Ungawethemba Yini Umbono Oba Nawo Ngomuntu Lapho Uqala Ukumbona?

UDOKOTELA othile wayehleli kamnandi egumbini lakhe lokuphumula, ebukele uhlelo lwethelevishini lapho kwakukhulunywa khona nongqongqoshe kahulumeni wase-Ireland. Ngemva kokubukisisa ubuso bukangqongqoshe, lo dokotela wabona okuthile acabanga ukuthi kuwuphawu lwesimila. Weluleka lo ngqongqoshe ukuba ayohlolwa ngokushesha.

Udokotela wayeyihlabe esikhonkosini. Wabonisa ukuthi uyakwazi ukwenza lokho abanye abakubiza ngokuthi ikhono lokuhlonza isifo ngokusibuka nje isiguli. Nokho, abanye banomuzwa wokuthi banalo ‘leli khono’ uma kuziwa ekwahluleleni uhlobo umuntu ayilo, ubuntu bakhe nokuthi ungamethemba yini.

Phakathi namakhulu eminyaka, abacwaningi baye bazama izindlela ezintsha zesayensi zokufunda uhlobo umuntu ayilo ngokubheka ukubukeka kwakhe kwangaphandle. Le ndlela bayibiza ngokuthi i-physiognomy, i-Encyclopædia Britannica eyichaza ngokuthi “isayensi-mbumbulu ephathelene nemikhuba yobuntu okuthiwa ibonakala ezicini zobuso noma ekwakhekeni nasekumeni komzimba.” Ngekhulu le-19 leminyaka, izazi zemvelaphi nenhlalo yabantu ezinjengoFrancis Galton, umzala kaCharles Darwin, nochwepheshe kwezobugebengu abanjengoCesare Lombroso wase-Italy, basikisela ukuba kusetshenziswe imibono nezindlela ezifanayo okwase kukade zalibaleka.

Nokho, abantu abaningi bakholelwa ukuthi kuyinto engenzeka ukwahlulela kahle umuntu ngokumane umbuke nje. Ingabe kufanele uwethembe umbono onjalo oba nawo ngomuntu lapho uqala ukumbona?

Ukwahlulela Ngokubukeka

Isibonelo esingokoqobo sokwahlulela—noma sokwahlulela kabi—ngombono oba nawo ngomuntu lapho uqala ukubona sitholakala encwadini yeBhayibheli kaSamuweli Wokuqala. UJehova uNkulunkulu wayala umprofethi uSamuweli ukuba agcobe ilungu lomkhaya kaJese elalizoba inkosi yakwa-Israyeli. Siyafunda: “Kwathi lapho [amadodana kaJese] engena futhi [uSamuweli] ebona u-Eliyabe, ngaso leso sikhathi wathi: ‘Ngokuqinisekile ogcotshiweyo wakhe uphambi kukaJehova.’ Kodwa uJehova wathi kuSamuweli: ‘Musa ukubheka ukubonakala kwakhe nokuphakama kwesiqu sakhe, ngoba ngimalile. Ngoba indlela uNkulunkulu abona ngayo akuyona indlela umuntu abona ngayo, ngoba umuntu nje ubona okubonakala emehlweni; kodwa uJehova yena, ubona lokho inhliziyo eyikho.’” Kwashiwo okufanayo nangamanye amadodana kaJese ayisithupha. Ekugcineni, ngokuphambene nalokho umprofethi noJese ababekucabanga, uNkulunkulu wakhetha ukuba inkosi yakwa-Israyeli kube indodana kaJese yesi-8—uDavide—umfanyana okungekho muntu owacabanga ngisho nokumbiza.—1 Samuweli 16:6-12.

Kusafana nanamuhla. Eminyakeni embalwa edlule, eJalimane, uprofesa wobuchwepheshe kwezobugebengu wenza inhlolo-vo eyayihlanganisa abafundi bezomthetho abangu-500. Wabiza abantu abangu-12 abafundi ababengabazi. Phakathi kwabo kwakukhona umphathi wamaphoyisa wendawo, umshushisi wendawo, umgcini-zimali wasenyuvesi, isikhulu sokusebenzelana komphakathi, abameli abambalwa, izikhulu zenkantolo nezigebengu ezintathu ezilahlwe amacala. Laba bafundi kwakufanele bathole ukuthi ngamunye walaba bantu wenza msebenzi muni nokuthi yibaphi phakathi kwabo okufanele babhadle ejele nokuthi benze buphi ubugebengu. Konke lokhu kwakufanele bakuthole ngokumane bambuke umuntu bezwe nalokho athi uzilibazisa ngakho.

Waba yini umphumela? Abafundi abangaba amaphesenti angu-75 bakwazi ukukhomba izigebengu zangempela ezintathu. Kodwa abafundi abangamaphesenti angu-60 bakhomba abanye abantu abangu-9 bathi bayizaphula-mthetho kanti abazona. Umfundi oyedwa kwabayisikhombisa wakhomba umshushisi wendawo wathi kungenzeka udayisa izidakamizwa. Umfundi oyedwa kwabathathu wacabanga ukuthi umphathi wamaphoyisa uyisigelekeqe! Ukwahlulela okusekelwe emibonweni kungashaya phansi. Kungani?

Ukubukeka Kwangaphandle Kungakhohlisa

Lapho sibona umuntu okokuqala, sivame ukwakha imibono ngalowo muntu ngokwalokho esikwaziyo okwenzeka esikhathini esedlule. Sibe sesimbopha ngabhande linye nabanye esinomuzwa wokuthi ufana nabo bese simahlulela ngokwalokho esikucabangayo. Asigcini nje ngokubheka ukubukeka kwangaphandle, kodwa singase simahlulele ngenxa yobuzwe, uhlanga, isikhundla akuso noma inkolo yakhe.

Uma umbono esiwakhile ngaye uba yiqiniso, sibe sesizincoma ngokuthi siyakwazi ukuyifunda ivaliwe, bese iqina inkolelo yethu yokuthi siyakwazi ukwahlulela umuntu ngokumbuka nje. Nokho, uma sibona ukuthi sishaye phansi, sibe sesenzenjani? Uma sithembekile, kufanele silahle umbono ebese sinawo bese sibheka amaqiniso. Uma kungenjalo siyobalimaza ngempela abanye noma senze okubi nakakhulu kunalokho, ngenxa nje yokuqhosha ngalokho esikubiza ngokuthi ikhono lethu eliphakeme lokwahlulela.

Ukwahlulela ngokubukeka kwangaphandle ngeke kugcine ngokulimaza umuntu owahlulelwayo kodwa nalowo owahlulelayo. Ngokwesibonelo, ekhulwini lokuqala amaJuda amaningi enqaba ukwamukela ukuthi kungenzeka uJesu wayenguMesiya othenjisiwe. Ngani? Ngenxa yemibono yawo esekelwe ekubukekeni kwangaphandle, wona ayezibonela nje indodana yombazi wasemaphandleni. Nakuba ahlatshwa umxhwele amazwi kaJesu okuhlakanipha nemisebenzi yakhe yamandla, kodwa ayembukela phansi ngenxa yemibono ayesevele enayo ngaye. Isimo sawo sengqondo sabangela ukuba uJesu awashiye ayoshumayela kwenye indawo, ethi: “Umprofethi uyahlonishwa, ngaphandle kwasendaweni yakubo nasendlini yakubo.”—Mathewu 13:54-58.

Lawo maJuda ayengamalungu esizwe okwase kungamakhulu eminyaka silindele uMesiya. Ukuvumela kwawo umbono wokuqala aba nawo ukuba uwavimbele ekuqapheleni ukuthi uJesu unguMesiya lapho efika ekugcineni, kwawalahlekisela kakhulu ngokomoya. (Mathewu 23:37-39) Baphinde benza okufanayo nakubalandeli bakaJesu. Abantu abaningi abakwazanga ukukholelwa ukuthi iqembu elincane labadobi abaphansi, elalidelelwa isigaba sabantu abafundile nabaholi benkolo ephezulu, lalingaba nokuthile okubalulekile elingakusho. Labo abaqhubeka bebambelele emibonweni yabo yokuqala balahlekelwa ithuba eliyingqayizivele lokuba abalandeli beNdodana kaNkulunkulu.—Johane 1:10-12.

Abanye Bakushintsha Ukucabanga Kwabo

Babekhona abantu ngesikhathi sikaJesu ababethobeke ngokwanele ukuba bashintshe ukucabanga kwabo lapho bebona ubufakazi. (Johane 7:45-52) Phakathi kwabo kukhona amalungu athile omkhaya wakubo kaJesu, ekuqaleni angazange acabange ukuthi omunye wezihlobo zawo angaba uMesiya. (Johane 7:5) Kuyancomeka ukuthi ngokuhamba kwesikhathi ashintsha ukucabanga kwawo aba nokholo kuye. (IzEnzo 1:14; 1 Korinte 9:5; Galathiya 1:19) Ngokufanayo, eminyakeni ethile kamuva eRoma, abanye abameleli bomphakathi wamaJuda babefuna ukuzizwela mathupha kumphostoli uPawulu kunokulalela amahemuhemu ayesakazwa izitha zobuKristu. Ngemva kokulalela, abanye baba amakholwa.—IzEnzo 28:22-24.

Namuhla, abaningi banombono ongemuhle ngoFakazi BakaJehova. Kungani? Ezikhathini eziningi, akukhona ukuthi baye bahlola amaqiniso noma bazitholela ngokwabo ukuthi izinkolelo nemikhuba yoFakazi kuphambene nemiBhalo. Kunalokho, bamane abakholwa ukuthi inkolo yoFakazi BakaJehova ingaba neqiniso. Njengoba uzokhumbula, yiyona kanye le ndlela amaKristu ekhulu lokuqala ayebhekwa ngayo.

Akumangazi ukuthi kukhulunywa kabi noma kujivazwe labo abazama ukulandela isibonelo sikaJesu. Ngani? Ngoba uJesu waxwayisa abalandeli bakhe: “Niyoba yizinto zokuzondwa abantu bonke ngenxa yegama lami.” Kodwa wabakhuthaza ngala mazwi: “Lowo okhuthazele kwaze kwaba sekupheleni nguye oyosindiswa.”—Mathewu 10:22.

Belalela umyalo kaJesu, oFakazi BakaJehova namuhla basebenza kanzima ukuze bazise abantu emhlabeni wonke izindaba ezinhle zoMbuso kaNkulunkulu. (Mathewu 28:19, 20) Labo abenqaba ngokuphelele ukuzilalela, balahlekelwa ithuba lokungena endleleni eya ekuphileni okuphakade. (Johane 17:3) Wena uzokwenzenjani? Ingabe uzomane uqondiswe umbono wokuqala oba nawo nemibono obusuvele unayo, noma uzimisela ukuhlola amaqiniso ngomqondo osabalele? Khumbula: Ukubukeka kungase kukhohlise futhi imibono oba nayo ngomuntu ingase ibe yiphutha; kodwa ukuhlolisisa amaqiniso ungathonywe yilutho kungaholela enjabulweni obungayilindele.—IzEnzo 17:10-12.

[Isithombe ekhasini 11]

Umbono wokuqala wamaJuda amaningi waholela ekutheni enqabe uJesu njengoMesiya

[Isithombe ekhasini 12]

Ingabe umbono wakho ngoFakazi BakaJehova usekelwe kulokho okucabangayo noma emaqinisweni?