IBhayibheli Lishintsha Ukuphila

UMAMA waseRussia ongashadile owayewumlutha wezidakamizwa wakwazi kanjani ukugqashula kulowo mkhuba futhi alungise ubuhlobo bakhe nezingane zakhe? Insizwa yaseKyoto, eJapan, eyayiwusikhotheni yawathola kanjani amandla nesibindi sokunqoba ubuthaka obayiholela ebumpofwini? Yini eyasiza umalusi wase-Australia ukuba ayeke ukudakwa? Woza nendlebe bona beze nendaba.

“Ngafunda ukuthi nginesibopho sokuzinakekela.”—UNELLY BAYMATOVA

UBUDALA: 45

IZWE AZALELWA KULO: IRUSSIA

UMLANDO: WAYEWUMLUTHA WEZIDAKAMIZWA

UKUPHILA KWAMI: Ngakhulela eVladikavkaz, inhloko-dolobha yeRepublic of North Ossetia (manje ebizwa ngokuthi i-Alania). Abazali bami babecebile. Yize sasiphila ntofontofo, ngangingajabule. Ngesikhathi ngihlanganisa iminyaka engu-34, ngase ngidivose kabili. Ngase ngineminyaka eyishumi ngidla izidakamizwa, futhi sengiye kabili esikhungweni sokwelapha le nkinga. Nakuba nganginezingane ezimbili, ngangingenandaba nazo, futhi ngangingezwani nabangane bami nabasekhaya.

Umama wayesengomunye woFakazi BakaJehova, futhi ngangike ngimuzwe ekhala ethandaza kuJehova ecela ukuba angisize. Ngangibona sengathi wayecabanga njengengane ngoba ngangimangala nje ukuthi uJehova angangisiza kanjani. Iqiniso liwukuthi ngangizama ukuyeka izidakamizwa. Kodwa ngangingenawo amandla okugqashula kulo mkhuba. Ngesinye isikhathi, kwadlula izinsuku ezimbili ngingazithintanga izidakamizwa. Ngafisa ukuphuma endlini ngiyoshaywa umoya, ngakho nganquma ukuphuma ngefasitela, kodwa okubuhlungu ukuthi ngangisesitezi esiphezudlwana. Ngaphuka ingalo nomlenze ngalimaza neqolo. Kwaphela inyanga ngiyinto yombhede.

Phakathi naleso sikhathi, umama wanginakekela futhi wangangenza ngizizwe kabi. Wayeqonda ukuthi ngangingakwazi ukulawula imizwelo nengqondo yami. Nokho, wayengishiyela eceleni kombhede amakhophi kamagazini i-Phaphama!a Ngangiwafunda wonke futhi ayenokwaziswa okuthakazelisayo nokuwusizo. Ngabe senginquma ukutadisha iBhayibheli noFakazi.

INDLELA IBHAYIBHELI ELAKUSHINTSHA NGAYO UKUPHILA KWAMI: Enye yezinto engazifundiswa iBhayibheli ukukhula nokuvuthwa engqondweni. Kunokuba ngilindele umama ukuba angondle, ngafunda ukuthi nginesibopho sokuzinakekela nokondla izingane zami. Ngemva kokuzenzela umathanda iminyaka eminingi, kwaba nzima ukujwayela ukusebenza nokuphila ukuphila okuhlelekile.

Iseluleko esikuDuteronomi 6:5-7 naso sangisiza kakhulu. Sitshela abazali ukuba bafundise izingane zabo ngoNkulunkulu. Ngaqaphela ukuthi ngiyolandisa kuye ngendlela engikhulisa ngayo izingane zami ezimbili. Lelo qiniso langishukumisa ukuba ngiqale ukuchitha isikhathi nazo futhi ngifunde ukuzithanda ngendlela okufanele ngizithande ngayo njengomzali.

Ngambonga kakhulu uJehova ngokungivumela ukuba ngifunde iqiniso ngaye. Ngakho, nganikezela ukuphila kwami kuye futhi ngabhapathizwa njengomunye woFakazi BakaJehova.

INDLELA ENGIYE NGAZUZA NGAYO: Ngenxa yokuthi ngafunda ukulawula ulaka, ubuhlobo bami nomama bathuthuka, futhi mina nezingane zami sesizwana kakhulu.

Njengoba sengizizonda izinto ezizondwa uNkulunkulu, angisenazo izinkinga ezazibangelwa indlela engangiphila ngayo. Manje ngithola injabulo enkulu ngokusiza abanye ukuba bafunde iqiniso ngoNkulunkulu wethu onothando, uJehova.

“Ngicabanga ukuthi ngasinda sengilengela egodini.”—UMINORU TAKEDA

UBUDALA: 54

IZWE AZALELWA KULO: IJAPAN

UMLANDO: NGANGIWUSIKHOTHENI

UKUPHILA KWAMI: Ngakhuliswa ubaba nogogo edolobheni laseYamaguchi. Umama angimazi. Lapho ngineminyaka engu-19 ugogo washona futhi ngaqhubeka ngihlala nobaba, ngisebenza njengompheki. Ubaba naye wayesebenza endaweni yokudla. Izikhathi zethu zomsebenzi zazishayisana, ngakho kwakuqabukela sibonana. Ngaqala ukusebenza amahora amaningi nokuphuza nabangane.

Ngokuhamba kwesikhathi, ngezwa umsebenzi wami usungicika. Ngalwa nomqashi wami, futhi ngaqinisa emanzini amponjwana. Ekugcineni, lapho sengizohlanganisa iminyaka engu-30, nganquma ukuhamba ekhaya ngihambe amazwe. Kwathi ngingaphelelwa imali, ngasebenza endaweni yokugembula. Ngathandana nenye intokazi futhi sashada. Kodwa sahlukana ngemva kweminyaka emibili nengxenye.

Ngacindezeleka kakhulu, ngaphelelwa uthando lokuphila futhi ngazithola sengingene shí ezikweletini zababolekisa ngemali. Ngabalekela abaqoqi bezikweletu futhi ngahlala isikhashana nobaba ekhaya, kodwa ngangihlale ngimtshela amanga. Lokho kwasixabanisa kakhulu. Ngantshontsha imali yakhe; ngaphila ngokugembula. Ekugcineni, ngaba uphuya futhi isikhathi esithile ngangilala esiteshini sesitimela. Ngemva kwalokho, ngahlala eHakata, kamuva eHimeji, ekugcineni ngafika edolobheni laseKyoto. Ngahlala emigwaqweni iminyaka emibili.

INDLELA IBHAYIBHELI ELAKUSHINTSHA NGAYO UKUPHILA KWAMI: Ngolunye usuku ngo-1999 ngizihlalele epaki eliseduze koMfula iKamogawa eKyoto, kwafika abesifazane ababili kimi. Omunye wabo wangibuza: “Ungathanda yini ukutadisha iBhayibheli?” Ngavuma. AmaKristu avuthiwe ebandla lendawo loFakazi BakaJehova afunda nami iBhayibheli futhi angisiza ukuba ngibone ukubaluleka kokusebenzisa imithetho yalo. Asikisela ukuba ngizame ukuthola umsebenzi nendawo yokuhlala. Ukuze ngiwajabulise, ngahamba ngayofuna umsebenzi kabili, kodwa ekuqaleni ngangingazimisele ngempela ukuwuthola. Nokho, kamuva ngaqala ukuthandazela usizo, ngazimisela futhi ekugcineni ngawuthola.

Umthandazo wangisiza nalapho ngibhekene nenkinga enzima. Ababolekisi bemali engangibabalekele bangifuna baze bangithola bathi bayifuna la imali yabo. Lokho kwangicindezela kakhulu. Ngolunye usuku ngifunda iBhayibheli, umkhuba engiwenza nsuku zonke, ngathola umBhalo ka-Isaya 41:10 onamazwi kaNkulunkulu ethembisa izinceku zakhe ezithembekile: “Impela ngizokusiza.” Leso sithembiso sanginika amandla nesibindi. Ngasebenza ngokuzikhandla, futhi ekugcineni ngazikhokha zonke izikweletu zami. Ngonyaka ka-2000, ngafaneleka ukubhapathizwa njengomunye woFakazi BakaJehova.

INDLELA ENGIYE NGAZUZA NGAYO: Engakufunda eBhayibhelini kwangishukumisela ukuba ngizame ukulungisa ubuhlobo bami nobaba futhi wangixolela amaphutha ami. Wajabula kakhulu ngokuthi ngase ngiphila ngemithetho yeBhayibheli. Ngicabanga ukuthi ngasinda sengilengela egodini. Ngibonga izimiso zeBhayibheli ngoba zangisiza ukuba ngiphile ukuphila okuhlanzekile.

Manje ngiyasebenza futhi ngiyakwazi ukuzinakekela. (Efesu 4:28; 2 Thesalonika 3:12) Ngiye ngathola nabangane beqiniso ebandleni lobuKristu. (Marku 10:29, 30) Ngimbonga ngokusuka enhliziyweni uJehova ngalokho aye angifundisa khona.

“Kwakungelula ukwenza izinguquko okwakudingeka ngizenze.”—UDAVID HUDSON

UBUDALA: 72

IZWE AZALELWA KULO: I-AUSTRALIA

UMLANDO: WAYEYISIDAKWA

UKUPHILA KWAMI: Igama likababa uWillie, elikamama uLucy futhi mina ngiyingane ye-11 ekhaya. Ekhaya sasihlala e-Aurukun, indawo yaboMdabu base-Australia. I-Aurukun isenyakatho yeQueensland. Igudle umfula omuhle i-Archer futhi iseduze kolwandle. Abazali bethu basifundisa ukuzingela nokudoba ukuze siziphilise. Ngaleso sikhathi, thina aboMdabu base-Australia sasibekelwa uhulumeni enye ingxenye yomholo ngoba kuthiwa asikwazi ukusebenzisa imali, futhi sasingavunyelwe ukuhlala noma kuphi lapho sithanda khona.

Abazali bami benza konke okusemandleni ukungifundisa ubuntu futhi basifundisa sonke thina zingane ukuhlonipha abantu abadala emphakathini nokwabelana ngokuncane esinakho. Ngakho, sasibheka bonke abantu abadala njengabazali bethu.

Ubaba washona ngineminyaka engu-7 futhi sathuthela emishini yaboMdabu base-Australia eseMapoon eqhele ngamakhilomitha angaba ngu-150 enyakatho ye-Aurukun. Lapho ngineminyaka engu-12 ngaqala ukusebenza emapulazini amaningi ngelusa amahhashi nezinkomo ngaze ngayocela eminyakeni engu-50. Ngangiphuza kakhulu, ngihlala ngidakiwe. Lokho kwangibangela izinkinga eziningi.

Ngelinye ilanga ngidakwe ngiyinhlabathi, ngaphuma ehhotela engangiphuza kulo ngashayiswa imoto eyayidla amagalani. Ngahlala iminyaka emibili esibhedlela futhi angibange ngisakwazi ukubuyela emsebenzini wami wokwelusa.

INDLELA IBHAYIBHELI ELAKUSHINTSHA NGAYO UKUPHILA KWAMI: Phakathi naleso sikhathi, owesifazane othile ongumngane wami wangilethela omagazini INqabayokulinda ne-Phaphama! Kodwa ngenxa yokuthi angifundanga ukuyaphi, angikwazanga ukubafunda kahle. Ngolunye usuku kushisa, kwafika ikhehla elineminyaka engu-83 lacela amanzi okuphuza. Langinikeza izincwadi zeBhayibheli futhi lacela ukubuya ukuze lingichazele ezikuqukethe. Saqala ukutadisha iBhayibheli ndawonye njalo. Ngabona ukuthi kwakudingeka ngenze ushintsho ebuntwini nasendleleni engangiphila ngayo ukuze ngijabulise uNkulunkulu.

Kwakungelula ukwenza izinguquko okwakudingeka ngizenze. Kodwa imfundiso kamama yokuhlonipha abantu abadala yangisiza ngoba ngangilihlonipha kakhulu ikhehla elalingifundela iBhayibheli futhi ngangilwazisa usizo lwalo lokuba ngiqonde izinto ezingokomoya. Noma kunjalo, ngangimadolonzima ukunikezela ukuphila kwami kuNkulunkulu. Ngangicabanga ukuthi kufanele ngilazi njengoba ngizazi iBhayibheli.

Indoda ethile engangisebenza nayo yangisiza ukuba ngilungise lokho kucabanga. Nayo yayinguFakazi futhi yangicela ukuba ngifunde isikhuthazo esikweyabaseKolose 1:9, 10. Lelo vesi lithi kudingeka siqhubeke ‘sandisa ulwazi lwethu olunembile ngoNkulunkulu.’ Leyo ndoda yangisiza ukuba ngihlale ngazi ukuthi kunezinto ezintsha engiyohlale ngizifunda nokuthi akufanele ngivumele ulwazi lwami oluncane lungenze nginqikaze ukuzinikezela kuNkulunkulu.

Kwangihlaba umxhwele kakhulu ukuqala ukuhlanganyela noFakazi BakaJehova. Ngabona abantu bezizinda ezihlukahlukene bekhulekela uNkulunkulu ngobunye. Lobo bunye bangikholisa ukuthi ngithole inkolo yeqiniso, ngakho ngo-1985 ngabhapathizwa njengomunye woFakazi BakaJehova.

INDLELA ENGIYE NGAZUZA NGAYO: Indlela engifunda ngayo iye yathuthuka futhi manje ngichitha amahora amaningi masonto onke ngisiza abanye ukuba bafunde futhi batadishe iBhayibheli. Ngaphezu kwalokho, lowaya wesifazane ongumngane owangilethela omagazini INqabayokulinda ne-Phaphama! naye wafundelwa oFakazi, wabhapathizwa futhi manje usengumkami engimthandayo. Ndawonye sijabulela ukusiza aboMdabu base-Australia ukuba bafunde ngoJehova uNkulunkulu.

[Umbhalo waphansi]

[Amazwi acashunwe esihlokweni ekhasini 21]

Mina nomkami sithola injabulo yangempela ekusizeni aboMdabu base-Australia ukuba bafunde ngoNkulunkulu