Jehová raduidy xiley

CHOP tzón beʼo ma godudy de goló guirá israelitas bireʼ lainy gudx Egipto, né layibu radxiinyibu dainy ni góc laa Sinaí, ni láaca góc laa Horeb. Lagary reʼ, Dios goniné Moisés ló yac gúch ni gonás guii. Israelitas raguaʼyibu lagary reʼ por xidal beʼo.

Laʼga guirá buñ cabésyibu ñeʼ dainy, Moisés riaʼpy guic dainy. Lagarycu Jehová raibybu Moisés que nainy Láabu que israelitas guisobdiitz né guidxin gac Xcudxbu ni gandxiʼbu. Órni Moisés rietj ronoʼyibu, Moisés raiby layibu guirá ni Jehová góoch láabu. Buñ ni noʼ né láabu raniʼ que guisobyibu né gacyibu xcudx Jehová.

Nigoreʼ Jehová rony toib cós ni radziguiaʼ buñ. Ronybu que rasoo goʼox guic dainy, né ronybu que raniʼ guisioʼo. Láaca raibybu a xcudxbu: Naʼ Jehová, Dios xtunyto ni goleʼ lóoto Egipto. Ór cú Jehová raiby layibu ni non gonyibu: Nosi naʼ gony adorarto diti a stipnés dioxh.

Dios raduidy saa gaʼ leyes a xcudx. Buñ ni noʼ cú radzuiby. Né raibyibu Moisés: Looy goniné lóodo, portín radzuibydo pal Dios guininé lóodo saitydo.

Nigoreʼ Jehová raibybu Moisés: Biaʼpy guic dainy reʼ. Naʼ guidudi looy chop guieetabla, ro ma bicaʼya leyes ni nainy naʼ guisobdiitz gudx. Ór cú Moisés riaʼpy dainy cú rarop buelt. Por 40 dzú né 40 goxin riaʼanbu lagarycu.

Dios nigolú nap xidal leyes par xcudx, né Moisés racaʼ láani. Dios láaca raduidy chop guieetabla reʼ a Moisés. Né ló guieetabla reʼ Dios bicaʼ chii leyes ni ma gochbu a xcudxbu. Leyes reʼ laa Chii Diitz.

Chii Diitz reʼ leyes ni nigolú rasac láani. Per láaca rasac stipnés leyes ni Dios biduidy a guirá israelitas. Toibtica de láani ndeʼ: Non gandxiʼlo Jehová, Dios xtunylo né guidopy xcalnabanylo, guidopy xcalrrienlo, guidopynaclo, né guidopy xcalnadiplo. Né stoibni nac: Non gandxiʼlo saʼlo xomod nadxilo looyca. Jesucristo xiin Dios goníbu que chop leyes ni biduidy Dios ni ma bisetlano ngú ni más rasac ni biduidybu xcudxbu Israel. Ló historias ni sieed guisuidyno más cós ni buny Xiin Dios né ni bisuidybu.