ARTÍCULO NI GUISUIDYNO 6
Ni rasuidy la Biblia lóono de Dios
«Bicaʼ ló toib libro guiráxadit ni gaabi looy» (JER. 30:2).
CANCIÓN 96 El libro de Dios es un tesoro
NI GUISUIDYNOa
1. ¿Xigony radudylo guixquix por ni naplo la Biblia?
¡NIGOLÚ radudyno guixquix Jehová portín bidudybu la Biblia lóono! Loni sieed tipnés consej ni labúu gacné lóono ganno xi gonyno órni cacalóno galnagan. Láaca radudyni esperanza lóono par ló dzú ni sietra. Né ni más rasac, raslooyni lóono ximod nac Jehová. Órni ronyno pensary mod nacbu nigolú radxinni lainy xcalnabanyno. Ngú rachiin lóono guibigaxno láabu né gacno ximigbu (Sal. 25:14).
2. ¿Xí buny Jehová par labúu ñanno de láabu?
2 Jehová raniiny guimbu buñ láabu. Ló dzú ni see biquiimbu bacaʼal, visión né dada ángeles par gochbu lóono ximod nacbu (Núm. 12:6; Hech. 10:3, 4). Per pal diti ñoʼ chú nacaʼ láani, diti labúu ñanno láani. Por ngú Jehová biquiimbu tipnés buñguieeu par nacaʼyibu «ló toib libro» ni goniiny láabu ñanno (Jer. 30:2). Napno confianz que guirá información reʼ cuáni xinésni, portín «xinés Dios ni nigolú diti rachéni» (Sal. 18:30).
3. ¿Xí láani buny Jehová par labúu ñapno la Biblia dada ló xtzúno? (Isaías 40:8).
3 (Bíil Isaías 40:8). Por xidal mil íz, Xtiitz Dios ma golonésni xpiimbu. Per ¿ximod labúu gacni scú? Ma xidzú de goló cuá la Biblia né cuáni ló guiich ni naguel rioox. Né ni nanno la, diti noʼ guiich ni bicaʼyibu nírcu. Per Jehová cuá cuidad que buñ ñony copiar guirá textocu. Guirá copistas gocyibu buñ galkié per diti cuenunysi bunyibu xchiinyibu. Toib buñnan goniʼ de Escrituras Hebreas ndeʼ: «Labúu gapno confianz que ni toib libro ni cuá ló dzú ni see cuá más nayaa que ndeʼ». Ná buñ galkié bicaʼ láani né cuáni ló guiich ni naguel rioox, riendxich que ni caa ló la Biblia sieedni de Jehová.
4. ¿Xí guisuidyno ló artículo reʼ?
4 «Guiráxadit galrrascad ni natzaay né guirá ni diti nap galkié» sieedni de Jehová, né la Biblia nacni toibtica galrrascad más sacró ni ma bidudybu lóono (Sant. 1:17). Toib galrrascad raniʼni de buñ ni radudy láani. Raslooyni lóono pal nigolúpa rimbubu lóono né pal nanbu xi ni caquiinno. Modcu nac la Biblia. Órni rolno láani, rasuidyno xidal cós de Jehová. Radudyno cuent que rimbutzaaybu lóono né nanbu xi ni caquiinno. Ló artículo reʼ sasuidyno tzón cualidad ni nap Jehová ni rareʼ loguiaʼ ló la Biblia: sabiduría xtunybu, justicia xtunybu né xcalnadxiʼbu. Primer guinino xi ná la Biblia de sabiduría xtuny Dios.
LA BIBLIA RASLOOYNI SABIDURÍA XTUNY DIOS
5. ¿Xí láani raslooy que la Biblia napni sabiduría xtuny Dios?
5 Jehová nan que raquiinno xconsejbu. Por ngú biscadbu la Biblia lóono, loni sieed sabiduría xtunybu. Xconsejbu racnégoluʼni buñ. Dada labúu guitzaʼni mod nabany buñ. Órni Moisés bicaʼ tipnés libros ni sieed ló la Biblia, gochbu israelitas ndeʼ: «Diti nacni diitz xilaʼsi, xalagary ngú sadudyni galnabany lóoto» (Deut. 32:47). Ni nasobdiitz ni sieed ló Xtiitz Dios labúu nabany goxt né narebuʼ ni ñony (Sal. 1:2, 3). Ná ma xidzú de goló cuá la Biblia, napni galnadip par guitzaʼni mod nabany buñ. Por ejemplo, ló serie de artículos ni laa, «La Biblia ma bitzaʼ mod bibanyibu» ni sieed ló jw.org, sadzelo más de 50 biografías xtuny buñ ni bitzaʼ mod bibany né xcalrracné la Biblia (1 Tes. 2:13).
6. ¿Xigony ranino que diti noʼ stoib libro xomod la Biblia?
6 Diti noʼ stoib libro xomod la Biblia. ¿Xigony? Portín Jehová ni bicaʼ láani nap Xiroʼgolu galnadip, nap sabiduría diti sadxin dzú saitybu né diti noʼ chú rigaʼl sabiduría ni napbu. Noʼ xidal libros ni roʼol buñ ná ma goity ni bicaʼ láani, né xconsejni ma godudy xtzúni. Per guirá consej ni sieed ló la Biblia diti radudy xtzúni, racnéni guirá clas buñ. Órni rolno libro reʼ né ronyno pensary ló guirá xconsejni, Dios raquiimbu espíritu santo par gacnébu lóono gonyno ni náni (Sal. 119:27; Mal. 3:16; Heb. 4:12). Bunysi pensary, Dios raniiny gacnébu looy né guidopy xcalnabanybu. ¿Ndeʼ rony animarni looy par guiaʼlo goʼolo la Biblia ja?
¿Ximod gocné la Biblia xcudx Dios par labúu naguaʼyibu toibsi ló dzú ni see, né ximod racnéni layibu guiguaʼyibu toibsi ló naareʼ? (Bibiʼ párrafos 7 né 8).
7. ¿Ximod gocné la Biblia xcudx Dios naguaʼ toibsi ló dzú ni see?
7 Noʼ stoib cós ni raslooy que la Biblia nap sabiduría xtuny Dios, láani racnéni xcudxbu guiguaʼ toibsi. Órni israelitas goyoʼyibu ló Tierra Prometida, golésyibu xidal lagary. Tipnésyibu gonás beel, stipnés gon nimal né stipnés buny dxiin ló layoo. Sit golésyibu de saʼyibu por ngú labúu ñaladxyibu saʼyibu. Per xcuent Jehová goyoʼ que guirá israelitas nadopyibu guirá ór par nacadiagyibu Xtiitz Dios né nasuidyibu más (Deut. 31:10-13; Neh. 8:2, 8, 18). Bunysi pensary ximod gosac toibtica israelita ni góc fiel órni radxinbu gudx Jerusalén, né cú radzelbu xidal millón israelitas ni sieed de stipnés gudx par guieen Jehová. Modreʼ gocné Jehová layibu ñoʼyibu toibsi. Después ló siglo primero, gosaló congregación cristiana. Cú goyoʼ tanli buñguieeu né buñgonaʼ ni bieed de stipnés lagary ni gop bidxiich né ni yaca né ni goniʼ stipnés diitz. Gosac Xtiitz Dios par layibu por ngú bienyibu Jehová toibsi. Dada stipnés buñ ni laʼra goyoʼ lainy xcudx Jehová labúu bienyibu Xtiitz Dios portín goyoʼ ni golexa láani layibu né bidopyibu (Hech. 2:42; 8:30, 31).
8. ¿Ximod raquiin Jehová la Biblia par guiguaʼ xpiimbu toibsi ló naareʼ?
8 Ló naareʼ, Jehová raquiinra la Biblia par guisuidy xcudx né guiguaʼ toibsi. Loni rareʼ guirá galrro espiritual ni racaʼno. Lóono ni nacno xpiin Jehová guirá ór rioʼno reunión né rioʼno samblia, cú rolno la Biblia, rasuidyno né rienno ni náni. Riendxichni que Jehová raquiimbu la Biblia par guirebuʼ ni ma goniʼbu né modreʼ xpiimbu sony dxiin toibsi (Sof. 3:9).
9. ¿Xí cualidad raquiinno par labúu guienno la Biblia? (Lucas 10:21).
9 Guisuidyno stoib cós ni raslooy que la Biblia nap sabiduría xtuny Jehová. Cuábu cuidad que xidal libros ni sieed ló la Biblia nacáni par nosi ñen buñdxo láani (bíil Lucas 10:21). Buñ ni noʼ ló guidopynac Gudxlio labúu roʼol la Biblia. Toib buñnan ná: «Diti nosi nacni toib libro ni más roʼol buñ, nacni toib libro ni más racaa buñ cuidad», ndeʼ radudy diitz que nacni toib libro ni más rasuidytzay buñ. Per nosi buñdxo labúu rien né labúu rony ni náni (2 Cor. 3:15, 16).
10. ¿Xí stoib mod raslooy la Biblia que napni sabiduría xtuny Jehová?
10 Guibiʼno stoib cós ni raslooy que la Biblia napni sabiduría xtuny Jehová. Diti nosi raquiimbu la Biblia par guisuidybu xidal buñ, láaca par guisuidybu né guisialdóbu tigaagano. Órni rolno la Biblia radudyno cuent que Jehová rioʼ galrrasaʼ por tigaagano (Is. 30:21). Dzú cualóno toib galnagan, ¿bíilno toib texto ni merpa caquiinno órcu la? Sigory xidal buelt. Pal la Biblia cuáni par xidal millón buñ, ¿ximod napni información ni noʼ ló ndeʼga ni merpa caquiin tigaaga buñ? Nacni scú portín sieedni de Dios ni nap más galnan (2 Tim. 3:16, 17).
LA BIBLIA RASLOOY JUSTICIA XTUNY DIOS
11. ¿Ximod bislooy Dios que diti rabeʼbu buñ tiplad dzú cuá la Biblia?
11 Stoib cualidad ni más rareʼ loguiaʼ ni nap Jehová ngú justicia (Deut. 32:4). Jehová diti rabeʼbu buñ tiplad portín nacbu toib Dios ni rony xinésni (Hech. 10:34, 35; Rom. 2:11). Diitz ni golúbu par cuá la Biblia raslooy láani. Casi guirá 39 libros ni cuá primerdiguieʼ cuáni ló diitz hebreo, diitzreʼ ngú ni bieen xcudx Jehová ló dzúcu. Per ló siglo primero dzú ni bibany cristianos, xidal buñ goniʼ diitz griego. Por ngú, 27 libros ni sieed ló la Biblia ni rimbuno xomod Escrituras griegas cuáni ló diitzreʼ. Jehová bioladxbu que Xtiitzbu nacáni ló xidal diitz. Ló naareʼ casi 8.000 millón de buñ ni nabanyno ló Gudxlio reʼ ranino xidal diitz. ¿Xigony guirácano láabu guimbuno Jehová?
12. ¿Ximod cayac cumplir ni ná Daniel 12:4 ló dzureʼ ni ma cadubylagaʼ?
12 Jehová gochbu Daniel que ló tiemp ni ma guidubylagaʼ sioʼgolu «galnan ni nigolú», ndeʼ radudy diitz que xidal buñ sien ni ná la Biblia (bíil Daniel 12:4). Labúu racni scú portín ma góc traducir, ma bireʼ ló guiich né ma bigaisy xidal Biblias né stipnés publicaciones. La Biblia nac libro ni más rac traducir né ragaisy ló guidopynac Gudxlio. Xidal traducción nigolú car radoʼni. Per xcudx Jehová ma buny traducir la Biblia lad ladni o guidopynacni ló más de 240 diitz, né guiránac buñ labúu gap toib Biblia scásiʼ. ¿Ximod ma gocnéni buñ? Xidalguixo millón de buñ cacacuent «diitz sacró xtuny Gobierno» antes de guidxin fin (Mat. 24:14). Jehová nac toib Dios ni rony xinésni né racladxbu que xidalguixo buñ guimbu láabu né xcalrracné la Biblia. ¿Xí rachiin láabu? Galrronladx ni napbu lóono.
LA BIBLIA RASLOOY XCALRRONLADX DIOS
13. ¿Xigony ranino que la Biblia raslooy xcalrronladx Dios? (Juan 21:25).
13 La Biblia láaca raslooy cualidad ni más rasac ni nap Dios, láani ngú galrronladx (1 Juan 4:8). Por ejemplo, gonyno pensary xi buny mandary Dios nacá ló la Biblia né xi yaca. Raibybu lóono xi láani raquiin gonyno par labúu gacno ximigbu par labúu guibanyno nakit né par guibanyno por tipzó. Jehová ronladxgoluʼ lóono, por ngú diti bidudybu xidal información ni diti raquiinno (bíil Juan 21:25).
14. ¿Xí stoib mod raslooy la Biblia xcalrronladx Dios?
14 Jehová láaca raslooy galrronladx lóono órni rayopybu mod raninébu lóono. Diti bicaʼbu ló la Biblia guiráxadit cós ni labúu gonyno né ni diti labúu gonyno. Xalagary ngú, raquiimbu historias xtuny buñ ni bibany ló dzú ni see, profecías né consej ni labúu gacné lóono par ganno xi láani gonyno. Modreʼ rachiin la Biblia gonladxno Dios né guisobno láabu né guidopy xcalnabanyno.
¿Xigony racnéni lóono gonyno pensary mod godabioo Jehová xpiin ló dzú ni see? (Bibiʼ párrafo 15).
15. a) ¿Ximod raslooy la Biblia que rasacgoluʼno par Jehová? b) ¿Ló xí historias cayony pensary toib nidxigonaʼyen, toib hermano mbioxhlas né toib hermana buñgol ni sieed ló retrat? (Gén. 39:1, 10-12; 2 Rey. 5:1-3; Luc. 2:25-38).
15 La Biblia raslooy lóono que rasacgoluʼno par Jehová. Nanno láani portín ló Xtiitzbu sieed historias ni raslooy ximod rasac buñgudxlio. Labúu tzoʼno xalagary buñ ni ritlaa ló la Biblia portín gosacyibu «xomodca rasacno» (Sant. 5:17). Né ni más rasac, órni rasuidyno ximod godabiobu buñ ni nac xomodca lóono rientzaayno que «Jehová ragobiobu buñ né napbu galrronladx» (Sant. 5:11).
16. ¿Xí rasuidyno de Jehová ló historias de buñ ni buny galkié? (Isaías 55:7).
16 Ló la Biblia radzelno stoib mod ni raslooy Jehová galrronladx lóono. La Biblia raiby lóono que Dios diti sasiambu lóono órni ronyno toib galkié. Israelitas guirási ór bichéyibu nisló Jehová, per órni góc arrepentiryibu né guidopynac xcalnabanyibu Jehová bitudy láani scásiʼ (bíil Isaías 55:7). Cristianos ni bibany ló siglo primero láaca gonyibu balaati binladx Jehová layibu. Por ejemplo, Jehová golonés apóstol Pablo par ñony animarbu herman ni goyoʼ ló xtzúbu par ñony perdonaryibu né ñacnéyibu toib buñguieeu ni góc arrepentir después ni biabbu ló galyoxh (1 Cor. 5:1-5; 2 Cor. 2:6, 7). Radziguiaʼno ni nanno que Jehová diti goleʼbu tiplad xpiimbu ni buny galkié. Xalagary ngú, bislooybu galrronladx, gocnébu, buny corregirbu né gonabbu biinreʼ nabiguet ronoʼbu. Né ló naareʼ láaca radudybu xtiitzbu que buñ ni rony toib galkié né rac arrepentir labúu guibiguet ronoʼbu (Sant. 4:8-10).
LA BIBLIA NAC TOIB GALRRASCAD NI RASAC
17. ¿Xigony rasacgoluʼ la Biblia par lóono?
17 Jehová ma bidudy toib galrrascad sacróyen lóono. ¿Xigony rasacgoluʼ Xtiitzbu? Xomod ma bisuidyno, la Biblia rasuidy lóono que Jehová nacbu toib Dios ni rony xinésni, napbu sabiduría né ronladxgoluʼbu lóono. Láaca, libro reʼ raslooyni que Jehová racladx guimbuno láabu né gacno ximigbu.
18. ¿Ximod raslooyno que radudyno guixquix por la Biblia?
18 Diti guibixladxno Xtiitz Dios. Nacni toibtica «galrrascad ni natzaay» ni ma bidudy Jehová lóono (Sant. 1:17). Por ngú guirá ór guidudyno guixquix láabu por galrrascad reʼ. Raslooyno que radudyno guixquix por láani órni ronyno oración né después rolno la Biblia né ronyno pensary loni. Napno confianz que ni biscad la Biblia lóono sasiabbu galnasác ló xtem ni ronyno né sadzelno «xcalnan Dios» (Prov. 2:5).
CANCIÓN 98 Las Escrituras están inspiradas por Dios
a La Biblia racné lóono guibigaxno Jehová. ¿Xí rasuidy libro reʼ lóono de sabiduría, justicia né xcalnadxiʼ Dios? Ni guisuidyno sacnéni lóono guisac Xtiitz Dios más par lóono né guibiʼno láani xomod toib galrrascad xtuny Bixiosno ni noʼ guibá.