Lesiony 8

Guibanyno né xhomilno mod ni Dios rioladx

¿Xí lagary nap buñguieeu laniolidx? (1)

¿Ximod raquiin gac toib buñguieeu né tzeʼel? (2)

¿Xí ni gony toib buñguieeu ni ma noʼ xiin? (3)

¿Xí lagary nap toib buñgonaʼ laniolidx? (4)

¿Xí ranab Dios guirá ni ma noʼ xiin né guirá bimbiox? (5)

¿Xí ná Biblia de guirá ni rasian tzeʼel né rabíl xcaltzeel? (6, 7)

1. Biblia ná, buñguieeu ngú ni rasanir laniolidx (1 Corintios 11:3). Buñguieeu nosi toib buñgonaʼ non guicábu, né xcaltzeelbu gacni nisló buñchiin (1 Timoteo 3:2; Tito 3:1).

2. Buñguieeu non goonladx tzeʼel xomod ronladxbu láacabu. Gonybu xomod buny Jesús né xpiin (Efesios 5:25, 28, 29). Diti guioʼ ór gonynabu tzeelbu. Siino goonladxbu tzeelbu (Colosenses 3:19; 1 Pedro 3:7).

3. Buñguieeu ni ma noʼ xiin ngú ni gony dxiin par guiyan xhomil. Guiduidybu galrro, lairy né toib lagary ro cuésyibu. Láaca non ganbu xi caquiin xhomilbu par gann né guisuidy ni ná xtiitz Dios (1 Timoteo 5:8). Láabu ngú non gacné xhomil par gann né guisuidy ni ná Dios né ni láabu gonybu dzú ni sietra (Deuteronomio 6:4-9; Efesios 6:4).

4. Toib buñgonaʼ non gacnébu tzeelbu (Génesis 2:18). Non gacnébu tzeelbu par guisuidybu xiimbu (Proverbios 1:8). Jehová rioladx, guirá buñgonaʼ ni ma noʼ tzeʼel gann xhomil né galronladx (Proverbios 31:10, 15, 26, 27; Tito 2:4, 5). Buñgonaʼ non gony respetar tzeʼel (Efesios 5:22, 23, 33).

5. Dios ranab guirá bimbiox guisob bixios (Efesios 6:1-3). Láabu rabés guirá ni noʼ xiin guisuidy né gony corregir ximbiox. Guirá ni noʼ xiin cuébu tiemp par tzóbu né xiimbu né par guisuidyibu Biblia né layibu, né scú ganbu xi caquiin xiimbu gann de Dios né ximod rasacbú né xi noʼ ló xpensaryibu (Deuteronomio 11:18, 19; Proverbios 22:6, 15). Órni looy gacnélo xiinlo de toib cós mal ni bunyibu diti gonynalo layibu (Colosenses 3:21).

6. Órni toib galtzeʼel diti rabésyibu sacró, ór cú galán láani gonybu ni ná Biblia. Biblia raiby lóono gonladxno né guituidyno galkié scásiʼ (Colosenses 3:12-14). Xtiitz Dios diti rasuidy, toib buñguieeu né buñgonaʼ guisian saʼ xtol tidxo galnagan. Buñgonaʼ labúu guirébu cueʼ tzeelbu pal 1) diti nainy tzeelbu gacné láabu gann né guiyan xhomil, 2) raguimbu né noʼ rries guigaitybu tzeelbu 3) ni rac oponerbu rony naganni par guiembu Jehová (1 Corintios 7:12, 13).

7. Buñ ni ma noʼ tzeʼel diti non guiscú saʼ al tzonéyibu stoib buñ. Pal toib de layibu ratné stoib ni diti nac tzeʼel toib galkié láani nisló Dios né nisló tzeelbu (Hebreos 13:4). Órni toib ratné né stoib ni diti nac tzeʼel noʼ razón lo Biblia par guibíl xcaltzeelbu né scú labúu guicáyibu buñ stoib (Mateo 19:6-9; Romanos 7:2, 3). Jehová rianladx toib galtzeʼel ni rabíl ni diti nap toib razón ni raniʼ Biblia, né gonybu galtzeʼel né stoib buñ (Malaquías 2:14-16).

[Dibuj ni sieed ló página 17]

Dios rabés guirá ni noʼ xiin guisuidybu né gony corregir ximbiox

Buñguieeu ni ronladx xiin, láaca non ganbu xí caquiin xhomilbu né non guisuidybu xtiitz Dios guiráyibu