Gacnéno buñdxep par guisuidyibu de Jehová
1. ¿Ximod bislooy Jesús que goyoʼbu galrrasaʼ por buñdxep?
1 Jesús mápa mer guireʼbu de Jericó, ór cú chop buñdxep bicaʼ rudx: «¡Señor, binladx lóodo!». Ló dzúcu Jesús noʼbu ló galrrasaʼ portín mápa mer guidxin dzú ni gaitybu. Ná scú nacni, láabu gosagadzubu né bisialbu chop buñguitz reʼ (Mat. 20:29-34). ¿Ximod labúu guisuʼno xcalrronladx Jesús?
2. ¿Ximod guinino xtiitz Dios a buñdxep locay? b) ¿Xí labúu gacné lóono par gacnéno buñdxep?
2 Gacnéno layibu. Pal radzelno buñdxep locay gaibyno layibu chú lóono né gaibyno layibu que nainy lóono gacnéno layibu. Sigory moda sadzuibyibu portín xidal buñ rony mal layibu. Per pal ronladxno né rioʼno galrrasaʼ por láabu sigory sasaguelbu gacnéno láabu. Láaca guisetnaladxno que noʼ buñ ni labúu rabiʼ tidxóyen né noʼ stipnés ni diti labúu rabiʼ xitcal, né ndeʼ sacné lóono par guiduidyno cuent xí galrracné caquiimbu. Órni ma gocnéno láabu, gaibyno láabu que racnéno buñ par guisuidyibu ni ná la Biblia. Golnéno láabu toib texto ni sieed ló la Biblia, xomod Salmo 146:8 o Isaías 35:5, 6. Labúu guislooyno láabu ximod guilitbu grabación ló Internet jw.org. Pal buñreʼ labúu roʼol braille, guinabdiitzno pal nainy láabu guicaʼbu toib libro o guiich ni noʼ ló braille ni gacné láabu guisuidybu más de la Biblia. Pal buñreʼ nap toib computadora ni roʼol texto ni rareʼ ló pantalla, sigory tipnés cós ni sieed ló jw.org né tipnés libros né guiich ni labúu guilitbu ló formato RTF sacné láabu. Chop formatos reʼ nosi noʼni ló dixtil né diitz ni más raniʼ buñ. (Bibiʼ cuadriyen ni laa, «Órni gacnéno buñdxep...».)
3. ¿Ximod labúu guidzelno buñdxep?
3 Guiyopyno buñdxep. Sigory dipa radzelno buñdxep órni rioʼno yoʼ por yoʼ, portín diti rioladxyibu guininéyibu buñ ni diti rimbuyibu. Por ngú raquiin gonyno xtem par guidzelno né gaibyno layibu ni ná Dios (Mat. 10:11). ¿Rioʼno scuel o ronyno dxiin né toib ni nac buñdxep la? Pal nacni scú, guisuidyno láabu ni ná la Biblia. Pal ló territorio xtunyno noʼ toib scuel par buñdxep, guinabdiitzno director pal nainy láabu que tzanéno tipnés libros o guiich ló braille par biblioteca xtunybu. ¿Rimbuno toib buñ ni noʼ toib xfamily ni nac buñdxep la? ¿Lainy territorio xtunyno noʼ grupo de buñ ni racné a buñdxep o noʼ toib lagary ro rabés buñdxep la? Gaibyno xfamilbu, buñ ni ran lagarycu o director que nacno testigos xtuny Jehová né raniiny lóono gacnéno buñdxep, né napno libros né guiich ló braille né grabaciones par layibu. Guislooyno layibu né la Biblia que Jehová raniʼ que ló dzú ni sietra ma dipa sioʼ buñdxep. Láaca labúu guislooyno video ni laa, «No sé qué haría sin ella», ni sieed ló jw.org. Video reʼ rasetlaa ximod Biblia ni noʼ ló braille ma gocné a toib buñdxep. Pal ranino xigony riguenno buñ, sigory diti sac nagan par lóono guidzelno buñdxep.
4. ¿Xí rasuidyno de experiencia ni gop Janet?
4 Toib hermana ni laa Janet goyeebu toib lagary ro rabés buñdxep, né gosalóbu goninébu toib gonaʼ mbioxhlas. Janet góoch láabu: «Órni Jesús goyoʼ ló Gudxlio, bisialbu tipnés buñdxep modreʼ bislooybu xí ni gonybu ló dzú ni sietra por guirá buñdxep». Ór cú bíilyibu Revelación 21:3, 4, né Janet golexa ximod Gobierno xtuny Dios sony guirá ndeʼ. Mbioxhlas reʼ nigolú bidziguiaʼbu né goniʼbu: «Dipa ma bicadiaga que toib buñdxep rony pensary modreʼ. Xidal buñ ni labúu rabiʼ raniʼyibu que galguitz reʼ nacni toib castig por ni ma bunyno o ni ma buny xfamilno». Janet bixel láabu toib correo electrónico ro labúu guidzelbu libro ¿Xí ni merpa rasuidy la Biblia?, né nigoreʼ casuidyibu la Biblia chop buelt ló toib xomal.
5. Ná diti labúu guisialno buñdxep, ¿ximod sacnéni layibu pal rioʼno galrrasaʼ por layibu?
5 Scú láani, diti labúu guisialno buñ xomod buny Jesús. Per noʼ ni labúu gonyno. Xtioxh gudxliogoxreʼ ma bisiegbu xcalrrien xidalguixo buñ, láaca labúu guinino que ma bunybu láani né buñdxep. Lóono labúu gacnéno buñdxep par guienyibu ni merpa rasuidy Xtiitz Dios (2 Cor. 4:4). Jesús bisialbu chop buñdxep gahxca Jericó portín binladxbu biinreʼ (Mat. 20:34). Pal lóono rioʼno galrrasaʼ por buñdxep, labúu sacnéno layibu par guimbuyibu Jehová, Dios ni saxal bisalóyibu né sony que guibanyibu tipzó.