¿Ximod labúu guiguaʼno sacró ná noʼ guerr né galrradíil?
Gary, ni nírcu góc soldad, ná: «Antes ni nasuʼdi la Biblia, diti labúu bienna xigony nogoluʼ galnagan, cós mal né xigony diti rony buñ xinésni né saʼ. Per nigoreʼ ma rasaca sacró, né naana que Jehová sony que buñ guiguaʼ sacró».
Diti nosi Gary rasac modcu. Guibiʼno ximod ma gocné la Biblia stipnés buñ.
NI NÁ LA BIBLIA: «Looy, Jehová, natzaaylo né puext noʼlo par guitudylo galkié scásiʼ» (Salmo 86:5).
MOD RACNÉNI LÓONO: Wilmar, de gudx Colombia ná: «Diitzreʼ rasialdóni naʼ portín rasuidyni naʼ que Jehová nap xiroʼ galrronladx. Naana que nainy láabu guituʼdybu scásiʼ guirá ni buni órni góca soldad órni goyoʼya ló guerr».
NI NÁ LA BIBLIA: «Sasaʼya guibá copy né toib gudxlio copy; né buñ ma diti sasetnaladx cós ni ma godudy nili sadxinni lainy xcalnabanyibu» (Isaías 65:17).
MOD RACNÉNI LÓONO: Zafirah, de gudx Estados Unidos ná: «Nigolú radzubi né napa depresión por guirá ni bibani órni goyoʼya ló galsoldad. Per texto reʼ ronyni que guisetnaladxi que Jehová gony que ma diti gaitydaʼya né sabeʼbu guirá pensary ni rasioʼob naʼ. Diti sácni toib gúch ni ma biaʼis lainy xcalnabani. ¡Toib galrrascad rodann!».
NI NÁ LA BIBLIA: «Ló xtzúbu buñ ni rony xinésni siaal, né buñ sabany goxt dada órni ma diti noʼ beʼo» (Salmo 72:7).
MOD RACNÉNI LÓONO: Olexandra, de gudx Ucrania ná: «Xidal buelt roni pensary ló diitzcu. Mápa mer galrrioʼob xtuny guerr gacni cós ni ma godudy né diti sioʼno galrrasaʼ por xfamilno».
NI NÁ LA BIBLIA: «Xqueʼetlo sabany […].¡Colcueʼ bacaʼal lóto né colguicaʼ rudx de galrrabaladx, lóoto ni noʼto lainy yoo!» (Isaías 26:19).
MOD RACNÉNI LÓONO: Marie, de gudx Ruanda ná: «Órni goyoʼ ni cuanal né bigaity buñ tutsis, bigaityibu casi guirá xfamila. Per diitzcu racnéni naʼ par gapa confianz que sabiʼya layibu stoib, raniiny naʼ guicadiaga xtiitzyibu órni guiásyibu».
NI NÁ LA BIBLIA: «Stidxosi tiemp, né buñ mal ma diti sioʼ; […]. Per buñ nadaʼa sabany ló gudxlio, né nigolú sioʼ nakityibu né saguaʼyibu goxtiguie» (Salmo 37:10, 11).
MOD RACNÉNI LÓONO: Daler, de gudx Tayikistán ná: «Ná nigoreʼ ma yadi guerr lagary reʼ, rioʼ ór diti rac xinésni né noʼ cós mal. Texto reʼ nigolú raduʼdyni fuers naʼ. Jehová rabiʼ guirá cós ni rac né riembu naʼ. Láabu raduʼdybu xtiitzbu que mápa mer guirá ndeʼ sanitlóni né diti sasetnaladxi láani».
Buñ ni ritlaa ló revista reʼ noʼyibu lad xidal millón de testigos xtuny Jehová ni né xcalrracné la Biblia ma nabany sacró. Nírcu sigory bianladxyibu buñ de stipnés clas, gudx, costumbres o raz, per ma bisuidyibu gonladxyibu guirá clas buñ (Efesios 4:31, 32). Testigos xtuny Jehová rasagaʼ galaydo ló política né diti rioʼdo ló galrradíil (Juan 18:36).
Testigos racnédo saʼdo xomod toib famil ni noʼ ló guidopynac gudxlio (Juan 13:35). Por ejemplo, Olexandra, ni bisetlado nagaa, bixonybu lidxbu né xfamilbu xtol guerr. Láabu nábu: «Órni bidxindo stoib gudxcu, nimaca bibiʼdo testigos xtuny Jehová de gudxcu puextca par guicacuentyibu lóodo. Né xcalrracnéyibu diti gosac nagando ñaʼdo cú xomod buñ ni rasian lidx».
Caruʼdo looy tzeelo reunión, ro guisuidylo ximod labúu tzoʼlo sacró nigoreʼ né ni la Biblia raduʼdy xtiitz guibany buñ sacró ló gudxlio. Goyee ló jw.org né biyopy toib Salón gaxca lagary ro rabéslo o gonab toib ni guisuidy looy ni ná la Biblia scásiʼ. Toib testigo xtuny Jehová sasuidy looy ló libro Bibany goxtiguie.