Imihlangano Yokuthuthukisa Ubuhlobo Phakathi Kodokotela NoFakazi BakaJehova
AMAKRISTU anqatshelwa umthetho kaNkulunkulu ukudla igazi nganoma iyiphi indlela. (IzEnzo 15:28, 29) Ngezinye izikhathi ukulalela lowomthetho kuye kwabangela ukungaqondi okuye kwaphumela ekutheni amaKristu angazitholi ezinye izindlela zokwelapha ezitholakalayo neziphumelelayo zezinkinga zawo zempilo.
Ukuze kube nokuqonda okungcono futhi kusizwe odokotela ukuba banikeze ukwelapha ngaphandle kokusebenzisa igazi, oFakazi BakaJehova baye bamisa umnyango wokubonisana owusizo. INdikimba Ebusayo yoFakazi BakaJehova iye yamisa Umnyango Wezokwaziswa Ngezezibhedlela (HIS) eBrooklyn, eNew York, ukuze iqeqeshe oFakazi abangabadala abakhethiwe ukuba basebenze kumaKomiti Okubonisana Nezibhedlela (HLC). Kuye kwacwaningwa ngezokwelapha futhi imiphumela yethulwa emihlanganweni yama-HLC. Ngokulandelayo, lokhu kwaziswa kwethulwa kodokotela nasemitholampilo. Futhi, kungahlelwa ukuba kuxhunyanwe nabanye odokotela abangomakad’ ebona ngomzamo wokugwema ukungqubuzana.
Ingabe siye saphumelela lesisimiso? Kuye kwaba usizo ngempela yini ukwaziswa okunikezwayo? Odokotela baye basabela kanjani kukho? Imibono elandelayo eyabikwa udokotela othile owayesemhlanganweni wamuva nje we-HLC iyafundisa futhi iqinisa idolo.
“Nginethemba lokuthi nizothola lemibono ihlaba esikhonkosini futhi iwusizo.
“Okokuqala, mangisho ukuthi kwakuyilungelo ukumenyelwa eMhlanganweni wesibili weKomiti Yokubonisana Nezibhedlela owaqhutshwa amalungu oMnyango Wezokwaziswa Ngezezibhedlela asendlunkulu yoFakazi BakaJehova eNew York. Engangikulindele kulomhlangano kwafezwa ngokwedlulele. Amazwi okuvula kasihlalo abeka isisekelo sesimiso sezinsuku ezimbili. Wagcizelela ukuthi i-HLC ayiyona nje indlela yokusabela ezidingweni zoFakazi abagulayo lapho belaliswe esibhedlela. Lekomiti inikeza ithuba elihle lokudalula izinganekwane eziningi ngoFakazi ezivamile emphakathini nakodokotela, kubaqondisi bezibhedlela, nakwezinye izisebenzi zezokwelapha.
“Kuvuleka amehlo kubantu abaningi lapho bethola ukuthi oFakazi BakaJehova abafani nakancane nama-Christian Scientist ngezinkolelo zabo zezokwelapha. OFakazi abasebenzisi ‘ilungelo lokukhetha ukufa’ noma bazame ukuzibeka esimweni sokuba abafel’ ukholo. Futhi indaba yegazi ayiwona umyalo wenhlangano kodwa kunalokho iyinkolelo ejulile yomuntu siqu. Izambulo ezinjalo zigcizelela izinjongo zokufundisa kwe-HLC. Yebo, ngisho nodokotela bafundiswa ngokuphawulekayo futhi kuningi abasazokufunda ngezindlela zokwelapha ngaphandle kokusebenzisa igazi. Buyangimangalisa njalo ubukhulu nokujula kokucwaninga okwenziwa yilelilungiselelo, okuningi kwakho okusha ngempela kimi. Futhi ukufundisa kwe-HLC akupheleli lapha. Kudlulela kubaqondisi bezibhedlela, kwezenhlalakahle, ngisho nasezikhulwini zomthetho nezokwahlulela.
“Lamakomiti azama kanzima ukufuna, ukuxhumana, nokufaka ohlwini usizo lodokotela ababambisana nezinkolelo zoFakazi. Yiqiniso, kudlulela ngalé komkhakha wodokotela, njengoba i-HLC yakha ubuhlobo obuphumelelayo nezibhedlela, izisebenzi zasemtholampilo, abameli, kanye nabahluleli. Mhlawumbe umyalezo okhanya bhá okumelwe udluliswe ukuthi oFakazi BakaJehova bangabantu abacabangelayo, abangashiseki ngokungenangqondo, futhi bacela nje izindlela ezamukelekayo zokwelapha ezingalisebenzisi igazi. . . . Kunezingozi eziphawulekayo ekusebenziseni igazi, futhi ngokuqinisekile i-HLC yenza umsebenzi omuhle ngokudalula lezizingozi nokugcizelela emkhakheni wezokwelapha izingozi ezingase zibangelwe igazi nemikhiqizo yalo.
“Kuyangimangaza njalo ukwaziswa i-HLC ekunikezwa uMnyango Wezokwaziswa Ngezezibhedlela ne-Watch Tower Society. Kodwa njengoba noma yimuphi uchwepheshe engavuma, cishe kungafezwa noma yimuphi umsebenzi uma kunamathuluzi afanele. . . . Kwakuhlaba umxhwele ukuzwa ngamalungiselelo asetshenziswayo ukuze kusatshelwe ngokushesha nangokuphumelelayo cishe kunoma yisiphi isimo esiphuthumayo sezokwelapha. Ilungu ngalinye le-HLC liqeqeshelwe ukuthola ukwaziswa okudingekayo ngabantu, ukuhlaziya ngokushesha isimo sengqondo sodokotela nezibhedlela, nokuhlaziya ngokunembile izinga lesimo esiphuthumayo nosongo olungabekwa izinyathelo ezingokomthetho isibhedlela esingazithatha njengemvume yenkantolo yokumpompela igazi.
“Sahlola izindlela zokuchaza izidingo nezinto ezifunwa iziguli ezingoFakazi, indlela yokubhekana nezihlobo ezingakholwa, ngisho nendlela yokuhoxisa odokotela nokudlulisela isiguli kwezinye izikhungo zezokwelapha ezisabelayo ezidingweni zoFakazi. Kwaqokonyiswa ukubambisana phakathi kwe-HLC nemithombo yezindaba, futhi kwanikezwa iziqondiso, nazo ezazigcizelela iphuzu eliyinhloko lokuthi oFakazi abenqabi zonke izinhlobo zokwelapha, bamane benqaba igazi. Lokhu kungase kufaniswe ngandlela-thile nokwenqaba komKatolika ozinikele ukukhipha isisu kodwa engazenqabi zonke izindlela zokuhlinza.
“Amalungu ekomiti yokubonisana aqeqeshelwe ukusingatha imibuzo eminingi evamile ephakanyiswa izibhedlela nodokotela, ngezinye izikhathi ephakanyiswa ngisho nangoFakazi imbala. Lokhu kungase kuhlanganise izinto ezinjengokwamukela ama-immunoglobulin noma i-albumin, ukusetshenziswa kwe-cryoprecipitate noma izindlela zokwelapha ezinjengokuhlanjululwa kwegazi, ukujikeleza kwegazi ngaphandle komzimba, i-cell saver, noma i-hemodialysis.
“Kwangihlaba umxhwele ukuxoxa ngezinyathelo ezingokomthetho ezihilelekile ekuqondeni nasekusebenziseni umthetho ekuvikeleni oFakazi nezinkolelo zabo ezingokwenkolo. Izahlulelo eziyisisekelo sokuvikela amalungelo oFakazi okuzinqumela indlela yokwelashwa ziyindaba ethakazelisayo. Kwabanye, umsebenzi weKomiti Yokubonisana Nezibhedlela ungase ubonakale uyisicefe, futhi ungadingekile; kodwa eqinisweni, ziyadingeka lezizinkonzo zokusekela okubanzi. Nsuku zonke ngibona iziguli ezingoFakazi ezingajwayelene nenqubo yasesibhedlela futhi mhlawumbe ezingazazi izindlela eziningi zokwelapha ngaphandle kwegazi. Ngaphezu kwalokho, bambalwa abangajwayelana ngempela nodokotela abaningi ababambisanayo abaziwa yilekomiti noma abangajwayelana namalungelo athile angokomthetho nezinkinga ngabanye esinazo nesibhekana nazo ekufuneni ukwelashwa ngaphandle kwegazi.
“Ake ngithi ukuphuma kulendaba okwesikhashana ukuze ngihalalisele imizamo ye-HIS. Njengodokotela wezifo zenhliziyo, ngithola ukuthi anginaso isikhathi sokufunda inqwaba yezincwadi eziphathelene ngokuqondile nomsebenzi wami, lingasaphathwa izinga lokujula kokwelapha ngaphandle kokuhlinza. Kungaba nzima ukuphenyisisa inqwaba yezincwadi zokwelapha ukuze ngithole lezozikhombo ezingase zikhombe amakhambi athile ezinkinga engibhekana nazo ekwelapheni iziguli zami ngaphandle kokusebenzisa igazi. Nalapha futhi iNhlangano iyangisiza ukuba ngicwaninge ngokufanele kuleyonqwaba yezihloko zamaphephabhuku.
“Ukuthuthukiswa ngokuqhubekayo kokwaziswa okuvela eBrooklyn kuyangisiza ukuze ngihlale nginolwazi lwamuva olungase luthinte umsebenzi wami. Lokhu kucacisa futhi kushukumise kakhulu kunanoma yikuphi ukubukezwa kwamaphephabhuku okwenziwa ngesimiso sama-computer engisijwayele. Yiqiniso, kufanele kube njalo, uma kucatshangelwa lokho okusengozini.”—NguDkt. Stephen E. Pope, udokotela wezifo zenhliziyo waseSan Francisco Bay, eCalifornia, e-U.S.A.
[Ibhokisi ekhasini 20]
• E-United States, odokotela abangaba ngu-18 000 bajabulela ukubambisana noFakazi BakaJehova ngokubelapha ngaphandle kwegazi. Emhlabeni wonke isibalo singu-50 000.
• E-United States, kunezikhungo zokwelapha ezingu-45 lapho kutholakala khona imithi yokwelapha nezimiso zokuhlinza ezingalisebenzisi igazi. Emhlabeni wonke isibalo singu-80.