¿Xí guisaclóo guirá religión?

1. ¿Guirá religión rasuidy xinésni la?

Lad guirá religión noʼ buñtzay. Dios rabíbu mod nac guirá buñreʼ né rioʼbu ló galrasaʼ por layibu. Per ni más raduidy nabann ngú que buñ raquiin religión par gony cós yox. (2 Corintios 4:3, 4; 11:13-15) Ló notísy racadiagno que tipnés religión radzakyibu grupos ni rony cós yox, buñ ni ragaity xidalguixo buñ de toib gudx o toib religión, láaca rioʼyibu ló guerr, ronynayibu né raxinyibu mbioxien. ¡Ndeʼ rasioʼobni buñ ni ná guibig ronoʼ Dios! Bíil Mateo 24:3-5, 11, 12.

Laʼga religión ni rasuidy xinésni ronyxiroʼ laa Dios, religión falz rony que Dios guisac mal. Rasuidyibu ni diti sieed ló la Biblia, raniyibu pór galrrascú de Dios né de galgoity. Per Jehová rioladx que buñ guimbutzaay láabu. Bíil Ezequiel 18:4; 1 Timoteo 2:3-5.

2. ¿Xí rasuidy la Biblia guisaclóo guirá religión?

Dios diti rioladx que religión falz ni rony sani cayony xinésni né nadxi xcudxliogox Buñdzab, guiscú láabu. (Santiago 4:4) Xtiitz Dios rabeʼ laa guirá religión falz «Babilonia la Grande.» Después de Guiérodann, goyoʼ toib gudx ni góc laa Babilonia lagarycu gosaló religión falz. Mápa mer, Dios tisintiempsi sanitlóbu guirá religión falz ni rony mal né rascú buñ. Bíil Revelación 17:1, 2, 5, 16, 17; 18:8.

Per noʼ más diitz sacró, Jehová diti ma bialadx buñ ni natzaay xcalnabany ni dxeretz lad guirá religión falz ni noʼ ló guidopynac Gudxlio. Láabu casuidybu guirá buñ xinésni, modreʼ catopbu guirá buñ. Bíil Miqueas 4:2, 5.

3. ¿Xí raquiin gony buñ ni raniiny gony adorar Dios né guidopy xcalnabany?

Jehová rioʼbu ló galrasaʼ por buñ ni ná gony xinésni. Por ngú raibybu guirá buñreʼ guirestzoo lad religión falz. Buñ ni nigolú ná guibig ronoʼ Dios rasian mod nac. Bíil Revelación 18:4.

Ló xtzú Jesús xidal buñ bioladx né gosaguel bicadiag diitz sacró ni sieed de Dios. Layibu bieenyibu ximod guibanyibu sacró par ma diti nac nacsi guibanyibu. Xomod layibu, lóono láaca scúca guisaguelno guicadiagno diitz sacró ni sieed de Dios né coʼno láabu primer lagary. Bíil 1 Tesalonicenses 1:8, 9; 2:13.

Jehová racacuent guirá buñ ni rareʼ lad religión falz né radxiin lainy xcudxbu. Pal rasaguel lo ronylo ni ná Jehová looy sacloʼ ximigbu, né sadxin sacloʼ xhomilo de guirá ni rony ni ná Dios né sabanylo tipzó. Bíil Marcos 10:29, 30; 2 Corintios 6:17, 18.

4. ¿Ximod sony Dios que guirá buñ guibany sacroyen ló Gudxlio?

Guirá religión falz guinitló. Buñgudxlio sareʼ ló guirá galrrioop ni noyibu ló. Religión falz ma diti sascúni né ma diti sagoʼni galnagan lad buñ. Guiránac buñ toibsi sony adoraryibu Jehová, Dios ni rasuidy xinésni. ¿Diti nac ndeʼ diitz sacró ni sieed de Dios la? Bíil Revelación 18:20, 21; 21:3, 4.