Intsha Iyabuza . . .

Ngingakuyeka Kanjani Ukucabanga Ngabobulili Obuhlukile?

‘NSUKU zonke, imithombo yezindaba iwohloza ukuqina kokuziphatha kwentsha ngokukuchukuluza nangokukugcona ngobulili; izingoma ze-rock ziklabalasa ezindlebeni zabo ngobuhlobo bobulili; inqwaba yezincwadi zothando ezidayisa kakhulu yenza amaqiniso obulili abe amaphupho amnandi njengokumungunya uswidi.’ Washo kanjalo umlobi uLesley Jane Nonkin. Yebo, njengosemusha, uhlaselwa izikhuthazo zemithombo yezindaba ezikwenza ucabange ngabobulili obuhlukile.

Yiqiniso, kungokwemvelo ukuba nesithakazelo esithile kwabobulili obuhlukile.a Kodwa lapho imicabango yothando, ukwakha amaphupho, kugcwala emicabangweni yakho kangangokuba kuphazamise ubuthongo bakho, imithandazo, umsebenzi wakho wesikole, ukufunda iBhayibheli, noma imisebenzi yasekhaya, khona-ke kubonisa ukuthi sekuyisikhathi eside lesisimo siyingozi. Ngempela, ukuzilibazisa okunjalo okungenampilo kungaholela ekuziphatheni okungafanele.—Jakobe 1:14, 15.

Akusho ukuthi kufanele uyeke ukuqaphela ukuthi amantombazane—noma abafana—bakhona. Kodwa njengoba izAga 23:12 zisho, kudingeka ‘ubeke inhliziyo yakho ekulayweni.’ Cha, alikho ikhambi elilula, alikho ikhambi eliyisimangaliso elingakusiza ukuba wenze lokhu. Nokho, ngomzamo ungenza ukucabanga kwakho kube okulinganisela kakhudlwana. Ake sibheke izindlela ezimbalwa ezingakusiza ukuba wenze lokhu.

Qaphela Iqembu Ozihlanganisa Nalo

Bhekisisa iqembu ozihlanganisa nalo. Enye insizwa iyavuma: “Wonke umuntu okuzungezile ukhuluma ngokuziphatha okubi ngokobulili njengokungathi kungokwemvelo njengokudla.” Ingabe kungakuthonya ukuhlala uchayeke enkulumweni enjalo? Ngokungangabazeki. Ngokokunye ukuhlolwa kwentsha, izingxenye ezintathu kwezine zavuma ukuthi “ukufana (noma ukungafani) nontanga kubusa isimo sayo sengqondo ngobulili.”

Kuthiwani ngabangane bakho? Ingabe yonke ingxoxo iphenduka ingxoxo eshubile ngothile wobulili obuhlukile? Ingabe inkulumo enjalo ivame ukungalawuleki futhi ibe engcolile noma engafanele? Uma kunjalo, ukuhlanganyela kuyo—noma ukuyilalela nje—kuyokwenza kube nzima ukuba ugcine ingqondo yakho igxile ezintweni ezimsulwa. IBhayibheli liyanxusa: “Manilahle konke lokho, ulaka, nokuthukuthela, nobubi, nokuhlambalaza, nokukhuluma amahlazo aphuma emlonyeni wenu.”—Kolose 3:8.

Nokho, kuyoba nzima ukusebenzisa lesiseluleko uma abangane bakho bengazazisi izimiso zeBhayibheli; ngokuqinisekile isimo sabo sengqondo sizokuthonya ngokuhamba kwesikhathi. (IzAga 13:20) Cabangela okuhlangenwe nakho kwenye intombazane engumKristu, eyathi: “Ngangingathandi ukutshela izingane esikoleni ukuthi ngingomunye woFakazi BakaJehova. Ngakho zazihlale zikhuluma nami ngokukhululekile ngobulili.” Ngokushesha yahlanganyela ekuziphatheni okubi ngokobulili futhi yakhulelwa. Ngakho-ke izAga 9:6 ngokuhlakanipha ziyakhuthaza: “Hlukana neqembu labantu abangazi lutho, uphile. Landela indlela yolwazi.” (Today’s English Version) Yebo, yiba nabangane abanokuziphatha nezindinganiso zobuKristu ezifana nezakho, abangane abazokwakha ngokomoya—abangeke bakwenzele phansi.

Yiqiniso, ngisho nentsha engamaKristu ngokuvamile ebonisa isimo sengqondo sokwesaba uNkulunkulu ingase ‘ikhubeke ngamazwi’ ngezinye izikhathi. (Jakobe 3:2) Lapho lokho kwenzeka futhi ingxoxo iqale ukuya ohlangothini olungalungile, yini ongayenza? IBhayibheli lisitshela ukuthi iNkosi uSolomoni yathatheka ngentombazanyana engumalusi. Nokho, lentombazanyana ayizange iyibonise isithakazelo sothando. Lapho abangane bayo abasebasha bezama ukuvusa imizwa yayo ngoSolomoni, ayizange ikuvumele ukuhlaselwa ngenkulumo yothando. Yazikhulumela, ithi: “Ngiyanifungisa . . . ningalunyakazisi, ningaluvusi uthando, lungakavumi.” (IsiHlabelelo seziHlabelelo 2:7) Ngendlela efanayo, kungase kudingeke ukuba uzikhulumele lapho ingxoxo ingasalawuleki. Cha, akudingekile ukuba ubashumayeze abangane bakho. Kodwa ungase uzame nje ukushintsha indaba, uyiyise ohlangothini olwakhayo.

Ukuzijabulisa—Isidingo Sokuba Okhethayo

Esinye isici sokucatshangelwa ukuzijabulisa. Ingase ibukeke ithakazelisa ibhayisikobho yamuva, i-video, noma i-disc. Nokho, iBhayibheli liyasikhumbuza: “Konke okusezweni, inkanuko yenyama, nenkanuko yamehlo, nokuzigabisa ngalokhukuphila, akuveli kuYise, kodwa kuvela ezweni.” (1 Johane 2:16) Njengoba kuphawuliwe ekuqaleni, ukuzijabulisa okuningi kwanamuhla kuklanyelwe ukuvusa imizwa yobulili. Ngokwesibonelo, izingoma nezithombe zebhayisikobho ezithandwayo ziye zaqhubeka ziveza izinto ngokuthe bhá—ngokuvamile zihambisana nezithombe zobulili ezingcolile.

Kungase kukuthinte kanjani ukuzichaya ekuzijabuliseni okunjalo? Umlobi uJohn Langone uthi: “Ukuhlola okuningi kuye kwabonisa . . . ukuthi lapho sichayeka ezintweni ezivusa inkanuko, sithambekela ekukhulumeni ngokwengeziwe ngobulili. Ngezinye izikhathi, lokhu kuchayeka kusiholela ekuzameni izinto ebesingeke sizizame ngokuvamile.” Yebo, ‘ukunaka okwenyama’ kuyomane kukulimaze. (Roma 8:5) Kuyosonta umbono wakho ngothando nobulili futhi kugcwalise ingqondo yakho ngamaphupho angcolile. Siyini iseluleko seBhayibheli? “Masizihlambulule ekungcoleni konke kwenyama nokomoya, siphelelise ubungcwele ngokumesaba uNkulunkulu.” (2 Korinte 7:1) Ngakho gwema izithombe zamabhayisikobho, ama-video, nama-disc avusa inkanuko yobulili.

Enye indoda engashadile engumKristu yake yanikeza lesiseluleko esiwusizo: “Ungagxili ezintweni ezonakalisayo ngaphambi kokuba uyolala. Izithombe ze-TV eziningi zasebusuku zingcole ngempela.” Nezincwadi eziningi zinjalo. Osemusha ongumKristu okuthiwa uSherry uyavuma: “Ngangivame ukufunda izincwadi zothando. Ngangivame ukuphupha ngobulili, ngiphupha ngokuphila okujabulisayo nokuba nabantu abaningi engihlanganyela nabo ubulili.” Njengoba ingqondo yakhe yayigcwele amaphupho othando, wahileleka kalula ekuphululaneni nenye insizwa. Izinkinga ezinjalo zingagwenywa uma unamathela ezintweni ezifundwayo ezakhayo—njengalomagazini nomngane wawo, INqabayokulinda. Ukufunda okunjalo kuye kwasiza intsha eningi ukuba ‘inake okukaMoya,’ kunokuba inake okwenyama ebuthaka.—Roma 8:5.

Hlukana Nalawomaphupho!

Ngezinye izikhathi ukucabanga ngabobulili obuhlukile kungase kuzifikele engqondweni ngokungazelele. UScott oneminyaka engu-17 ubudala uyavuma: “Kunezikhathi lapho kuba nzima kakhulu kimi ukuba ngiyeke ukucabanga ngobulili.” Noma mhlawumbe ubona nje umfana oyigeza noma intombazane eyisingqazu. Ngaphambi kokuba uqaphele, uzithola usucabanga ngaye noma ngayo. Kodwa ukuqaphela ukuthi othile uyakhanga nokwenza lokho uJesu axwayisa ngakho, okuwukuthi, ‘ukuqhubeka ubuka owesifazane ukuze umkhanuke,’ kuyizinto ezimbili ezihluke ngokuphelele. (Mathewu 5:28, NW; qhathanisa nezAga 6:25.) Uma usemncane kakhulu ukuba ungashada, ukuzinikela emaphusheni othando ayengayo kungamane kukucindezele futhi kukudumaze.—Qhathanisa nezAga 13:12.

Ngakho uScott uthi: “Okungisizayo ukushintsha indaba—ukuyeka imicabango engenza ngivukwe inkanuko. Ngizikhumbuza ukuthi lemizwa noma ukuvukwa inkanuko kuzophela ngokuhamba kwesikhathi.” (Qhathanisa nabaseFilipi 4:8.) Umphostoli uPawulu wathi: “Ngiyawutuba umzimba wami, ngiwenza isigqila.” (1 Korinte 9:27) Ngokufanayo, kungase kudingeke ukuba uziphathe ngengalo eqinile lapho ukucabanga ngabobulili obuhlukile kuzama ukugxila. Uma lemicabango iphikelela, zama ukuvivinya umzimba okuthile. “Ukujwayeza umzimba kusiza ingcosana,” futhi ukuhamba ngamandla noma ukuvivinya umzimba (calisthenics) imizuzu embalwa kungase kube yilokho okudingayo ukuze kukusize ukuba ubuyisele ingqondo yakho esimweni esifanele.—1 Thimothewu 4:8.

Intsha eningi iye yathola futhi ukuthi ‘ukuvama njalo emsebenzini weNkosi’ kuwusizo ngokukhethekile. (1 Korinte 15:58) UDebra osemusha wakubeka ngalendlela: “Ngithola ukuthi ikhambi liwukuba matasa uze ukhathale.” Ukuhileleka ngokugcwele ebandleni lobuKristu nasemisebenzini yalo yonke kungakusiza kakhulu ekugcineni ukucabanga kwakho kulinganisela.

Nokho, kungakhathaliseki ukuthi uzama kangakanani, kungase kube nzima ngezinye izikhathi ukuyeka ukucabanga ngabobulili obuhlukile. Uma kunjalo, thola ukusekela kwabantu abadala. Mhlawumbe ungaxoxa nomunye wabazali bakho. Cabangela lokho okwashiwo uCarl osemusha: “Kuye kwangisiza ukuxoxa nothile omdala futhi onokuhlangenwe nakho. Kuba ngcono kakhulu lapho ingxoxo ikhululeke ngokwengeziwe.” Ngaphezu kwakho konke, ungalushayi indiva usizo ongaluthola kuBaba wakho wasezulwini. Enye indoda engumKristu engashadile ithi: “Lapho ngizwa ukuthi inkanuko yobulili iyavuka, ngithandaza ngempela.” IBhayibheli lithi: “Ngakho-ke masisondele ngesibindi esihlalweni somusa ukuba samukeliswe isihawu, sifumane umusa wokusiza ngesikhathi esifaneleyo.” (Heberu 4:16) Cha, uNkulunkulu ngeke asisuse isithakazelo sakho kwabobulili obuhlukile. Kodwa ngosizo lwakhe, ungathola ukuthi ziningi ezinye izinto ongacabanga ngazo.

[Isithombe ekhasini 17]

Uma ingxoxo ngabobulili obuhlukile ingasalawuleki, yiba nesibindi sokuyishintsha

[Umbhalo waphansi]