Abrahán ximig Dios

TOIB lagary ro buñ sée salés órni godudy guiérodann cú góc laa Ur. Gudx Ur bidxin góc toib gudx ni gop pór yoʼ móz, ni xidal buñ bimbu. Buñ ni golés cú pór dioxh falz bieenyibu. Scúca bunyibu dzú biguaʼyibu Babel. Buñ gudx Ur né de Babel diti gocyibu xomod Noé né Sem, ni bisob ni ná Jehová.

Godudy 350 íz ni góc guiérodann, Noé ni buny ni ná Dios goity. Nosi chop íz godudy gool buñguieeu ni rabilo ló dibuj reʼ. Láabu gócbu toib buñ ni Dios gondxiʼ. Góc laabu Abrahán. Láabu golés né xfamily lainy gudx ni góc laa Ur.

Goyoʼ toib dzú Jehová gochbu a Abrahán: Bisian Ur né xfamily né goyee stoib gudxrop ni guilooya looy. ¿Bisobbu Dios né bisiambu Ur gudx móz ro golesbu sacró la? Bunybu láani, Abrahán guirá mod bisobbu Jehová por ngú góc laabu ximig Dios.

Abrahán né tidxo xfamily bisiambu gudx Ur. Ni buny compañer láabu ngú Sara tzeelbu, bixiosbu Taré né xiacbu Lot. Godudy dzú, bidxinyibu toib lagary ni góc laa Harán, né lagarycu goity Taré bixios Abrahán. Sit goyoʼyibu de Ur.

Abrahán né guirá ni golés né láabu bireʼyibu de Harán né bidxinyibu toib lagary ni góc laa Canaán. Cú Jehová goní: Lagary reʼ guidudi looy né xiinlo. Abrahán biaʼanbu Canaán né golésyibu lainy yoʼ lairy.

Dios gosaló gocnébu Abrahán né ndeʼ bidxin gop xidalguixo xilieen né stipnés nimal né láaca xidal mós gopbu. Per láabu né Sara diti goyoʼ xiinyibu.

Órni Abrahán gop 99 íz, Jehová góoch láabu: Naʼ radudi xtiidza, sadxinlo sacloʼ bixios de xidal gudx de buñ. Per ¿ximod ñac guirá ndeʼ? ¿Labúu ñoʼ xiin Abrahán né Sara ná ma buñgol layibu la?