Abantu Abajabula Kunabo Bonke Emhlabeni
1 “Bayajabula abantu abaNkulunkulu wabo unguJehova!” (IHu. 144:15, NW) Lawo mazwi achaza oFakazi BakaJehova njengabantu abajabula kunabo bonke emhlabeni. Ayikho injabulo edlula leyo etholakala ngokukhonza okuwukuphela kukaNkulunkulu weqiniso nophilayo, uJehova. Njengoba ‘enguNkulunkulu ojabulayo,’ injabulo yakhe ibonakala nakubakhulekeli bakhe. (1 Thim. 1:11) Yiziphi ezinye zezici zokukhulekela kwethu ezisenza sijabule kangaka?
2 Okusenza Sijabule: UJesu wasiqinisekisa ukuthi injabulo itholakala ‘ngokuqaphela isidingo sethu esingokomoya.’ (Math. 5:3) Leso sidingo saneliswa ukuqhubeka sitadisha iBhayibheli futhi siba khona kuyo yonke imihlangano yethu yobuKristu. Ukufunda iqiniso leZwi likaNkulunkulu kuye kwasikhulula emangeni nasekuphambukeni kwenkolo. (Joh. 8:32) ImiBhalo isifundisé nendlela yokuphila engcono kunazo zonke. (Isaya 48:17) Ngenxa yalokho, sijabulela ubudlelwane bobuKristu obakhayo ngaphakathi enhlanganweni yabafowethu abajabulayo.—1 Thes. 2:19, 20; 1 Pet. 2:17.
3 Sithola ukwaneliseka okukhulu ngokuthobela izindinganiso zikaNkulunkulu eziphakeme zokuziphatha, ngoba siyazi ukuthi lokhu kuyasivikela futhi kujabulise noJehova. (IzAga 27:11) Intatheli yephephandaba elithile yathi: “Naphezu kwazo zonke izindinganiso zabo eziqinile, oFakazi BakaJehova ababonakali bengajabule. Injabulo yabo ayifuniselwa. Abasha kanye nabadala babonakala bejabule ngendlela engavamile futhi benokulinganisela okuhle.” Singabasiza kanjani abanye ukuba nabo bayithole le njabulo esinayo?
4 Siza Abanye Bathole Injabulo: Izwe ligajwé ukungajabuli, kanti nabantu ngokuvamile banombono ofiphele ngekusasa. Nokho, thina sinombono oqhakazile, ngoba siyazi ukuthi ngelinye ilanga lonke usizi luyobe seluwumlando nje. (IsAm. 21:3, 4) Ngakho, sihlanganyela ngentshiseko enkonzweni, sifuna abanhliziyo ziqotho esingahlanganyela nabo ithemba lethu nezinkolelo zethu ngoJehova.—Hez. 9:4.
5 Udade othile oyiphayona wathi: “Akukho okwanelisa ngaphezu kokusiza abantu ukuba bamazi uJehova neqiniso lakhe.” Masenze konke esingakwenza ekukhuthazeni abaningi ngokwengeziwe ukuba bamukele izifundo zeBhayibheli zasekhaya. Ukukhonza uJehova nokunikela ngobuqu bethu ekusizeni abanye ukuba bamkhonze kuveza injabulo engenakuqhathaniswa.—IzE. 20:35.