Gonab xcalrracné Dios par guibanylo goxt né tzeʼel lo

Jehováa Dios bisaʼbu primer galtzeʼel ni goyoʼ. La Biblia raiby lóono que láabu bisaʼbu primer buñgonaʼ né «bitnébu buñgonaʼ reʼ ronoʼ buñguieeu». Adán nigolú bibaladxbu né dada goniʼbu: «Ndeʼ dxit ladi de dxit ladi. Né beʼel ladi de beʼel ladi» (Génesis 2:22, 23). Jehová raniinysani láabu que buñ guiguaʼ goxt né tzeʼel.

Órni buñ rotzña, rony pensary que xcaltzeelyibu sácni sacrodiguieʼ. Per diti guirá ór racni scú, portín buñ ni ma bitzña ná nadxiʼgoluyibu saʼyibu sadudyibu ló galnagan (1 Corintios 7:28). Ló follet reʼ sadzelo xidal litz ni sitné la Biblia, né pal rasoblo láani sonyni que sabanylo goxt né tzeʼel lo né xfamilylo (Salmo 19:8-11).

1 CUACUENT DXIIN NI JEHOVÁ MA BIDUIDY LOOY

NI NÁ LA BIBLIA: Buñguieeu ngú ni rasanir nisló xfamily (Efesios 5:23).

Pal looy naclo buñguieeu, Jehová raniiny que gaclo buñtzayxat né tzeʼel lo (1 Pedro 3:7). Jehová bisaʼbu buñgonaʼ par gacnébu looy né raniiny láabu que gonladxlo né gandxiʼdotlo láabu (Génesis 2:18). Non gandxiʼlo tzeʼel lo né tzoʼlo galrrasaʼ por ni raniiny gonybu né después tzoʼlo galrrasaʼ por looy (Efesios 5:25-29).

Pal looy naclo buñgonaʼ, Jehová raniiny que nigolú gaplo respet tzeʼel lo né gacnélo láabu né dxiin ni cuacuentbu (1 Corintios 11:3; Efesios 5:33). Goyoʼ de acuerdo né ni noʼ guicbu gonybu né gocné láabu né guidopy xcalnabanylo (Colosenses 3:18). Órni gonylo ndeʼ saclo toib buñgonaʼ móz nisló tzeʼel lo né nisló Jehová (1 Pedro 3:1-6).

NI LABÚU GONYLO:

• Gonabdiitz tzeʼel lo xí labúu gonylo par gaclo toib buñguieeu o buñgonaʼ ni natzaayxat. Bicadiagtzay, né buny por gonylo ni canabbu looy par guitzaʼlo mod naclo

• Góc buñ paseinys. Rinéni tiemp par gonyto que guibaladx saʼto

2 GOYOʼ GALRRASAʼ XI NI RASAC TZEʼEL LO

NI NÁ LA BIBLIA: Raquiingoluʼni que tzoʼlo galrrasaʼ xí rasac tzeʼel lo (Filipenses 2:3, 4). Binladx tzeʼel lo né bisetnaladx que Jehová raniiny que buñ ni rasob láabu gac «buñtzay né guirá buñ» (2 Timoteo 2:24). Cuá cuidad diitz ni rareʼ roʼlo portín la Biblia ná: «Diitz ni ronynaa nacni xomod órni riaʼisy toib espad, per loch buñ ni noʼ xcalrrien rasialni» (Proverbios 12:18). Espíritu xtuny Jehová sacné looy guiniʼlo nadaʼa né galrronladx (Gálatas 5:22, 23; Colosenses 4:6).

NI LABÚU GONYLO:

• Nír gonab lóo Dios órni nainy looy gonylo toib cós, par gacnébu looy diti guidzuitzlo né guicacuentlo ni rony pensary tzeʼel lo

• Cuá cuidad xí ni guiniʼlo né ximod guiniʼlo láani

3 COLGONY PENSARY TOIBSI MOD

NI NÁ LA BIBLIA: Órni looy rotzñalo, looy radxinlo raclo «toibsi beʼel» né tzeʼel lo (Mateo 19:5). Per ná ma cuá saʼto nacsato chop buñ né sioʼ ór diti toibsi mod sonyto pensary. Por ngú raquiin guientzaaylo ximod labúu gonyto pensary toibsi mod né guiento xí rasac saʼto (Filipenses 2:2). Colgony pensary toibsi mod órni ragoʼto guicto gonyto toib cós. ¿Ximod labúu gonyto láani? La Biblia ná: «Órni buñ rooy diitz né saʼ rarebuʼ ni noʼ guicyibu gonyibu» (Proverbios 20:18). Biduidy lagary que xilitz la Biblia guisanéz lóoto órni coʼto guicto gonyto toib cós ni rasac (Proverbios 8:32, 33).

NI LABÚU GONYLO:

• Diti nosi guiniʼlo né tzeʼel lo ni ronylo pensary, láaca raquiin guiniʼlo xí ni rasaclo

• Gonabdiitz tzeʼel lo órcura gonylo toib compromis