Timoteo goniiny ñacnébu buñ

Timoteo gócbu toib mbioxhlas ni bibaladx órni gocné stipnés buñ. Xidal lagary gosaabu par gocnébu buñ. Guirá ór nigolú bibaladxbu. ¿Rioladxlo gabi looy más de láabu la?...

Timoteo goniʼsbu lainy gudx ni góc laa Listra. Xinaʼbu góc laa Eunice, né soiscólbu góc laa Loida. Desde dzú Timoteo góc toib badaʼyen, layibu bisuidyibu de Jehová a Timoteo. Por ngú, desde mbioxien, goniiny ñacnébu buñ nimbu a Jehová.

Toib dzú órni Timoteo ná nac toib mbioxhlas, Pablo gonab láabu: Naʼ tzaʼya guisudi ni ná Dios stipnés lagary, ¿rioladxlo guieedlo né naʼ la? Timoteo bibaladxbu, né goniʼbu, rioladxi tzaʼya né looy, goniʼbu scú portín bioladxbu ñacnébu buñ.

Timoteo buny compañerbu Pablo goyee Tesalónica. Par labúu bidxinyibu cú, xiroʼ gosaayibu né láaca goyoʼyibu lainy bark. Órni bidxinyibu lagarycu, gocnéyibu xidal buñ par labúu bimbu a Jehová. Per tipnés buñ nigolú bidzuitz né goniiny ñonynaa layibu. Por ngú, Pablo né Timoteo bireʼyibu de lagarycu né seeyibu stoib lagary par bisuidyibu ni ná Jehová.

Tidxó beʼo de goló godudy ndeʼ, Pablo góoch a Timoteo guibiguet Tesalónica. Goniiny Pablo ñan ximod dxee herman de lagarycu. Lainy gudx Tesalónica diti galán cuacuentyibu guirá cristianos. ¡Timoteo biquiin ñap balory par nabiguet lagarycu! ¿Xí láani buny Timoteo? Láabu gosaguelbu, portín goyoʼbu ló galrrasaʼ por guirá herman ni goyoʼ lagarycu. Órni bibiguetbu, bitnébu diitz galán par bicadiag Pablo: herman ni goyoʼ Tesalónica diti bisianyibu buny adoraryibu Jehová.

Por xidal íz, Timoteo buny ni ná Jehová toibsi né Pablo. Por ngú, Pablo bicaʼbu de Timoteo scareʼ: Diti noʼ stoib xomod láabu. Por ngú raxel láabu par gacnébu herman. Láabu nadxiʼbu Jehová né láaca ronladxbu buñ.

Looy láaca ronladxlo buñ, ¿diti scú láani la? ¿Rioladxlo gacnélo layibu guimbuyibu Jehová la?... Pal gaclo de clas buñreʼ sabanylo goxt né sabaladxlo xomod Timoteo.