Ikilasi Le-126 Lithweswa Iziqu ZaseGileyadi
Indlela Yokuba Isithunywa Sevangeli Esiphumelelayo
IZINDIMBANE zabantu abajabule zazihlangene esenzakalweni esikhethekile e-Watchtower Educational Center, ePatterson, eNew York. NgoMgqibelo, ngomhla ka-14 March 2009, ikilasi le-126 le-Watchtower Bible School of Gilead lathweswa iziqu. Abafundi base bezothunyelwa emazweni angu-22 ukuze bayoshumayela izindaba ezinhle zoMbuso kaNkulunkulu.—Mathewu 24:14.
Laba bafundi babesanda kuqeda izinyanga ezinhlanu zokufunda okunzulu. Imfundo abayithola yayigxile eBhayibhelini futhi iklanyelwe ukubasiza ukuba babe izithunywa zevangeli ezingamaKristu eziphumelelayo. Lolu suku lokuthweswa iziqu lwabanikeza ithuba lokugcina lokuzwa izeluleko ezihlakaniphile zendlela yokufinyelela lowo mgomo.
U-Anthony Morris, oyilungu leNdikimba Ebusayo YoFakazi BakaJehova, nowayengusihlalo wesimiso walandisa ukuthi iSikole SaseGileyadi saqala ukuqeqesha izithunywa zevangeli ngo-1943. Kusukela ngaleso sikhathi, abathweswe iziqu baye baba neqhaza elikhulu emsebenzini wokushumayela owenziwa emhlabeni wonke.
Isikhulumi sabonisa ukuthi nakuba ababhali nabaFarisi babebabukela phansi abaphostoli bakaJesu futhi bebabheka njengabantu ‘abangafundile nabangazi lutho,’ labo baphikisi kwadingeka bavume ukuthi ikhono labaphostoli lokukhuluma balithola ngokuhamba noJesu. (IzEnzo 4:13, King James Version) Ukuqeqeshwa laba bafundi abakuthola kubasiza ukuba bakwazi ukuba nekhono lokukhuluma.
URobert Ciranko, osiza iKomiti Yokubhala YeNdikimba Ebusayo, wanikeza inkulumo enesihloko esithi, “Ningabheki Ubuso Babantu.” Wathi abafundi bazohlangana nabantu abanamasiko nezinkambiso ezihlukahlukene. Kodwa ukubashumayeza ngeke kube yinkinga uma beba nesimo sengqondo esifana nesikaJehova. Ngokwezwi nezwi, izEnzo 10:34 zithi: “UNkulunkulu akabheki ubuso babantu,” okungukuthi, akakhethi abantu. “UNkulunkulu akabandlululi.” (IzEnzo 10:35) UMfoweth’ uCiranko wathi “ngokuba nesimo sengqondo esifana nesikaNkulunkulu futhi nibheke bonke abantu ensimini yenu njengabasemathubeni okwamukelwa nguNkulunkulu, nakanjani niyoba izithunywa zevangeli eziphumelelayo.”
“Nihlomé Niphelele”
USamuel Herd, oyilungu leNdikimba Ebusayo, waqala inkulumo yakhe ngokuthi, “abanye abantu bathi ikamela libi, kodwa likwazi kahle kakhulu ukuphila ogwadule.” Ngokufanayo, lezi zithunywa zevangeli ezintsha zikuhlomele ukuphumelela ezabelweni zazo zakwamanye amazwe. Zinhlanu izinto ezizozisiza.
1. Uthando ngoJehova. (Mathewu 22:37, 38) Abafundi babonisile kakade ukuthi bazimisele ukukhonza uJehova.
2. Ulwazi abanalo ngeZwi likaNkulunkulu. Ikamela ligcina ukudla elundeni lalo. Noma kunjalo, alizilambisi bese lithembela kulokho okuselundeni. Nezithunywa zevangeli akufanele zithembele kuphela olwazini eziluthole eSikoleni SaseGileyadi, kodwa kufanele ziqhubeke zizondla ngokomoya.
3. Uthando ngabantu. (Mathewu 22:39) Abafundi banozwela ngabantu.
4. Umoya wokuzinikela ngokuzithandela. (IHubo 110:3) Lapho isithunywa sevangeli sizizwa sikhathele futhi sikhandlekile, uJehova uyosinika amandla.—Isaya 40:29.
5. Ubungqabavu bobusha. Njengoba nje ikamela lithwala umuntu linqamule ugwadule, nesithunywa sevangeli kungase kudingeke “sithwale” umKristu onezinkinga ngokomoya. Lokho kudinga amandla amakhulu, kodwa izithunywa zevangeli zinobungqabavu bobusha.
Ezinye Izici Zesimiso
UMichael Burnett, ofundisa eGileyadi, wathi ama-alimondi ayephakathi kwezipho ezinhle kakhulu uJakobe azithumela kumbusi waseGibhithe. (Genesise 43:11) Ama-alimondi mancane, kodwa awukudla okunomsoco. Abafundi baye badla ama-alimondi amaningi angokomfanekiso phakathi nokuqeqeshwa kwabo. Ezinye zezifundo okufanele bazisebenzise uma sebefike ezabelweni zabo, ukubaluleka kokwaneliswa yilokho uJehova abapha khona nokufunda ukuthanda indawo yabo entsha.
UMark Noumair, naye ofundisa eGileyadi, wachaza ukuthi iZwi likaNkulunkulu lifana ‘nesikhwama esigcwele ukuhlakanipha.’ (Jobe 28:18) Kudingeka sisivule, sisebenzise okuphakathi. Uma izithunywa zevangeli zithola ukuthi inkonzo yazo ayikhona lokho ebezikulindele, kungaba kuhle ukucabanga ngomphostoli uPawulu. Abafundi bakaJesu bamthuma ukuba ayoshumayela emzini wakubo cishe iminyaka engu-9. Akazange azitshele ukuthi njengoba ‘ayeyisitsha esikhethiweyo’ kwakufanele ngabe ukhonza kwenye indawo, kunalokho, wasebenza kanzima kungakhathaliseki ukuthi wayethunywaphi. (IzEnzo 9:15, 28-30) Ukuhlonipha lokho okushiwo uJehova kungase kube inselele. UJonathani ungomunye wabantu abenza okufanayo. Lapho eqaphela ukuthi uDavide wayeyinkosi ekhethwe uJehova, wazithoba wamsekela.
Enkulumweni ethi, “Izinceku ZikaNkulunkulu Zikhuluma Ngesibindi,” abafundi balingisa ngokoqobo okuhlangenwe nakho abakuthola emsebenzini wokushumayela phakathi nesikhathi abasichitha eGileyadi. Abaningi babo baqala izifundo zeBhayibheli. Inkulumo eyalandela ethi “Sihlonyiswe Inhlangano KaJehova” yaba nezingxoxo nezithunywa zevangeli ezintathu ezingomakadebona. Ngasinye sachaza indlela esiye saqeqeshwa ngayo ukuba sibambisane nenhlangano kaNkulunkulu.
“Yiba Isithunywa Sevangeli Esijabulayo”
UGerrit Lösch, naye oyilungu leNdikimba Ebusayo, wabe esenikeza inkulumo eyisihluthulelo esimisweni, enesihloko esithi, “Yiba Isithunywa Sevangeli Esijabulayo.” Wathi izinto eziningi abantu abazibheka “njengezijabulisayo” empeleni azilethi injabulo yangempela. (IzAga 14:13; UmShumayeli 2:10, 11) Injabulo ehlala njalo itholakala ngokwenza intando kaNkulunkulu, nakuba lokhu kungelula ngaso sonke isikhathi. Imfundo yaseGileyadi ayibanga lula, kodwa ibalethele ukwaneliseka okukhulu abafundi.
Ziningana izinto ezenza amaKristu eqiniso ajabule. Akhulekela uNkulunkulu ojabulayo. (IHubo 33:12; 1 Thimothewu 1:11) Aphila epharadesi elingokomoya futhi iBhayibheli liwathembisa ukuthi maduzane umhlaba uzoba ipharadesi. Anenjongo yangempela ekuphileni—akhonza futhi adumisa uJehova. Ngaphezu kwalokho, athandwa uJehova noJesu.
Isikhulumi sanezela: “Nizoba izithunywa zevangeli ezijabulayo uma nifunda ukwaneliseka.” Ukuthanda abanye nokuthandwa yibo enye yezinto eziletha injabulo. Ngakho, wambozeni amaphutha abanye kunokuba niwanokondise. Benzeleni izinto ezinhle abanye abantu, nisize ababuthaka futhi nijabulele izinto ezinhle ndawonye. (IHubo 41:1, 2; IzEnzo 20:35) Injabulo itholakala ngokuzikhandla emsebenzini wokushumayela.—Luka 11:28.
UMfoweth’ uLösch waphetha inkulumo yakhe ngala mazwi: “Hambani niye ezabelweni zenu, nibe izithunywa zevangeli ezijabulayo, nizijabulise ngokusesilinganisweni, kodwa nigxile ekudumiseni uNkulunkulu wethu ojabulayo, uJehova, nokwenza abantu abaningi bajabule.”
Ngemva kokudlulisa imikhonzo evela emazweni amaningi, u-Anthony Morris wanikeza abafundi ama-diploma abo. Ngemva kwalokho, omelele ikilasi le-126 wafunda incwadi ababeyibhalele iNdikimba Ebusayo, bebonga ithuba lokuba seSikoleni SaseGileyadi.
Ekuphetheni, usihlalo wathi “amalunga nemisipha” kufana namalungiselelo ‘enceku ethembekileyo neqondayo’ asiza abantu bakaJehova ukuba bondleke futhi bathole iziqondiso. (Kolose 2:18, 19; Mathewu 24:45) Uma abathweswe iziqu zaseGilayadi bebambisana ngokugcwele nabameleli bakaNkulunkulu abamisiwe, bayophumelela ekuyifezeni ngokugcwele inkonzo yabo.—2 Thimothewu 4:5.
[Ibhokisi ekhasini 30]
IMINININGWANE YEKILASI
Inani lamazwe amelelwe: 6
Inani lamazwe ababelwe kuwo: 22
Inani labafundi: 56
Inani lemibhangqwana eshadile: 28
Isilinganiso seminyaka yobudala: 32,8
Isilinganiso seminyaka beseqinisweni: 17,9
Isilinganiso seminyaka besenkonzweni yesikhathi esigcwele: 13,5
AMAZWE ABABELWA KUWO
Abathweswe iziqu babelwa eBenin, eBolivia, eBulgaria, eBurkina Faso, eCameroon, eCosta Rica, eGhana, eGuatemala, eHonduras, eKenya, eLiberia, eMadagascar, eMozambique, eNicaragua, eNingizimu Afrika, ePanama, eParaguay, ePeru, eRomania, eSierra Leone, eTogo nase-Uganda.
[Isithombe ekhasini 31]
Ikilasi Le-126 Elithweswa Iziqu E-Watchtower Bible School of Gilead
Imigqa ibalwa kusukela phambili kuya emuva, futhi amagama ahlelwe ukusuka kwesobunxele kuya kwesokudla emgqeni ngamunye.
(1) Kirchhoff, K.; Nichols, C.; Guzmán, Y.; Coil, H.; Becker, O.; De Simone, A. (2) Manzanares, A.; Bouvier, E.; Peddle, J.; Mason, H.; Braz, J. (3) Lee, J.; Forte, A.; Boucher, T.; Marsh, A.; Leighton, S.; Glover, M. (4) Kambach, H.; Jones, T.; Ferreira, A.; Morales, J.; Chicas, S.; Davis, B.; Dormanen, E. (5) Dormanen, B.; Nichols, J.; Pacho, T.; Titmas, L.; Bouvier, E.; Kirchhoff, A. (6) Leighton, G.; Pacho, A.; Van Campen, B.; Manzanares, A.; Rivard, A.; Lee, Y.; Titmas, L. (7) Boucher, M.; Coil, K.; Marsh, C.; Guzmán, J.; Jones, W.; Kambach, J. (8) Glover, A.; Ferreira, G.; Mason, E.; Forte, D.; Davis, N.; Chicas, O.; Rivard, Y. (9) Braz, D.; Van Campen, D.; Morales, A.; De Simone, M.; Becker, M.; Peddle, D.