¿Ximod raslooyno galrronladx né galnadxiʼ buñ ni ma buny toib galkié rodann?

1. Órni toib buñ rony toib galkié rodann, ¿xí láani labúu gac?

LÓ ARTÍCULO ni ma bisuidyno, bibiʼno xi láani góoch apóstol Pablo congregación ni goyoʼ gudx Corinto ximod ñony reglaryibu galkié rodann ni buny toib buñguieeu. Diti góc arrepentirbu, por ngú goleʼyibu buñguieeu reʼ lainy congregación. Ná scú, mod ná texto temático, toib buñ ni ma buny toib galkié rodann labúu sac arrepentirbu (Rom. 2:4). ¿Ximod raquiin Jehová guirá ancianos par gacnéyibu ni ma buny toib galkié rodann par gac arrepentir?

2, 3. ¿Xí láani non gonyno pal ranno que toibtica herman ma buny toib galkié rodann, né xigony?

² Gonyno pensary que toibtica xhermanno ma buny toib galkié rodann, bunybu toib cós ni labúu gony que guireʼbu lainy congregación. ¿Xí láani ñonyno órcu? Par labúu gacné ancianos láabu, primer non ganyibu xi láani bunybu. Por ngú non gony animarno láabu par gaibybu láani ancianos par guicaʼbu galrracné (Is. 1:18; Hech. 20:28; 1 Ped. 5:2).

³ Per, ¿xí láani labúu gac pal diti nábu gaibybu láani ancianos? Nainy lóono guicaʼbu galrracné, por ngú lóono ñoʼno naninéno layibu. Modcu caslooyno galnadxiʼ, portín diti nainy lóono guisnitno xhermanno. Pal diti ratzaʼbu, ma diti labúu sadzaktzaybu Jehová né láaca sony buidybu laa congregación. Por ngú, ná sasacnaganno gonyno láani, non gapno balory guininéno ancianos por galnadxiʼ ni napno Jehová né xhermanno (Sal. 27:14).

XIMOD RACNÉ ANCIANOS GUIRÁ NI MA BUNY TOIB GALKIÉ RODANN

4. ¿Xigony radop ancianos né toib ni ma buny toib galkié rodann?

⁴ Órni toib xhermanno rony toib galkié rodann, ancianos rabúyibu tzón ancianos par gonyibu toib comitéa par guidop né herman reʼ. Non gacyibu modestos né buñdxo, né non coʼyibu guicyibu que ná gonyibu dada rutirigaʼlni layibu diti sony lafuersbu buñreʼ par guitzaʼ (Deut. 30:19). Rienyibu que guirá ni ma buny galkié diti toibsi midid racacuentyibu galrracné mod buny rey David láani (2 Sam. 12:13). Noʼyibu diti ragoʼyibu cuent xconsej Jehová (Gén. 4:6-8). Ná scú, ancianos ronyibu rutirigaʼlni layibu par gacnéyibu ni bunyca galkié par gac arrepentir. ¿Xí principios ragonés comité de ancianos órni radopyibu né ni bunyca galkié?

5. ¿Xí consej non guisetnaladx ancianos órni radopyibu né ni bunyca galkié rodann? (2 Timoteo 2:24-26; láaca bibiʼ dibuj).

⁵ Ancianos rabiʼyibu ni bunyca galkié rodann xomod toib xilieen xtuny Jehová ni nigolú rasac né ni ma binit (Luc. 15:4, 6). Né raslooyibu láani por mod ronyibu, né mod raniʼyibu né buñcu órni radopyibu. Diti racyibu buñ nachóng, láaca diti rabiʼyibu reunióncu xomod toib requisito o par guiegsi laani. Xalagary ngú, raslooyibu cualidades ni ritlaa ló 2 Timoteo 2:24-26 (bíil láani). Guirá ór ronyibu por gacyibu buñtzayxat, buñdzuu, buñ paseins par labúu guidxinyibu lainy xcalnabany buñcu.

6. ¿Ximod ragoʼ ancianos puext xcalnabany antes de guidopbu né ni bunyca galkié? (Romanos 2:4).

⁶ Ancianos ragoʼyibu puext xcalnabanyibu. Ragoʼyibu ló xpensaryibu diitz ni goniʼ Pablo: «Por xcalrronladxbu cayopybu mod gac arrepentirlo» (bíil Romanos 2:4). Por ngú ronyibu rutirigaʼlni layibu por guislooyibu galnadxiʼ ni raslooy Jehová né guirá buñ ni ma buny toib galkié rodann. Non guisetnaladxyibu que nacyibu pastores né non guisobyibu instrucción né mod buny Cristo (Is. 11:3, 4; Mat. 18:18-20). Antes de guidopyibu né ni bunyca galkié la, comité cu raninébu Jehová, par gacné layibu gacnéyibu buñ ni bunyca galkié par guidxin gac arrepentir. Rayopyibu información ló la Biblia né ló stipnés publicaciones xtunyno, né láaca ranabyibu Jehová par labúu guiduʼdy galnaní layibu guienyibu ximod rasac buñ ni bunyca galkié né ximodpa gocni. Rooyibu xtiitzni par ganyibu xigony biab buñcu ló galkié, ximod ronybu pensary né ximod rony buñcu (Prov. 20:5).

7, 8. ¿Ximod labúu guisuʼ ancianos paseins ni nap Jehová órni guidopbu né ni bunyca galkié?

⁷ Ancianos rasuʼyibu xpaseins Jehová. Rasetnaladxyibu ximod buny Jehová né tipnés buñ ni bibany ló dzú ni see ni biab ló toib galkié rodann. Por ejemplo gopbu paseins Caín, órni gochbu Caín que labúu nacacuentbu Caín stoib, per láaca gochbu Caín xi nasaclobu pal diti natzaʼbu mod nacbu (Gén. 4:6, 7). Stoib ór, par ñony corregirbu rey David, Jehová bixelbu profeta Natán, né biquiimbu toib ejemplo par labúu nadxiimbu lainy xcalnabany David (2 Sam. 12:1-7). Jehová láaca bixel profetas xtuny «xidal buelt» ronoʼ gudx Israel ni góc nayaʼ (Jer. 7:24, 25). Diti golésbu que primer ñac arrepentir xpiimbu par ñacnébu, xalagary ngú, gonabbu xpiimbu ñac arrepentir ná cayonysayibu toib galkié.

⁸ ¿Xí rony guirá ancianos par guisuʼyibu Jehová órni racnéyibu toib buñ ni ma buny toib galkié rodann? Mod ná 2 Timoteo 4:2, nigolú raquiin gapyibu «xiroʼ paseins». Né diti nimaca guitzuitzyibu, non guiniʼyibu sacró par labúu guichiinyibu ni bunyca galkié gony xinésni. Pal guirá ancianos nadzuitzyibu la, labúu ñonyibu que ni bunyca galkié ma diti nacadiag o ñonyibu que ma diti nasaguelbu ñac arrepentirbu.

9, 10. ¿Xí labúu gony ancianos par gacnébu toib herman ni ma buny toib galkié rodann?

⁹ Ancianos rayopyibu xi láani goyné hermano reʼ par biab ló toib galkié. Por ejemplo, ¿bisiambu de nasuidybu la Biblia o ñony predicarbu la? ¿Bisiambu de ñonybu oración la? ¿Biduʼdybu lagary que tipnés cós mal ñacxiroʼni lainy xcalnabanybu la? ¿Bidzakbu tipnés buñ ni diti nac herman o bibiʼbu tipnés cós ni diti non guibiʼno la? ¿Raduʼdybu cuent que ni bunybu rasioʼobni Bixiosno Jehová la?

¹⁰ Ancianos sony tipnés galrranabdiitz láabu, per sin guinabdiitzyibu cós ni diti rac fuers ganyibu. Órni racyibu buñtzay sacnéyibu ni bunyca galkié par guisetbu ximodpa gocni, né guiduʼdybu cuent xi láani goyné que ñabbu ló galkiécu (Prov. 20:5). Xomod buny Natán né David, labúu guiquimbu tipnés ejemplos par gacnébu hermanocu né guibiʼbu xigony ni bunybu mal láani nisló Jehová. Láaca labúu gacni que ló primer reunión ni gapyibu, hermanocu guisac maláybu né guidopy xcalnabanybu ni biabbu ló toib galkié, o dada labúu gac arrepentirbu.

11. ¿Ximod buny Jesús né buñ galkié?

¹¹ Ancianos ronyibu rutirigaʼlni layibu par guisuʼyibu Jesús. Por ejemplo, gonabdiitzbu Saulo de Tarso: «Saulo, Saulo, ¿xigony cacanalo naʼ?». Bunybu galrranabdiitz reʼ par ñacnébu Saulo naduʼdy cuent que ni cayonybu mal láani (Hech. 9:3-6). Né ló Apocalipsis 2:20, 21 raniʼni de toib buñgonaʼ ni góc laa «Jezabel» né goniʼbu: «Biduʼdi tiemp láabu par ñac arrepentirbu».

12, 13. ¿Xí labúu gony ancianos par guiduʼdyibu tiemp ni bunyca galkié gac arrepentir? (Láaca bibiʼ retrat).

¹² Xomodca buny Jesús, ancianos diti nimaca ronyibu pensary que buñcu diti ná gac arrepentir. Tipnésyibu nimaca rac arrepentir ló primer reunión ni rac né comité, per stipnés labúu guiquiinyibu más tiemp. Por ngú ancianos labúu guidopyibu né ni bunyca galkié más de tibuelt. Pentzi ló primer reunión ni gapbu gonybu pensary ló guirá ni góoch ancianos láabu né ngú guichiin láabu guinabbu xcalrracné Jehová ló oración (Sal. 32:5; 38:18). Pentzi ló ni rarop buelt ni gapyibu reunión ma labúu guitzaʼbu mod bunybu pensary.

¹³ Par gacnébu ni bunyca galkié gac arrepentir, ancianos non tzoʼyibu xalagary ni bunyca galkié né gacbu buñ tzaay. Ranabyibu lóo Jehová guisiab xcalnasác ló guirá ni cayonyibu, né rabésyibu que ni bunyca galkié coʼ xcalrrien né gac arrepentir (2 Tim. 2:25, 26).

14. Órni ni bunyca galkié rac arrepentir, ¿chú láabu rony láani, né xigony?

¹⁴ Pal ni bunyca galkié rodann rac arrepentirbu la, nacni toib mod par tzoʼ nakityibu (Luc. 15:7, 10). Per, ¿chú láabu buny láani? ¿Ancianos la? Guisetnaladxno que Pablo goniʼ «pentzi Dios guidudy oportunida guitzáyibu mod nacyibu» (2 Tim. 2:25). Por ngú, ni buny que ni bunyca galkié natzaʼbu mod ronybu pensary né natzaʼbu mod ronybu diti gocni por xcalrracné buñgudxlio, gocni por Jehová, láabu racnébu toib buñ par guibiguet ronoʼbu stoib. Nigoreʼ, Pablo rasetlabu tipnés cós ni ritné órni buñ rac arrepentir: rinéni ni bunyca galkié par guimbubu más galnigolú, racnéni láabu coʼbu xcalrriembu né modreʼ diti labúu siabbu ló xtramp Buñdzab (2 Tim. 2:26).

15. ¿Ximod labúu gacné ancianos toib buñ ni buny galkié né ma góc arrepentir?

¹⁵ Pal ni bunyca galkié rac arrepentir, ancianos siee siguen ni bunyca galkié par gacnébu gac dxich fe xtunybu, diti guiabbu ló tentación xtuny Buñdzab né saabu sacró ló xinés Jehová (Heb. 12:12, 13). Ancianos diti saibyibu stipnés xi láani buny hermano reʼ. Per, ¿xí láani non gan congregación?

«BUNY CENSURAR NISLÓ GUIRÁ NI NOʼ NÉ LOOY»

16. ¿De chú layibu goniʼ Pablo ló 1 Timoteo 5:20 órni goniʼbu «ni noʼ né looy»?

¹⁶ (Bíil 1 Timoteo 5:20). Pablo láaca gochbu Timoteo ñony censurarbu guirá ni bunyca galkié «nisló guirá ni noʼ» né láabu. ¿Chú layibu raduʼdyni diitz? Diti guidopyca congregación, nosi tipnés herman ni ma nan xi galkié buny ni bunyca galkié, ná gonyibu láani portín bibiʼyibu ni cayonybu la, o portín ni bunyca galkié góoch láani layibu. Ancianos nalanga gaibyibu guirá herman reʼ que ma góc reglar galkiécu, né ni bunyca galkié ma góc arrepentir.

17. Pal ma nan congregación de galkiécu o labúu gan congregación láani, ¿xí anunys sioʼ, né xigony?

¹⁷ Rioʼ ór congregación nan xi galkié góc o sigory sanyibu láani. Órcu «guirá ni noʼ» sacyibu guidopy congregación. Órcu toib anciano satudy anunys cu ló reunión que toib hermano o hermana ma góc censurar. ¿Xigony? Pablo golexa: «Par diti gony stipnés láani» né diti gonybu toib galkié rodann.

18. ¿Xí rony ancianos órni toib mbiox ni ma goyonis rony toib galkié rodann? (Láaca bibiʼ retrat).

¹⁸ ¿Pal herman ni ronyca galkié rodanncu diti ma napbu 18 íz ga? Ancianos sabúyibu chop ancianos par guidop né mbioxcu né bixiosbu né xinaʼbu ni nac Testigos.b Chop ancianos reʼ sabiʼ xi láani ma buny bixios nidxicu par gacnébu xiimbu guitzaʼ mod nac né gac arrepentir. Pal nidxicu napbu toib mod tzaay né cacacuentbu xcalrracné bixiosbu la, guiropca ancianoscu labúu guiniʼyibu que diti non gac toib comité ni guidop né layibu. Portín Dios ma biduʼdybu responsabilidadcu bixios mbiox de conésbu xiimbu né galrronladx (Deut. 6:6, 7; Prov. 6:20; 22:6; Efes. 6:2-4). Ancianos non guininéyibu bixios mbioxcu par guibiʼbu ximod cacacuentbu galrracné ni caquiimbu. ¿Xí rac pal mbioxcu diti rac arrepentir né diti nábu guitzaʼbu? Órcu toib comité de ancianos sadop né láabu né bixiosbu né xinaʼbu ni nac Testigos.

«JEHOVÁ RAGOBIOBU BUÑ NÉ NAPBU GALRRONLADX»

19. ¿Ximod rasuʼ guirá ancianos Jehová órni radopyibu né buñ ni buny toib galkié rodann?

¹⁹ Ancianos ni rioʼ ló comités de clas reʼ ronyibu rutirigaʼlni layibu par labúu gac nayaa congregación portín ndeʼ nac toib responsabilidad ni ma biduʼdy Jehová layibu (1 Cor. 5:7). Per, láaca ronyibu rutirigaʼlni layibu par gacnébu ni bunyca galkié par gac arrepentirbu, por ngú ronyibu por coʼyibu ló xpensaryibu que ni bunyca galkié labúu sadxin guibiguet ronoʼ Jehová stoib. Modreʼ rasuʼyibu Jehová, ni ragobioo buñ né nap galrronladx (Sant. 5:11). Guibiʼno ló diitz ni bicaʼ apóstol Juan dzú ni ma nacbu buñgolien: «Xiinienna ni ronladxi, racaʼya guirá ndeʼ par diti gonyto toib galkié rodann. Per, pal toibticato rony toib galkié, napno toib ni labúu gacné ni noʼ cueʼ Bixiosno: Jesucristo, láabu ronybu xinésni» (1 Juan 2:1).

20. ¿Xí láani guisuidyno ló último artículo de serie reʼ?

²⁰ Rioʼ ór toib herman ni buny toib galkié rodann diti nábu gac arrepentirbu. Pal rac ngú, raquiin guireʼbu lainy congregación. ¿Ximod rony reglar ancianos de clas galnagan reʼ? Guibiʼno láani ló último artículo de serie reʼ.