Galnigolú de Dios né de Jesucristo

¿Chú láabu ngú Dios?

¿Ximod laa Dios? Láacabu nábu: «Naʼ naca Jehová. Ndeʼ laaya» (Isaías 42:8). Ló la Biblia, laa Dios sieed más de gatz mil buelt. Per ló xidal traducciones xtuny la Biblia rabeʼyibu laa Dios né xalagaryni racaʼyibu Señor. Dios raniiny que looy gaclo ximigbu por ngú nainy láabu guiquiinlo laabu (Salmo 105:1).

Títulos xtuny Jehová. La Biblia rasetlaa que Jehová nap xidal títulos xomod Dios, ni nap Xiroʼgolu galnadip, ni Bisaʼ, Bixiosno, Señor né ni noʼ más Guiaʼ. Ló xidal oración ni sieed ló la Biblia buñ biquiin toib título né láaca biquiinyibu laa Jehová (Daniel 9:4).

Ximod nacbu. Dios nacbu toib espíritu ni diti labúu rabiʼ buñ (Juan 4:24). La Biblia nayadit raniʼ que «Dios dipa ma goyoʼ toib buñ ni bibiʼ láabu» (Juan 1:18). La Biblia láaca raiby lóono mod rasacbu. Guirá ni ronyno labúu gonyni que guibaladxbu o tzoʼ nabambu (Salmo 78:40, 41; Proverbios 27:11).

Cualidades sacróyen ni napbu. Dios toibsi midid ragobiobu buñ, ná nacyibu de stoib gudx o noʼ ni bunyibu ló dzú ni see (Hechos 10:34, 35). Jehová láaca nac «toib Dios ni nap galrronladx né ni rien xi rasac buñ, ni diti radzuitz nimaca né ni nap galnadxiʼ ni diti raché» né guirá ór raniʼbu ni nigolú (Éxodo 34:6, 7). Per lad guirá cualidades ni napbu noʼ tap ni rareʼ loguiaʼ.

Galnadip. Láabu nacbu toib «Dios ni nap Xiroʼgolu galnadip». Ndeʼ radudy diitz que labúu gony cumplirbu guirá ni ma goniʼbu gonybu (Génesis 17:1).

Xiroʼ galnan. Dios nan más que nitisi buñ. Por ngú la Biblia ná que «nosi láabu napbu xiroʼ galnan» (Romanos 16:27).

Ronybu xinésni. Dios guirá ór ronybu xinésni. «Diti rachébu ló guirá ni ronybu, guirá ni ronybu nacni xinésni» (Deuteronomio 32:4).

Galnadxiʼ. La Biblia ná que «Dios ngú galnadxiʼ» (1 Juan 4:8). Dios diti nosi raslooybu galnadxiʼ, láabu ngú galnadxiʼ. Guirá ni ronybu, ronybu láani por ni napbu galnadxiʼ, né ngú racné lóono de xidal mod.

Mod radzakbu buñgudxlio. Dios nac Bixiosno ni noʼ guibá né ronladxbu lóono (Mateo 6:9). Pal napno fe lóbu, labúu gacno ximigbu (Salmo 25:14). Scú láani, Dios raniiny que guibigaxno láabu órni gonyno oración né gaibyno láabu guirá galnagan ni racalóno portín rioʼbu galrrasaʼ por lóono (Santiago 4:8; 1 Pedro 5:7).

Dios né Jesucristo, ¿toibsi buñ layibu la?

Jesús diti nacbu Dios. Diti noʼ stoib xomod Jesús, portín nosi Dios bisaʼ láabu. Por ngú ló la Biblia laabu Xiin Dios (Juan 20:31). Jehová bisaʼbu Jesús, xiin lagolbu, né después golúbu Jesús par ñac «toib mextra ni rasaʼ», par nasaʼbu Gudxlio né guibá né guirá ni nabany (Proverbios 8:30, 31; Colosenses 1:15, 16).

Jesús dipa goniʼbu que nacbu Dios. Xalagary ngú goniʼbu: «Sieela xomod representante xtuny [Dios] né láabu bixelbu naʼ» (Juan 7:29). Laʼga caninébu toibtica xpiimbu gochbu Jehová «Bixiosa né Bixiosto, Dios xtuni né Dios xtunyto» (Juan 20:17). Órni goitybu, Jehová golís láabu lad gueʼet par nabanybu lainy guibá, bunybu que Jesús nabú ladbuʼbu né Jehová bidudy xiroʼ galmandary láabu (Mateo 28:18; Hechos 2:32, 33).

Jesucristo labúu gacné looy guibigaxlo Dios

Bieedbu ló Gudxlio par guisuidybu lóono ximod nac Bixiosbu. Jehová láacabu goniʼbu de Jesús: «Ndeʼ Xiinna ni nadxiʼya. Colguicadiag láabu» (Marcos 9:7). Nosi Jesús rimbutzaay Dios. Láabu goniʼbu: «Diti noʼ chú nan chú ngú Bixiosa, nosi naʼ né guirá buñ ni nainy naʼ gaabi láani, láaca san láani» (Lucas 10:22).

Jesús raslooytzay cualidades xtuny Dios. Jesús bisuʼbu cualidades xtuny Bixiosbu né dada labúu goniʼbu: «Ni ma bibiʼ naʼ láaca ma bibiʼ Bixiosa» (Juan 14:9). Mod goniʼbu né mod bunybu gocnébu buñ nabigax ronoʼ Dios, portín bislooybu balaati nadxiʼ Dios layibu. Jesús goniʼ: «Naʼ ngú néz né ni nigolú né vida. Ni toib rieed ronoʼ Bixiosa sino por naʼ» (Juan 14:6). Láaca goniʼbu: «Guirá ni cayony adorar Bixiosa xinésni, sonyibu láani né espíritu né galnigolú. Portín Bixiosa cayopy buñ de clascu par gony adorar láabu» (Juan 4:23). ¡Bunysi pensary! Jehová cayopy buñ xomod looy, buñ ni raniiny gan xi ngú ni nigolú de láabu.