¿Ximod labúu guibiglo ronoʼ Dios?

1. ¿Racadiag Dios guirá buñ ni raniné láabu la?

Dios raruʼ buñ de guirá clas guininé láabu. (Salmo 65:2) Guisetnaladxno que Dios diti racadiagbu guirá diitz ni raiby buñ láabu. Órni toib buñguieeu raguin né ronynaa tzeʼel ndeʼ rony que órni raninébu Dios, Láabu diti racadiagbu láani. (1 Pedro 3:7) Láaca, órni guirá israelitas bunyibu cós yox, Dios diti gosaguel nacadiag layibu. Scú láani, ni raninéno Dios nigolú rasacni. Per Dios sacadiag buñ ni raniné láabu ná ma bunyibu toib galkié rodann pal ratzáyibu mod nacyibu. Bíil Isaías 1:15; 55:7.

2. ¿Ximod guininéno Dios?

Órni raninéno Jehová nacní toib mod ni rony adorarno láabu, nosi Dios ni Bisaʼ lóono guininéno. (Mateo 4:10; 6:9) Por ni nacno buñ galkié guiquiinno laa Jesús órni guininéno Jehová portín Jesús goity por xcalkiéno. (Juan 14:6) Jehová diti rioladx gaibyno láabu ni ma nánno de memory o golno láani ló toib guiich. Rioladxbu gaibyno láabu ni noʼ lainy xcalnabanyno. Bíil Mateo 6:7; Filipenses 4:6, 7.

Dios ni Bisaʼ lóono racadiagbu órni raninéno láabu nalann. (1 Samuel 1:12, 13) Raruʼbu lóono guininéno láabu guirá ór, órni raraano gueʼel, órni tzagaisyno, órni guáno guet né órni racalóno galnagan. Bíil Salmo 55:22; Mateo 15:36.

3. ¿Xigony radop buñ ni racanal a Jesús?

Par guibigno Dios naganni portín rabésno lad buñ ni diti nap fe lóbu né ronyibu borla que Dios gony Gudxlio reʼ toib lagary móz. (2 Timoteo 3:1, 4; 2 Pedro 3:3, 13) Raquiin gony animarno xhermanno né layibu raquiinyibu de lóono. Bíil Hebreos 10:24, 25.

Ni lóono guidzakno buñ ni nadxi Dios ndeʼ nigolú sacnéni lóono guibigno láabu. Pal radopno né testigos xtuny Jehová fe ni napyibu sacnéni lóono. Bíil Romanos 1:11, 12.

4. ¿Ximod labúu guibigno Dios?

Labúu guibigno ronoʼ Dios pal ronyno pensary ni ma bisuidyno ló xtiitzbu. Guicaano cuidad guirá ni ronybu, litz ni raduidybu né guirá ni raibybu lóono gonybu ló dzú ni sietra. Ni guininéno Dios né gonyno pensary racnéni lóono guienno balaati napbu galnadxi né galnann. Bíil Josué 1:8; Salmo 1:1-3.

Pal napnó confianz né fe lóo Dios, labúu guibigno láabu. Fe nacní xomod toib yac ni raquiin guiseʼ par niʼs. Pal lóono gonyno pensary xigony ronyno crer ni sieed ló la Biblia, ndeʼ sacné lóono guiseʼno fe ni napnó. Bíil Mateo 4:4; Hebreos 11:1, 6.

5. ¿Pal radzakno Dios ximod racnéni lóono?

Jehová randxiʼdotbu buñ ni nadxi láabu. Láabu ranbu lóono de nitisi cós ni labúu gony mal fe xtunyno né ni cabésno guibanyno tipzó ló dzú ni sietra. (Salmo 91:1, 2, 7-10) Raibybu lóono gapnó cuidad diti cuenunysi gonyno par diti guixoʼno né tzonabanno. Jehová rasuidy lóono ximod guibanyno galán. Bíil Salmo 73:27, 28; Santiago 4:4, 8.