¿Rien Dios ni rasaclo la?

XÍ RASUIDY LÓONO GUIRÁ NI BISAʼ DIOS

Buny pensary ximod badaʼ cuach radzak saʼyibu. Toib directora ni laa, Nancy Segal, ni noʼ lagary ro rasuidyibu mod nac buñ cuach, né noʼ toib belbu ni nac cuach, rasetlabu que tipnés cuach «rientzaayibu saʼyibu ná diti raninéyibu saʼyibu». Toib buñgonaʼ goniʼ ximod radzakbu né belbu ni nac cuach: «Nigolú rimbutzaaydo saʼdo».

¿Xigony cuach nacyibu modreʼ? Ná mod nac ro dxeeyibu o mod goniʼsyibu non coʼno cuent láani, tipnés estudios raniʼ que genes xtunyibu casi toibsi mod nacni.

BUNYSI PENSARY: Dios bisaʼ material xtuny genes ni noʼ laidy buñ, por ngú, ronyno pensary que láabu rientzaaybu lóono. Salmista David gop razón órni bicaʼbu ndeʼ: «Gontzaylo naʼ órni goyoʼya lainy xpidzan xinaʼya. Dxit ladi diti goyoʼni nagach nislólo órni bisaʼlo naʼ [...]. Bisalólo bibiʼ naʼ órni noʼya lainy xinaʼya, né ló xilibralo bicaʼlo mod goyaʼya» (Salmo 139:13, 15, 16). Dios diti nosi nan né rien mod goyaʼno, láaca nanbu ximod ma bibanyno né xí láani ma bitzaʼ mod nacno. Por ngú napno confianz que diti noʼ stoib ni rientzaay lóono xomod riembu lóono.

XÍ RASUIDY LA BIBLIA MOD RIENTZAAY DIOS LÓONO

Rey David gonab lóo Dios: «Jehová, looy cabiʼtzaylo, né rimbutzaaylo naʼ. Looy rimbulo órni rabúya né órni riása. Desde sit rienlo mod nac xpensari. Diti noʼ toib diitz ló lodxi, per ¡bibiʼ!, oh Jehová, looy ma nanlo láani» (Salmo 139:1, 2, 4). Láaca Jehová rimbutzaay mod rasacno, né rimbutzaaybu xpensaryno (1 Crónicas 28:9; 1 Samuel 16:6, 7). ¿Xí rasuidy ndeʼ lóono de Dios?

Rasuidyni lóono que, órni raninéno Dios ná diti nanno ximod guinino ni ronyno pensary o ni rasacno, Jehová ni Bisaʼ lóono ma nan láani. Láabu rabiʼbu ni ronyno né láaca riembu xigony ronyno láani. Per diti nosi ngú, Dios láaca nan xí láani ñonyno pal mod nabanyno ñacni gadzé mod. Scú láani, Dios bisaʼ lóono par labúu gapno galnadxiʼ, né labúu gapno confianz que raniiny láabu guimbubu né guiembu mod nac pensary tzaay ni napno né ni raniiny lóono gonyno (1 Juan 4:7-10).

La Biblia raiby lóono:

• «Portín bisaló Jehová cabiʼ buñ ni rony xinésni, né cacadiagbu ni canabyibu» (1 PEDRO 3:12).

• Dios raduidy xtiitz: «Naʼ soni que naní gac guiclo né sasudi looy néz ni saalo. Naʼ sabiʼya looy né salidza looy» (SALMO 32:8).

DIOS NIGOLÚ RONLADX LÓONO

¿Labúu guicalóno galnagan por ni nanno que Dios rien lóono la? Buny pensary ni gosaclóo Anna, de Nigeria. Goniʼbu ndeʼ: «Órni ma diti bidzel xcalrriena xi goni, gonabdiitz naʼca pal rasac guibani. Dzú biduidy cuent que napa cáncer ló xidxi, tzeʼela ma goity né xiindzapa noʼbu hospital né caxoʼbu portín noʼ nís lainy yobguicbu. Nagan gocni par naʼ portín naʼ goyoʼya lainy hospital né xiinna láaca goyoʼ lainy hospital, né buny operaryibu naʼ né cuaʼya quimioterapia né radioterapia».

¿Xí láani gocné Anna par labúu cualóbu galnagan reʼ? «Buni pensary ló textos xomod Filipenses 4:6, 7, ro ná, né paz xtuny Dios ni rony gan guirá pensary san xcalnabanyto né xpensaryto. Guirága ór ni bisetnaladxi diitzreʼ gosaca que noʼya xilad Jehová, goona que rientzaaybu naʼ más que naʼca. Láaca herman ni noʼ lainy congregación gocné naʼ.

»Ná caxoʼya, ma más labúuga dxeedo. Ma bisuidydo gonydo pensary que labúu guicalódo nitisi galnagan portín Jehová noʼbu né lóodo. Santiago 5:11 ná: Par lóono dichós buñ ni rony guantary. Lóoto ma bicadiagto ximod buny guantary Job né láaca ma bibiʼto xi galnasác biduidy Jehová láabu, que Jehová ragobiobu buñ né nap galrronladx». Jehová bientzaay ximod góc galnagan ni godudy Job ló, né labúu gapno confianz que láaca scúca riembu xí galnagan racalóno.