IBhayibheli Lishintsha Ukuphila
Kwenzeka kanjani ukuba intokazi eyakhula kabuhlungu ithole injongo ekuphileni? Yini eyashukumisela umvukeli wezombusazwe onobudlova ukuba abe umshumayeli wezindaba ezinhle? Funda lokhu kulandisa ukuze uthole izimpendulo.
“Ngangilangazelela Ukuthola Uthando Nemfudumalo.”—U-INNA LEZHNINA
UNYAKA AZALWA NGAWO: 1981
IZWE AZALELWA KULO: IRUSSIA
UMLANDO: WAKHULA KANZIMA
UKUPHILA KWAMI: Ngazalwa ngiyisithulu, ngizalwa abazali abayizithulu. Iminyaka yami yokuqala eyisithupha ngiwujah’ idada yayijabulisa. Itshe lagaya ngomunye umhlathi ngesikhathi abazali bami behlukana. Nakuba ngangimncane, ngaqonda ukuthi kusho ukuthini ukwehlukanisa futhi kwangizwisa ubuhlungu obukhulu. Ngemva kwesehlukaniso, ubaba nomfowethu omdala bahlala eTroitsk, mina nomama sathuthela eChelyabinsk. Ngokuhamba kwesikhathi umama waphinde washada. Usingababa wayeyisidakwa, futhi wayevame ukusishaya sinomama.
Ngo-1993, umfowethu omdala waminza. Le ngozi yashiya wonke umndeni wakithi ushaqekile. Umama waphendukela otshwaleni futhi naye waqala ukungihlukumeza njengosingababa. Ngaqala ukufuna ukuphila okungcono. Ngangilangazelela ukuthola uthando nemfudumalo. Ngaya emasontweni ahlukahlukene ngifuna induduzo, kodwa angizange ngiyithole.
INDLELA IBHAYIBHELI ELAKUSHINTSHA NGAYO UKUPHILA KWAMI: Lapho ngineminyaka engu-13 ubudala, intombazane engangifunda nayo, enguFakazi kaJehova, yangixoxela izindaba ezithile eziseBhayibhelini. Ngakujabulela ukufunda ngabantu okukhulunywa ngabo eBhayibhelini abanjengoNowa noJobe, abakhonza uNkulunkulu naphezu kwezimo ezinzima. Ngokushesha, ngaqala ukutadisha iBhayibheli noFakazi, ngaya nasemihlanganweni yabo.
Ukutadisha iBhayibheli kwangivula amehlo ngabona namanye amaqiniso amahle. Ngathinteka lapho ngifunda ukuthi uNkulunkulu unegama. (IHubo 83:18) Ngahlabeka umxhwele lapho ngibona ukuthi iBhayibheli lazibikezela ngokunembile izimo ezaziyoba khona “ezinsukwini zokugcina.” (2 Thimothewu 3:1-5) Futhi ngajabula kakhulu lapho ngifunda ngethemba lovuko. Cabanga nje—ngizophinde ngimbone umfowethu!—Johane 5:28, 29.
Noma kunjalo, akuyena wonke umuntu owayeyithanda inkolo yami entsha. Usingababa nomama babengabafuni oFakazi BakaJehova. Bazama ukungiphoqelela ukuba ngiyeke ukutadisha iBhayibheli. Kodwa ngangikuthanda engangikufunda, futhi ngangizimisele ukuqhubeka.
Kwakungelula ukubhekana nokuphikiswa ekhaya. Kwaba nzima nakakhulu lapho umfowethu omncane, owayevame ukungiphelezela emihlanganweni yoFakazi BakaJehova naye eminza. Nokho oFakazi abazange bangishiye. Banginika uthando nemfudumalo engangiyilangazelela ukuphila kwami konke. Ngangazi ukuthi kumelwe ukuba lena yinkolo yeqiniso. Ngo-1996, ngabhapathizwa ngaba omunye woFakazi bakaJehova.
INDLELA ENGIYE NGAZUZA NGAYO: Sengineminyaka eyisithupha ngishade noDmitry, indoda ekahle kakhulu. Sobabili sikhonza ehhovisi legatsha loFakazi bakaJehova eSt. Petersburg. Ngokuhamba kwesikhathi, isimo sengqondo sabazali bami ngezinkolelo zami sashintsha.
Angive ngibonga ngokwazi uJehova! Ukumkhonza kuye kwangilethela injongo yangempela ekuphileni.
“Ngangihlushwa Imibuzo Eminingi.”—URAUDEL RODRÍGUEZ RODRÍGUEZ
UNYAKA AZALWA NGAWO: 1959
IZWE AZALELWA KULO: ICUBA
UMLANDO: WAYEWUMVUKELI WEZOMBUSAZWE
UKUPHILA KWAMI: Ngazalelwa eHavana, eCuba, ngakhuliselwa emphakathini ohluphekayo futhi izimpi zasemgwaqweni zaziyinsakavukela. Ekukhuleni kwami, ngangithanda umdlalo we-judo neminye imidlalo yokulwa.
Ngangikhaliphile esikoleni futhi abazali bami bangikhuthaza ukuba ngiye eyunivesithi. Ngesikhathi ngiseyunivesithi, ngaqala ukuba nomuzwa wokuthi isimo sezombusazwe ezweni lethu sidinga ukushintshwa. Nganquma ukuvukela umbuso. Mina nomfana engangifunda naye sahlasela iphoyisa, sifuna isibhamu salo. Lowo mshuduliswano washiya iphoyisa lilimele kakhulu ekhanda. Ngenxa yalokho, sobabili saboshwa futhi sagwetshelwa ukufa, sasizobulawa iqembu labadubuli. Ngangineminyaka engu-20 kuphela ubudala, kodwa ngase ngizokufa!
Ngesikhathi ngihleli esitokisini, ngangilingisa lokho engizokwenza uma sengiphambi kweqembu labadubuli. Ngangingafuni ukubonisa ukwesaba. Yize kunjalo, ngangihlushwa imibuzo eminingi. Ngangizibuza: ‘Kungani kungenabulungisa kangaka emhlabeni? Ingabe lokhu kuphila ukuphela kwakho?’
INDLELA IBHAYIBHELI ELAKUSHINTSHA NGAYO UKUPHILA KWAMI: Ekugcineni isigwebo sethu sentambo sancishiswa saba iminyaka engu-30 sibhadla ejele. Yilapho lapho ngahlangana khona noFakazi BakaJehova, ababeboshelwe izinkolelo zabo. Yangihlaba umxhwele indlela oFakazi ababenesibindi nokuthula ngayo. Nakuba babeboshwe kungafanele, babengathukuthele futhi bengenamagqubu.
OFakazi bangifundisa ukuthi uNkulunkulu unenjongo ngabantu. Bangibonisa eBhayibhelini ukuthi uzoshintsha umhlaba esiphila kuwo ube ipharadesi elingenabo ubugebengu nokungabi nabulungisa. Bangifundisa nokuthi umhlaba uyogcwala abantu abalungile, abayothola ithuba lokuphila phakade ezimweni ezingcono kakhulu.—IHubo 37:29.
Ngakujabulela engakufunda koFakazi, kodwa ubuntu bami babuhluke ngokuphelele kobabo. Ngangicabanga ukuthi ngeke ngikwazi ukungathathi hlangothi kwezombusazwe nokungaziphindiseleli. Ngakho nganquma ukuzifundela mina iBhayibheli. Lapho ngiliqeda, ngabona ukuthi oFakazi BakaJehova kuphela abaziphatha njengamaKristu okuqala.
Ngokutadisha iBhayibheli, kwangikhanyela ukuthi kudingeka ngenze izinguquko ezinkulu ekuphileni kwami. Ngokwesibonelo, kwakufanele ngilungise indlela engikhuluma ngayo, ngoba ngangihlale ngithuka inhlamba. Kwakudingeka nokuba ngiyeke ukubhema. Kwakufanele ngiyeke nokuzigaxa ezindabeni zezombusazwe. Kwakungelula ukwenza lezi zinguquko, kodwa ngosizo lukaJehova, ngaphumelela kancane kancane.
Ushintsho olwaba nzima kunalo lonke, kwaba ukulawula intukuthelo yami. Namanje ngisakuthandazela ukuzithiba kule nkinga. Aye angisiza kakhulu amavesi eBhayibheli anjengencwadi yezAga 16:32, ethi: “Owephuza ukuthukuthela ungcono kunendoda enamandla, nolawula umoya wakhe ungcono kunothumba umuzi.”
Ngo-1991, ngabhapathizwa njengomunye woFakazi BakaJehova. Ngabhapathizelwa ejele emgqonyeni wamanzi. Ngonyaka owalandela, mina nezinye iziboshwa sakhululwa futhi sathunyelwa eSpain ngoba sasinezihlobo khona. Nganele ngafika ngaqala ukuya emihlanganweni yoFakazi BakaJehova. OFakazi balapho bangamukela kwaze kwaba sengathi kade ngihlala nabo, bangisiza nokuba ngiqale ukuphila kwami kabusha.
INDLELA ENGIYE NGAZUZA NGAYO: Ngingumuntu ojabulayo, ngikhonza uNkulunkulu nomkami namadodakazi ethu amabili. Nginelungelo lokusebenzisa isikhathi sami ngisiza abanye ukuba bafunde iBhayibheli. Ngezinye izikhathi ngike ngizibone ngeso lengqondo ngiyileya nsizwa eyayilengela ekufeni bese ngikwazisa kakhulu lokho engiye ngakuzuza kusukela ngaleso sikhathi. Ngiyaphila, futhi nginethemba. Ngilangazelela iPharadesi elithenjisiwe—isikhathi lapho ubulungisa buyoba buningi khona futhi ‘ukufa kungasekho.’—IsAmbulo 21:3, 4.
[Amazwi acashunwe esihlokweni ekhasini 19]
“Ngathinteka lapho ngifunda ukuthi uNkulunkulu unegama”
[Isithombe ekhasini 20]
Mina nomyeni wami sijabulela ukufunda nabantu abayizithulu