Xí labúu gonyno par gonyno xchiin Dios más galán: bisiané libro ¿Xí ni merpa rasuidy la Biblia?

Xigony rasacni. Libro ni laa, ¿Xí ni merpa rasuidy la Biblia? nacni toibtica ni más raquiinno órni ranino xtiitz Dios. Per pal nainy lóono guiquiinno láani par guisuidyno buñ ni ná la Biblia, nír non guisianéno láani layibu. Por ngú, nigolú raquiin gonyno xtem par guisianéno libro reʼ buñ órni casaano yoʼ por yoʼ (Prov. 22:29). Noʼ xidal mod ni labúu gonyno láani, por ngú guiyopyno ni más galán par buñ ni racadiag lóono.

Ximod gonyno láani:

Buny toib galrranabdiitz par gan buñ de xí caniʼlo ni sieed ló toib capítulo de libro reʼ. Labúu guisetlalo toibtica galrranabdiitz ni sieed ro rasaló toib capítulo. Después ni guicadiaglo ximod racapybu, bíil toib texto né ló chop tzón minut colguisuidy toib párrafo de libro reʼ ni raniʼ de tema cú.
Stoib mod ni labúu gonylo láani ngú guiquiinlo páginas ni sieed ro rasaló libro reʼ par ganlo xi láani rioladxbu, né guislooylo láabu ló libro reʼca xí láani rasuidy la Biblia de temas cú. Después ni guisetlalo de toib desgrasy ni góc ni cadudy ló notísy, labúu guiniʼlo que xidal buñ rony galrranabdiitz xomod ni sieed ló página 3. Láaca labúu guiniʼlo que caninélo buñ ni rabés gahxca ro rabéslo par gooyto diitz ximod gac ló dzú ni sietra. Bislooy láabu dibuj ni sieed ló páginas 4 né 5, né gonabdiitz láabu: «¿Xí láani ni rasetlaa la Biblia reʼ ñoladxlo ñac cumplir?». Láaca labúu naniʼlo que casaalo caninélo buñ de tipnés galrranabdiitz ni ronyno lóocano. Bilooy láabu galrranabdiitz ni sieed ló páginas 6 né gonabdiitz láabu xí láani más rioladxbu ganbu.
Buny por guislooylo ni maca ximod rasuidyno buñ. Labúu naniʼlo scareʼ: «Caslooydo buñ né xcalrracné libro reʼ ximod guisuidyibu la Biblia. ¿Ma rimbulo láani la? [Biduidy lagary guicapybu.] Pal naplo tiemp ñoladxi nasloya looy ximod labúu naquiinlo láani par guisuidylo né Biblia ni naplo».

Buny ndeʼ ló beʼo:

Órni guienlo Dios né xfamilylo colguisuidy ximod labúu gonyto láani.
Órni guirenélo stipnés herman, góoch layibu ximod bisuidylo xquiichlo par guininélo buñ (Prov. 27:17). Pal raduidylo cuent que diti galán nacni biyopy stoib mod par guininélo buñ.