LESIONY 2

Goniʼ xomod órni rooy buñ diitz

2 Corintios 2:17

NI RAQUIIN GONYLO: Goniʼ nayaa xomod órni rooy buñ diitz, modreʼ buñ saduidy cuent que nanlo xi caniʼlo né rioʼlo galrrasaʼ por layibu.

Gonab xcalrracné Dios né bisuidytzay xquiichlo. Gonab xcalrracné Jehová par guisuidylo stipnés ni nábu né diti gonyxiroʼlo looyca. Buny pensary xi puntos ni más rareʼ loguiaʼ raquiin cuéxalo. Diti nosi goʼol lo ni sieed ló xquiichlo. Goniʼ láani ló xtiitzcalo.

Pal goʼol lo la Biblia o stoib libro o guiich, nír buny repas láani par diti guichélo. Pal guiich ni cayoʼol lo rasetlani ni ná stoib buñ, bíil láani suusi ñaclo láabu, per diti gonyxiroʼlo ni náni.
Ni guiniʼlo guireʼni lainy xcalnabanylo. Buny pensary xigony buñ raquiin guicadiag xtiitz Dios. Buny pensary ximod rasac buñ. Pal ronylo láani scú, mod rasagaʼlo, mod rasislo ñalo, mod ronylo lólo saduidyni diitz que nigolú rioʼlo galrrasaʼ por layibu né que rasaclo mod rasacyibu.

Órni guiniʼlo non gonylo láani né respet. Goniʼ nayaa né bíil xomodpa sieed ló xquiichlo modcu saslooylo que naplo respet xtiitz Dios.
Bibiʼ lóo buñ ni caninélo. Pal buñ diti radzuitz bibiʼ lóbu. Órni guituidylo discurs xalagary guibiʼlo lóo guirá buñ ni bidop, bibiʼ ló toib buñ de ngú bibiʼ ló stoib.