Rahab rony crer lóo Jehová

Gonyno xpensaryno que noʼno lainy gudx Jericó. Gudx reʼ noʼni lainy gudx de Canaán, ro guirá buñ ni rabés diti rony crer lóo Jehová. Toib buñgonaʼ ni laa Rahab rabés lagary reʼ.

Órni Rahab góc mbioxien, láabu bicadiagbu historias ni raniʼ ximod Moisés bixal galaʼ nisdaʼ Xiná par labúu bireʼ israelitas de Egipto. Láaca bicadiagbu ximod Jehová gocné israelitas gony gan xi enemig ló guerr. ¡Nigoreʼ láabu racadiagbu que buñ israelitas ma dxeeyibu gahxca Jericó!

Toib goxin chop israelitas goyoʼ lainy gudx Jericó par guiláach. Layibu radxinyibu lidx Rahab, né ratuidybu biinreʼ lanioʼ par guiaʼan. Goxin cú, ni rony mandary Jericó ran que chop biinreʼ caláach xcudxbu né seeyibu lidx Rahab. Por ngú, ni rony mandary Jericó raxel buñ par tzayopy layibu. Rahab racachlan chop biinreʼ guic yoʼ lidx né raibybu a buñ ni cayopy layibu: Buñ ni caláach goyoʼyibu reʼ, per ma diti noʼyibu lainy gudx reʼ. ¡Pal rac naguelto labúu sanásto layibu! ¿Nanlo xigony Rahab cacachlan chop buñreʼ la?... Portín láabu ronybu crer lóo Jehová né nanbu que Jehová guiduidy layoo xtuny Canaán par guicaʼ israelitas.

Órni chop biinreʼ bisian lidx Rahab, biduidyibu xtiitzyibu que Rahab né xfamily diti noʼ xí sac órni Jericó guinitló. ¿Nanlo xí raibyibu Rahab gony la?... Layibu raniʼyibu: Cuaʼ tiplaʼ doʼ xináa, né bigaʼal láani roʼ bentan, pal looy ronylo ndeʼ guirá buñ ni noʼ laniolidxlo diti noʼ xi sac. Rahab buny ni merpa góoch biinreʼ láabu gonybu. ¿Nanlo xí rac después la?...

Chop tzón govitz después, israelitas rasaa roloo gudx Jericó né diti racaʼyibu rudx. Por xhoop govitz rasaayibu roloo gudx Jericó, toib buelt ló tipdzú. Per ló ni rasaʼni gatz govitz, layibu rasaayibu roloo gudx Jericó gatz buelt né ralox ronyibu ndeʼ guiráyibu racaʼyibu rudx. Jehová rony que gudx Jericó riabni. Per ¿xí rac né lidx Rahab? Por ni nal doʼ xináa roʼ bentan, lidxbu diti riabni. ¿Labúu rabiʼlo láani ló dibuj reʼ la?... ¡Rahab né xfamily diti noʼ xí racyibu!

¿Xí labúu guisuidylo de Rahab?... Órni gonbu de guirá galrradziguiaʼ ni Jehová buny, bunybu crer lóo Jehová né labúu bilaabu. Looy láaca casuidylo xidal galrradziguiaʼ ni rony Jehová. ¿Sonylo crer lóo Jehová xomod buny Rahab la?... ¡Nando que scú sonylo láani!