¿Ximod salóno guininéno buñ né tratad?

De goló beʼo enero íz 2018, guiich ni laa Ni non gonyno ló reunión sitnéni tipnés mod ni labúu guininéno buñ. Ma gochyibu lóono que xalagary guikiʼsno libros né guiich, gonyno por guininéno buñ. Par labúu gonyno ngú, videos ni radudy ló reunión raslooyni lóono ximod guiquiinno nosi la Biblia órni guininéno buñ. Per ¿radudyni diitz que dipa labúu guikiʼsno toib guiich órni casaano yoʼ por yoʼ la? Yaca. Por ejemplo, labúu guiquiinno tratad par salóno guininéno buñ. Órni guiquiinno láani labúu gonyno ndeʼ:

1. Gonyno galrranabdiitz ni sieed laidy toib tratad né cuésno que buñ guiniʼ xi rony pensary.

2. Guilooyno texto ni sieed xiitzkiaʼ página chop. Pal buñcu noʼ nalat, golno né cuéxano ni sieed ló tratad.

3. Gonycuentno tratad buñcu, né gaibyno láabu goʼolbu guidopycani órni ma noʼ nalatbu.

4. Antes de guireʼno, guilooyno láabu galrranabdiitz ni sieed ro ná «Gonabdiitz ndeʼ looy» né gaibyno láabu pu dzú labúu guibiguetno par cuéxano láani né la Biblia.

Órni guibiguetno, cuéxano galrranabdiitz ni biantaʼ né gonyno stoib galrranabdiitz ni guicapyno stoib ór. Labúu guiyopyno toib galrranabdiitz ni sieed ló página de Internet ni napno o guiyopyno galrranabdiitz ni sieed ló follet ni ritlaa ló última página xtuny toibtica tratad. Órni ma labúuni, gonycuentno láabu follet ¡Diitz sacró ni sieed de Dios! o nitisi guiich ni sieed ló kit de enseñanza ni raquiinno par guisuidyno buñ ni ná la Biblia.