LESIONY 47
¿Ma noʼlo puext par tzonislo la?
Por guirá ni ma bisuidylo ló la Biblia, ma bisuidylo xidal cós de Jehová. Láaca sigory ma bitzaʼlo mod nabanylo par labúu guisoblo guirá ni ma bisuidylo. Per sigory noʼ tipnés cós ni cacaa lólo par gac dedicarlo Jehová né tzonislo. Ló lesiony reʼ rasetlaa xidal galnagan ni cualó xidal buñ antes de ñonis né xi labúu gonylo par tzonislo.
1. ¿Balaati non ganlo de la Biblia antes de tzonislo?
Par labúu tzonislo non «guimbutzaaylo galnigolú» (1 Timoteo 2:4). Ndeʼ diti radudy diitz que antes de tzonislo non ganlo ximod rarexa guirá galrranabdiitz ni gony buñ looy de la Biblia. Dada cristianos ni ma xidzú íz de goló goyonis raquiinrayibu guisuidyibu más (Colosenses 1:9, 10). Per noʼ ni non guienlo: xcalrrasuidy la Biblia ni diti tampa nagan. Ancianos ni noʼ lainy congregación sacnéyibu looy par guienlo pal rimbutzaaylo ni sieed ló la Biblia.
2. ¿Xí raquiin gonylo antes de tzonislo?
La Biblia ná: «Colgac arrepentir né colguibiguet ronoʼ Dios» (bíil Hechos 3:19). Né ndeʼ non gonylo antes de tzonislo. Per ¿xí radudyni diitz? Radudyni diitz que rasac nabannlo por nitisi galkié ni bunylo né ranablo Jehová guitudy láani scásiʼ. Láaca radudyni diitz que cueʼlo tiplad nitisi cós mal ni ma bunylo né ma goloʼlo guiclo guibanylo mod ná Dios. Láaca radudyni diitz que ma naclo de toib congregación, ma rieelo guirá reunión né ma raniʼlo xtiitz Dios xomod toib publicador ni yása tzonis.
3. ¿Xigony diti non guidudylo lagary que galrradzuiby guicaa looy par diti tzonislo?
Tipnés buñ radzuiby guiché né diti labúu gony cumplir né ni ma gochbu Jehová. Scú láani, sioʼ ór sachélo xomod gosaclóo tipnés buñguieeu né buñgonaʼ ni rasetlaa la Biblia ni dipa bisian a Jehová. Per bisetnaladx que Jehová dipa ranab que xpiimbu guiaʼan guiché (bíil Salmo 103:13, 14). Jehová sabaladx pal ronylo rutirigaʼlni looy. Láaca sacnébu looy. La Biblia ná que diti noʼ chú «labúu cuestzoo lóono de xcalnadxiʼ Dios» (bíil Romanos 8:38, 39).
NANOY GUISUIDYNO LÁANI
Ganno chop cós ni labúu gacné looy par labúu guicalólo nitisi galnagan ni cacaa looy par tzonislo: guimbutzaaylo Jehová né guicacuentlo xcalrracnébu.
4. Bimbutzaay a Jehová
¿Dada xí midid guimbulo a Jehová antes de tzonislo? Non guimbutzaaylo Jehová par labúu gandxiʼlo láabu né guisoblo ni nábu. Colguibiʼ VIDEO reʼ par ganlo xi láani buny buñ ni casuidy la Biblia ni noʼ ló guidopynac Gudxlio. De ngú colgooy xtiitzni:
Mod bibiʼno ló video, ¿xí láani gocné a tipnés estudiantes par labúu goyonisyibu?
Colgoʼol Romanos 12:2 né colgooy xtiitzni:
¿Ronylo crer guirá ni rasuidy la Biblia la? ¿Ronylo crer que testigos xtuny Jehová rasuidyibu galnigolú la?
Pal diti raluladxlo, ¿xí láani labúu gonylo?
5. Goleʼ tiplad nitisi galnagan ni guicalólo
Guiráno racalóno galnagan órni ma raibyno gac dedicarno Jehová né tzonisno. Par guienlo láani, colguibiʼ VIDEO reʼ. De ngú colgooy xtiitzni:
¿Xí galnagan labúu cualó Narangerel par labúu bunybu xchiin Jehová?
¿Ximod galnadxiʼ ni gopbu Jehová gocnéni láabu par cualóbu galnagan?
Colgoʼol Proverbios 29:25 né 2 Timoteo 1:7, né colgooy xtiitzni:
¿Púti rabeʼno balory par labúu guicalóno nitisi galnagan?
6. Gop confianz que Jehová sacné looy
Jehová sacné looy par gonylo ni ranabbu. Colguibiʼ VIDEO reʼ né colgooy xtiitzni:
¿Xigony estudiante ni bibiʼno ló video reʼ bidzuiby ñonis?
¿Xí láani gocné láabu ñapbu más confianz lóo Jehová?
Colgoʼol Isaías 41:10, 13 né colgooy xtiitzni:
¿Xigony naplo confianz que labúu sony cumplirlo né ni ma gochlo Jehová?
7. Bidudy guixquix por xcalnadxiʼ Jehová
Órni más ronylo pensary balaati ronladx Jehová looy, más sadudylo guixquix láabu né saniiny looy gonylo ni nábu por tipzó. Colgoʼol Salmo 40:5 né colgooy xtiitzni:
¿Xí galrrascad xtuny Jehová rasac más par looy?
Profeta Jeremías gondxiʼbu Jehová né guirá ni goniʼ Jehová, né nigolú gosac par láabu ni goynébu laa Dios. Láabu goniʼbu: «Xtiitzlo gocni galrrabaladx né xcalnabani goyoʼ nakitni, portín naʼ sanéya laalo Jehová Dios» (Jeremías 15:16). Nigoreʼ cuapy tipnés galrranabdiitz reʼ:
¿Xigony nacni toib privilegio gac buñ testigo xtuny Jehová?
¿Nainy looy tzonislo par gaclo testigo xtuny Jehová la?
¿Noʼ ni cacaa looy la?
¿Xí láani labúu gonylo par tzonislo?
TIPNÉS BUÑ NÁ: «Radzubi guichéya né diti labúu gony cumplir ni ranab Dios de toib Testigo ni ma goyonis».
¿Scá rasaclo la?
¿XÍ BISUIDYLO?
Né xcalrracné Jehová looy labúu guicalólo nitisi galnagan ni cacaa looy par tzonislo.
Repas
¿Balaati non ganlo de la Biblia par tzonislo?
¿Xí láani non gonylo antes de tzonislo?
¿Xigony diti non guidudylo lagary que galrradzuiby guicaa looy par tzonislo?
PAR GANLO MÁS
Bisuidy xigony non tzonislo.
«¿Ma noʼlo puext par tzonislo la?» (Guiich ni caniʼ, marz íz 2020)
Gon xi labúu gonylo par tzonislo ná cacalólo galnagan.
«¿Xí láani cacaa naʼ par tzonisa?» (Guiich ni caniʼ, marz íz 2019)
Bibiʼ xi láani buny toib buñguieeu par labúu goyonisbu ná cualóbu galnagandaʼ.
Toib buñguieeu ni laa Ataa diti goniiny labúu ñonisbu. Gon xi láani gocné láabu par labúu goyonisbu.