¿Cayonylo rutirigaʼlni looy par guiquiinlo galrrasuidy ni raduidy Jehová la?

1. ¿Xí campaña de galrrasuidy cayony Jehová ló naareʼ?

¹ Jehová ni nac toib Mextra, rasac par láabu que buñ ni rony ni nábu non guisuidy par gac toib galán mextra (Is. 30:20). Ló naareʼ láabu cagonésbu toib campaña de galrrasuidy ni diti ma goyoʼ dzú góc. Xomod goniʼ profeta Isaías, xidalguixo buñ ló guidopynac Gudxlio riaʼpyibu «dainy ro sob lidx Jehová» (Is. 2:2). ¿Xigony? Par guicaʼyibu xcalrrasuidy Jehová (Is. 2:3).

2. ¿Ximod ma gocné looy galrrasuidy ni raduidy Jehová?

² Jehová rasuidytzay lóono. ¡Balaati ma gocné galrrasuidy xtuny Jehová lóono! Por guirá galrrasuidy reʼ ma nanno que noʼ laa Dios né que rasacno par láabu (Sal. 83:18; 1 Ped. 5:6, 7). Láaca nantzayno ximod rarexa galrranabdiitz xomod ndeʼ: ¿Xigony radudyno ló galrrioʼob né raityno? ¿Ximod labúu guiguaʼno nigolú nakit? ¿Xigony nabanyno ló Gudxlio? Per diti nosi ngú, Jehová láaca ma bisuidy lóono xí clas buñ non gacno par guirebuʼ guirá ni gonyno (Jos. 1:8).

3. ¿Xí láani ngú scuel ni rioʼ lainy congregación, né xí labúu gonyno par gacnéni lóono?

³ Jehová láaca raduidy galrrasuidy par guirá buñ ni diti roʼoltzay né par ni diti labúu racaʼ. Scuel ni noʼ lainy congregación ma gocnéni a xidalguixo herman né buñ. Pal raquiinni, guirá ancianos non gonyibu scuel reʼ. ¿Xigony rac scuel reʼ? Par guisuidyibu goʼolyibu né guicaʼyibu né modreʼ guisuidyibu la Biblia né láaca par guisuidyibu a stipnés buñ (km-S 10/11 pág. 4; be-S págs. 21-23). Gonyno por guiquiinno xcalrrasuidy Jehová, modreʼ sabanyno ló naareʼ goxtiguie né ló dzú ni sietra labúu sabanyno tipzó (Sal. 119:105; Juan 17:3).