¡Cánticos copy par gonyxiroʼno Jehová!
1 Ló reunión ni gop Watch Tower Bible and Tract Society of Pennsylvania, ni góc 4 de octubre íz 2014 goniʼyibu que cántico ni napno gac copyni stoib. ¡Notísy reʼ buny que herman nigolú bibaladx! Discurs ni goyoʼ bisetlani que nigolú rasac cánticos par guienno Dios (Sal. 96:2).
2 Sigory ranabdiitzlo, ¿xigony raquiin guitzaʼno libro de cántico ni raquiinno? Noʼ xidal razón. Primer, tipnés mod ni rienno la Biblia cayacni más nayadit, né ndeʼ rony que guitzaʼno letra ni nap cántico xtunyno (Prov. 4:18). Ni rarop razón, Traducción del Nuevo Mundo cadzaʼni né por ngú raquiin guitzaʼno letras ni nap cánticos reʼ, portín bireʼni ló Biblia reʼ. Né libro de cánticos ni napno sigory guidzaʼni, ndeʼ raduidy lagary lóono coʼno más cánticos copy loni.
3 ¿Non cuésno cántico copy par labúu salóno golno cánticos copy reʼ la? Yaca. Nigolú rabaladxdo gaibydo lóoto que mápa mer labúu guilitno cánticos copy reʼ ló Internet jw.org. Órni ma noʼ toib cántico copy, labúu golno láani órni ma guilox Reunión ro Rasuidyno guinino Xtiitz Dios, né guitnéni título né toib diitz ni ná: «cántico copy».
4 ¿Ximod labúu guisuidyno golno cánticos reʼ? Sigory sasac nagann golno cánticos copy. Per ná scú nacni, xomod salmista, raniiny lóono golno cánticos ló reunión né diti «guiguaʼno dzudiguié» (Sal. 30:12). Par labúu goʼol lo cánticos copy raquiin gonylo ndeʼ.
Bicadiag xidal buelt grabación xtuny cántico ni labúu guidzelo ló jw.org. Modreʼ más naguel sanlo láani.
Bisuidy letras ni napni par guiaʼni guiclo.
Bíil cánticos né cuanal grabación dada guientzaaylo láani.
Bisuidy cánticos copy órni guienlo Dios né xfamilylo dada gooltzaylo láani.
5 Órni golno cántico copy reʼ ló reunión herman nír guicadiagyibu grabación, né ór cú herman goʼol cánticos toibsi né grabación xomodca ronyno né stipnés cánticos.
6 Órni rolno cánticos toibsi né xhermanno ló reunión rabaladxno né láaca ronyxiroʼno Jehová. Por ngú, ló reunión diti non gapno costumbre de guireʼno fuer o gonyno stipnés cós órni noʼ cánticos.
7 Noʼ stoib mod ni labúu gonyno par guislooyno que rioladxno cánticos ni Dios raduidy lóono. Antes ni saló discurs ló samblia rioʼ grabación de cánticos. Chop buelt ló toib íz xidal hermanos né hermanas ni noʼ ló guidopynac Gudxlio stipláacayibu né xcaxtyibu radxinyibu Patterson (Nueva York) par cueʼyibu más cánticos sacroyen. Por ngú, órni herman raniʼ que guiguaʼno xalagaryno né guicadiagno orquesta ni ma noʼ puext, non gonyno láani. Ndeʼ ragoʼ lóono puext par guirá diitz ni guicadiagno (Esd. 7:10).
8 Órni guilox reunión reʼ, solno toib cántico copy ni laa, «¡Que venga el Reino establecido por Dios!». Cántico reʼ ni góc anunciar ló reunión ni rac guirá íz, goctzayni portín octubre bisaʼ tigayoʼ íz de goló cayony mandary Gobierno xtuny Dios.
9 Cánticos copy nacni «cós tzaay» ni raduidy Jehová lóono (Mat. 12:35a). Gonyno xtem par guisuidyno cánticos copy reʼ né golno láani né guidopy xcalnabanyno, modreʼ sonyxiroʼno Jehová Dios xtunyno (Sal. 147.1).