Rianladxyibu José

¡BIBIʼ mbioxhlas reʼ nigolú nabann noʼbu, ma diti noʼ ni gacné láabu! Láabu ngú José. Tipnés buchbu mer ma bitoʼ láabu né buñ ni sée Egipto. Lagary reʼ José sadxin sioʼ xan xomandary buñreʼ. Buch José, ¿xigony bunyibu cós mal reʼ ni bitoʼyibu buchbu? Portín radzuitzyibu José.

Bixiosyibu Jacob gondxigolubu José. Portín godibbu toib lairyol móz par José. Órni chii buch lagolbu bibiʼ ximod nadxi Jacob láabu, gosaló bidzuitznéyibu né bianladxyibu José. Per láaca goyoʼ stoib razón por ni bianladxyibu buchbu.

José goní xcaʼalbu chop buelt. Ló chop buelt ni goní xcaʼalbu bibiʼbu guirá buchbu caxixip nislóbu. Per galrrianladx ni gop buchyibu gocxiroʼni más, órni José góoch layibu xi ni goní xcaʼalbu.

Toibtica dzú, órni guirá buch lagolbu dxee cayap xiil, Jacob ranab José tze tzáguen pal labúuga dxee buchyibu. Órni buchyibu rabí que José cabigax, tipnésyibu goní: ¡Guigaityno láabu! Per Rubén ni lagol ló guiráyibu, goní: ¡Yaca, diti gonyto nga! Lagary de ñonyibu ngú ragoʼyibu José lainy toib pós bich. Ór cú raguaʼyibu rooyibu diitz ximod gonyibu né José.

Cusadxeyibu godudy tipnés buñ ismaelitas. Judá raiby a buchyibu: Guitoʼno láabu né buñreʼ. Né ngú ni bunyibu. ¡Bitoʼyibu José por 20 nilas ni góc de plata! ¡Ni bunyibu nigolú mal gocni portín diti gopyibu galronladx!

Nigoreʼ guirá buch lagol José, ¿xí gaibyibu bixiosbu? Ragaityibu toib chiv né ragoʼbu xidal buelt xhap móz yoʼol José lainy runy. Ór cú rinéyibu xhap móz yoʼol José ronoʼ bixiosyibu né raniyibu: Bidzeldo ndeʼ, bibiʼ né gon pal diti xhap José láani.

Jacob raduidy cuent que ngú láani. Raniʼ ribdxaʼbu: Toib nimal guiʼix bigaity José. Buch José scú nayibu que bixiosbu gony xpensary. Nigoreʼ Jacob nigolú rioʼ nabann né ribdxaʼgulu por xidal dzú. Per José diti nigolú goity, guibino xi rasaclobu ro radxinbu.