LESIONY 34

¿Ximod labúu guislooyno Jehová que nadxiʼno láabu?

Ni bireʼ ló guiich

¿Rasaclo que ma más noʼlo gax de Dios ni ma casuidylo la Biblia la? ¿Ñoladxlo nadzaklo láabu más la? Pal scú nacni, bisetnaladx, pal Jehová rabiʼ que nigolú ronladxlo láabu, láaca sonladxbu né sanbu looy más. ¿Ximod labúu guislooylo que nadxiʼlo láabu?

1. ¿Ximod raslooyno Jehová que nadxiʼno láabu?

Órni rasobno láabu, raslooyno xcalnadxiʼno láabu (bíil 1Juan 5:3). Per láabu diti rony lafuersbu ni toib buñ par guisob láabu. Xalagary ngú, radudybu lagary guiráno cuuno pal gonyno láani o yaca. ¿Xigony? Portín Jehová raniiny guisobno né guidopy xcalnabanyno (Romanos 6:17). Ndeʼ radudy diitz guisoblo láabu, per diti gonylo láani lafuers, xalagary ngú gonylo láani por galnadxiʼ. Midid 3 né 4 de libro reʼ goyaʼni par gacnéni looy guislooylo xcalnadxiʼlo Jehová de chop mod: gonylo ni rioladx Jehová, né cueʼlo tiplad ni diti rioladxbu.

2. ¿Xigony rasacnaganno guislooyno que nadxiʼno Jehová?

«Xidal galnagan racaló buñ ni rony xinésni» (Salmo 34:19). Guiráno racalóno ni diti rioladxno de lóocano. Láaca rioʼno galrrasaʼ por bidxiich órni diti rac xinésni né stipnés galnagan. Órni racalóno galnagan sigory rasacnaganno gonyno ni ná Jehová. Diti nagan galsitno de Jehová. Per órni ronylo xtem par gonylo ni ná Jehová, caslooylo que más nadxiʼlo láabu que nitisi cós ni noʼ. Láaca raslooylo que dipa sasianlo láabu né láabu láaca dipa sasiambu looy (bíil Salmo 4:3).

NANOY GUISUIDYNO LÁANI

Guibiʼno xigony rasac guisobno Jehová né xi labúu gacné lóono par diti guisianno láabu.

3. Toib cós ni láaca raguiña looy

Mod ná libro xtuny Job, Buñdzab goniʼ cós mal, per diti nosi de Job, láaca raguiñani guirá buñ ni ná gony xchiin Jehová. Colgoʼol Job 1:1 né 1:6-2:10, né colgooy xtiitzni:

Mod ná Buñdzab, ¿xigony bisob Job a Jehová? (Colguibiʼ Job 1:9-11).
¿Xí cós mal raniʼ Buñdzab de guirá buñ, né láaca raguiñani looy? (Colguibiʼ Job 2:4).

Colgoʼol Job 27:5b né colgooy xtiitzni:

¿Ximod bislooy Job que nigolú gondxiʼbu Jehová?

Buñdzab raniʼ galrrascú de Jehová. Ragoʼbu prueby Job, ni bidza gutz laidy, né a toib y hermana ni rony adorar a Jehová ló naareʼ. — Job diti bisiambu Jehová, modreʼ bislooybu que gondxiʼbu Jehová.

Órni diti rasianno Jehová, raslooyno que nadxiʼno láabu.

4. Goló nakit xcalnabany Jehová

Colgoʼol Proverbios 27:11 né colgooy xtiitzni:

¿Ximod rasac Jehová órni rasoblo láabu né ragoʼlo guiclo gonylo xinésni? ¿Xigony?

5. Looy labúu guisoblo Jehová

Galnadxiʼ ni napno Jehová rachiinni lóono guininéno stipnés de láabu. Né guisobno láabu ná rioʼ ór rasacnaganno gonyno láani. Colguibiʼ VIDEO reʼ né colgooy xtiitzni:

VIDEO: Buny defender ni ronylo crer ná racaló buñ looy (5:09)

¿Rasacnaganlo guininélo buñ de Jehová la?
Mod bibiʼno ló video, ¿xí láani gocné Grayson par ma diti bidzuibybu?

Órni nadxiʼno ni nadxiʼ Jehová né rianladxno ni rianladxbu diti rasacnaganno gonyno ni nábu. Colgoʼol Salmo 97:10 né colgooy xtiitzni:

Buny pensary ni ma bisuidylo, ¿xí cós ronladx Jehová? ¿Né xí cós rianladxbu?
¿Ximod labúu gonladxlo cós tzaay né guianladxlo cós mal?

6. Órni rasobno Jehová racnéni lóono

Órni rasobno Jehová guirá ór rieeni lóono galán. Colgoʼol Isaías 48:17, 18 né colgooy xtiitzni:

¿Nálo que nan Jehová xí láani ngú más galán par lóono la? ¿Xigony ronylo pensary modreʼ?
¿Dada nigoreʼ ximod cayacnéni looy ni casuidylo la Biblia né ni cayimbulo Jehová, Dios ni nigolú?

TIPNÉS BUÑ NÁ: «Guirá ni roni, ¿labúu coʼ nakitni xcalnabany Dios la?».