¿Xí labúu gonylo par labúu gacné la Biblia looy?

¿Ma goyoʼlo galrrasaʼ toibtica buelt órni bunylo pensary salólo toib dxiin rodann la? Par diti nasac naganlo láani, sigory bunylo láani dxoga dxoga, scúca gonyno órni golno la Biblia. Sigory ranabdiitzlo: «¿Pu niis salóya?». Ló lesiony reʼ sasuidyno tipnés consej ni labúu sacné looy par guioladxlo goʼolo né guisuidylo la Biblia.

1. ¿Xigony non golno la Biblia guirá dzú?

Buñ ni roʼol la Biblia o «xiley Jehová» guirá dzú, sioʼbu nakit né guirá ni gonybu sarebuʼni (bíil Salmo 1:1-3). Par labúu gonylo láani buny por goʼolo chop tzón minut tipdzú. Laʼga más simbulo Xtiitz Dios más sioladxlo goʼolo láani.

2. ¿Xí láani sacné looy par guioladxlo goʼolo la Biblia?

Par guioladxno golno la Biblia non guisagadzuno gonyno pensary ló ni cayolno. Diti nosi golno libro reʼ, láaca gonyno «pensary loni» (Josué 1:8). Órni goʼolo láani, gonabdiitz ndeʼ looy: «¿Xí rasuidy versículos reʼ naʼ de Jehová? ¿Ximod labúu guisoba láani laʼga nabani? ¿Ximod labúu guiquiina láani par gacnéya stipnés?».

3. ¿Pu labúu cueʼlo tiemp par goʼolo la Biblia?

¿Rasacnaganlo cueʼlo tidxó tiemp par goʼolo la Biblia la? Xidalno rasaclono scú. Buny por guiquiinlo «xtiemplo galán» (Efesios 5:16). Labúu sarebuʼni pal rayopylo toib ór par goʼolo la Biblia. Tipnés buñ roʼol láani rosil, stipnés rioladx goʼol láani godzu, o sigory órni rasaladxyibu. Noʼyibu roʼolyibu la Biblia goxin, antes de gaisyibu. Looyga, ¿pu ór ñoladxlo ñoʼolo la Biblia?

NANOY GUISUIDYNO LÁANI

4. Bisuidy guioladxlo goʼolo la Biblia

Sigory rasac nagan buñ saló goʼol la Biblia. Per xomodca rasaló rioladxno guáno toib galrro ni diti ma godóno, scúca dxoga dxoga sioladxno golno la Biblia. Colgoʼol 1 Pedro 2:2 né colgooy xtiitzni:

• ¿Nálo que pal ñoʼolo la Biblia guirá dzú ñoladxlo ñoʼolo láani né dada naniiny looy ñoʼolo más la?

Colguibiʼ VIDEO reʼ par guimbuto tipnés mbioxhlas ni bisuidy goʼol la Biblia. De ngú colgooy xtiitzni:

VIDEO: Mbioxhlas ni bisuidy gondxiʼ Xtiitz Dios (5:33)

• ¿Xí galnagan cualó mbioxhlas ni bibiʼno ló video reʼ?

• ¿Xí gocné layibu par diti nareʼganyibu?

• ¿Xí bunyibu par ñoladxyibu ñoʼolyibu la Biblia?

Tipnés mod par salólo:

• Golú toib traducción nayaa né ni diti nagan. Biquiin Traducción del Nuevo Mundo pal noʼni ló xtiitzlo.

• Gosaló bíil historias ni más rioladxlo. Sadzelo tipnés mod ló tabla ni ná «Tipnés mod par labúu salólo guisuidylo la Biblia».

• Bicaʼ reʼ ro seelo. Biquiin tabla reʼ «Reʼ guicaʼya ro saʼya ló la Biblia», ni sieed ló guiich reʼ.

• Biquiin aplicación JW Library^®. Pal ralitlo láani ló teléfono o ló tableta, labúu goʼolo né guicadiaglo Biblia rotísi lagary.

• Biquiin follet ni laa, Ni gacné lóono guientzaayno Xtiitz Dios. Reʼ sadzelo mapas, tablas ni sacné looy par guioladxlo goʼolo la Biblia.

5. Bisuidy xquiichlo antes de guidxin xomextralo

Colgoʼol Salmo 119:34 né colgooy xtiitzni:

• ¿Xigony rasac gonylo oración antes de salólo goʼolo la Biblia o antes de guisuidylo xquiichlo?

¿Xí labúu gonylo par labúu gacnéni looy? Órni guisuidylo lesiony ni sieed ló guiich reʼ, buny por gonylo ndeʼ:

1. Bíil guirá párrafos ro rasaló tigaaga lesiony.

2. Biyopy guirá textos ni sitnéni, bíil né buny por guitzaklo láani né información ni casuidylo.

3. Bitié diitz ni racapy galrranabdiitz. Ndeʼ sacné looy guisuidylo xquiichlo né xomextralo.

¿Nanlo ndeʼ la?

Testigos xtuny Jehová ma biquiindo xidal traducciones xtuny la Biblia, per ni más rioladxdo láani ngú Traducción del Nuevo Mundo portín diti rachéni, nayaani né sitnéni laa Dios (bisuidy artículo reʼ ló jw.org: «¿Noʼ toib Biblia ni nosi testigos xtuny Jehová nap la?»).

¿XÍ BISUIDYLO?

Par guisuidytzaylo la Biblia, golú toib ór par labúu goʼolo láani, gonab lóo Dios gacné looy guienlo ni cayoʼolo né góc preparar órni guisuidylo xquiichlo.

Repas

• ¿Xí láani sacné looy par guioladxlo goʼolo la Biblia?

• ¿Pu ór labúu ñoʼolo né nasuidylo la Biblia stiplooyca?

• ¿Xigony rasac gac prepararlo antes de guidxin xomextralo?

PAR GANLO MÁS

Bisuidy ximod labúu guientzaaylo la Biblia.

«Guioladxno golno la Biblia» (Guiich ni caniʼ, núm. 1 íz 2017)

Bisuidy tzón mod par labúu goʼolo la Biblia.

«¿Ximod labúu gacné la Biblia naʼ? Primer midid: Biyopy cós ni rasac ni sieed ló la Biblia» (Artículo ni sieed ló jw.org)

Gon ximod guioladxlo goʼolo la Biblia.

«¿Ximod labúu gacné la Biblia naʼ? Ni rarop midid: Bisuidy guioladxlo goʼolo la Biblia» (Artículo ni sieed ló jw.org)

Bíil ni raniʼ tipnés buñ ni ma xidzú cayoʼol la Biblia.

Ximod guisuidylo la Biblia par gacnéni looy (2:06)