Ingabe Ungaba Yiphayona Elisizayo Ngo-April?
1 UJesu waqalisa umsebenzi obaluleke kangangokuthi ikusasa laso sonke isintu lixhomeke emphumeleni wawo. (Math. 4:17) Umsebenzi wokushumayela izindaba ezinhle nowokwenza abafundi. Lomsebenzi uzofinyelela umvuthwandaba wawo ngaphambi nje ‘kwesiphelo,’ lapho isigijimi soMbuso siyobe ‘sesishunyayelwe kuwo wonke umhlaba owakhiwe ngenjongo yobufakazi ezizweni zonke.’—Math. 24:14, NW.
2 Njengoba manje sesifinyelele isiphetho salesimiso sezinto, lomsebenzi uphuthuma kakhulu kunanoma yinini ngaphambili. Njengoba ukuphila kusengozini, ukulibala okungadingekile kungase kube nemiphumela efinyelela kude. Ilungiselelo lobuphayona obusizayo liye lakhuthaza abaningi ukuba babe nomfutho owengeziwe ekwenzeni lomsebenzi ophuthumayo. Ingabe-ke wena ungaba yiphayona elisizayo ngoApril?
UAPRIL UNIKEZA ITHUBA ELIHLE
3 Ngezimpela-sonto zawo ezigcwele ezinhlanu, uApril uzoba yinyanga enhle kakhulu ngabaningi ukuba babhalise njengamaphayona asizayo. Ngisho nabanye abenza umsebenzi wokuziphilisa isikhathi esigcwele bangase bakwazi ukwenza kanjalo. Abanye abaphayona ngonyaka odlule babusiswa kakhulu futhi bazwakalisa isifiso sabo sokuphayona futhi nangalonyaka. Ngokuhlela kusemanje, ingabe ungaba yiphayona elisizayo ngoApril? Kungani ungaxoxi ngokuba nokwenzeka kwalokhu nalabo kakade asebemiswe njengamaphayona asizayo futhi uthole ukusikisela okuwusizo kubo?
4 Ukwandisa inkonzo yethu kungaletha injabulo eyengeziwe. Ngisho nakuba lokhu kungase kuhilele ukudela ezinye izinto esithanda ukuzenza, ngokuhlwanyela kakhulu, siyovuna izibusiso ezingokomoya ezengeziwe. (2 Kor. 6:9b) Labo abasebenzela uJehova ngomphefumulo wonke “bayajabula” ngesivuno esihle sabafundi abasha.—IzE. 13:48, 52.
INDLELA YOKUTHUTHUKA OKUNGOKWASEZULWINI
5 Ngemva kokunambitha kuqala izinjabulo zenkonzo yobuphayona obusizayo, abaningi baye baba amaphayona avamile. Ngalendlela, inkonzo yobuphayona obusizayo ingasebenza njengenyathelo elikuwezela enjabulweni enkulu. Uma ukwazi ukuba iphayona elisizayo ngoApril nangezinyanga ezilandelayo, ungase ukwazi ukuba nezimpindelo nezifundo zeBhayibheli eziyokusiza ukuba uthuthukele kalula enkonzweni yobuphayona obuvamile ekuqaleni konyaka omusha wenkonzo ngoSeptember.
6 Kungani oFakazi BakaJehova abaningi bandisa inkonzo yabo kulesikhathi esikhundleni sokuba bazifunele izinto ezibonakalayo ezengeziwe kulesimiso? Kungenxa yokuthi bafuna ukudumisa uJehova futhi batshele abanye ngezinjongo zakhe. Bayazi ukuthi “izwe liyadlula kanye nenkanuko yalo, kepha owenza intando kaNkulunkulu uhlala kuze kube-phakade.” (1 Joh. 2: 17) Ngobuqotho benza ngokuvumelana nomthandazo wabo wokuba iNkosi yesivuno ‘ilethe izisebenzi ekuvuneni kwayo.’—Math. 9:37, 38.
7 Uthando oluqotho ngoJehova nangomakhelwane lusishukumisela ukuba sihlanganyele emsebenzini wokwenza abafundi ngokusemandleni ethu. (Math. 22:37-39; 28:19) Nakuba izimo zomuntu siqu zivimbela abaningi ekubeni abamemezeli abaphayonayo, ukwenza konke esingakwenza enkonzweni kaJehova ngokuvumelana nezimo zethu kusiveza njengalabo ‘abasebenza kanzima bezikhandla ekusizeni bonke abantu ukuba basindiswe.’—1 Thim. 2:10.