juan 3:16; 17:3; Sant. 2:26). Ndeʼ labúu gacla xidal beʼo par labúu gonybu tzón cós reʼ. Né cós ni cayonybu sacné láabu guidzakbu né gac dedicarbu a Jehová.
3. ¿Xí clas galrranabdiitz raquiin gonyno pal nainy lóono guisuidytzayno buñ, né xigony?
3 ¿Xí rony pensary buñ ni casuidyno? Par labúu guiduidyno cuent pal cayenyibu né racacuentbu ni casuidyno láabu, diti non guiniʼgoluno, xalagary ngú guinabdiitzno láabu ni cayenbu (Sant. 1:19). ¿Cayenbu ni ná la Biblia ni lóono casuidyno láabu la? ¿Labúu rabexabu láani stip láacabu la? ¿Xi ronybu pensary de ni casuidybu? ¿Raluladxbu que ni rasuidy la Biblia labúu gonybu láani la? (1 Tes. 2:13.) ¿Riembu que non guitzaʼbu mod nabanybu la? (Col. 3:10.) Par ganno xí ronybu pensary, raquiin guinabdiitzno né respet, né guicadiagno láabu (Mat. 16:13-16).
4. ¿Xí non gonyno órni buñ ni casuidyno rasac nagann guiembu toib galrrasuidy xtuny la Biblia?
4 Mod rony pensary buñ né costumbre ni napbu ronyni que gac nagann par láabu guitzaʼbu mod nabanybu (2 Cor. 10:5). ¿Xigonyno pal buñ ni casuidyno raclabu par guisobbu ni ná la Biblia? Raquiin gapno paseinys né modreʼ saduidyno lagary que la Biblia né espíritu xtuny Dios gony dxiin lainy xcalnabanybu (1 Cor. 3:6, 7; Heb. 4:12). Pal rasac naganbu gonybu o guiembu toib galrrasuidy xtuny la Biblia, sigory más galán guinino de stoib tema. Diti non gonyno lafuers láabu. Gapno paseinys né gonladxno láabu né ndeʼ sachiin láabu guitzaʼbu mod nabanybu.