Abrahán né Sara bisobyibu Dios

Gahxca gudx Babel goyoʼ toib gudx ni góc laa Ur. Lagarycu diti bieen buñ Jehová, xalagary ngú bienyibu stipnés dioxh falz. Per lainy gudx Ur goyoʼ toib buñguieeu ni bisob ni ná Jehová, góc laabu Abrahán.

Jehová gochbu Abrahán: «Bisian lidxlo né xfamilylo, né goyee gudx ni guislooya looy». Ór cú Dios góoch láabu: «Sadxin saclo toib gudxroʼ, né por looy buñ ni noʼ ló guidopynac Gudxlio sacaʼ galnasác».

Abrahán diti gonbu pu naxel Jehová láabu. Ná scú Abrahán, tzeelbu Sara, bixiosbu Taré, né xiacbu Lot bisobdiitzyibu Dios. Bitopyibu xcósyibu né goyoʼyibu néz né gosaayibu xiroʼ.

Abrahán gop 75 íz órni bidxinbu né xfamilybu lagary ro Jehová bixel layibu. Lagarycu góc laa Canaán. Órni bidxinyibu cú Jehová góoch láabu: «Guidopyca layoo ni rabiʼlo reʼ, sadudi láani ximbioxlo». Per ló dzúcu Abrahán né Sara ma nacyibu buñgol né diti ma noʼ xiinyibu. Por ngú, ¿ximod narebuʼ ni goniʼ Jehová?