Okuphawulwa Abafundi Balomagazini
Abazali Abasekelayo Nginibonga ngiyanconcoza ngochungechunge oluthi “Bazali—Sekelani!” (August 8, 1994) Muva nje, uthisha-nhloko wesikole indodakazi yami encane efunda kuso waxoxa neqembu labazali ngendaba yokukhulumisana okuhle phakathi komzali nothisha. Nganikeza uthisha-nhloko lomagazini, futhi wawufunda ngokushesha. Emasontweni amabili ngemva kwalokho indodakazi yami yangilethela incwajana yesikole ephuma nyanga zonke. Ingxenye yalesisihloko ekhuluma ngokukhulumisana okuhle yayinyatheliswe kabusha ukuze umphakathi wonke uzuze kulokhukwaziswa.
W. B., United States
Imikhomo-hlengethwa Ngasijabulela isihloko esithi “Umkhomo? Ihlengethwa?—Cha, Umkhomo-hlengethwa!” (February 22, 1994), esikhuluma ngesilwane esiyinhlanganisela yehlengethwa nomkhomo. Ekugcineni nithi lokhu ukuwathi “shazi amandla amangalisayo okuvela kwezinye izinhlobo zezinto uNkulunkulu awafake endalweni yakhe.” Ngaphikisana nalokhu ngoba ukukhwelana kwalezizilwane kwakungenakwenzeka endaweni yazo evamile.
K. G., United States
Sasingaqondile ukuthi ukukhwelana okunjalo kungokwemvelo noma ukuthi kubangelwa uNkulunkulu. Nakuba kunjalo, umuntu akanakunikezwa udumo ngokuba khona kwalesisilwane esikhangayo. Izilwane eziyinhlanganisela ziba khona ngenxa ‘yamandla okuvela kwezinye izinhlobo zezinto uNkulunkulu awafake endalweni yakhe.’ Ngakho isihloko sethu sanikeza uNkulunkulu udumo olumfanele.—ED.
Imidlalo Eyingozi Esihlokweni esithi “Intsha Iyabuza . . . Imidlalo Eyingozi—Ingabe Kufanele Ngiyizame?,” nenza kahle ngokuxwayisa intsha ngezingozi ezingabangelwa i-bungee jumping. (July 8, 1994) Esikhathini esingaphansi kwesonto ngisifundile, i-British Broadcasting Corporation yabika ukuthi abasha abane balimala ngokungathi sína emehlweni ngenxa ye-bungee jumping. Ngiyanibonga ngomagazini wenu omuhle kakhulu.
D. F., England
Isihloko esikhuluma ngemidlalo ebeka inselele yokufa sangishiya ngisangulukile! Ngake ngakhwela edwaleni elide futhi ngazithola ngingasakwazi ukuya emuva noma phambili. Ngisathuthumela namanje uma ngicabanga ngendlela engangisethunzini lokufa ngayo. Yeka ukuthi kwakuyoba ukulahlekelwa okuwubuwula kanjani!
L. T., United States
Ngasazisa kakhulu lesisihloko. Lapho ngihlala khona, izingane zihlanganyela kweminingi yalemidlalo eyingozi. Ngaso sonke isikhathi zizama ukuba nami ngiyidlale kanye nazo. Nokho, ezindabeni ngivame ukubona imibiko ngabantu abafayo noma abalimala kabi ngenxa yalemidlalo okuthiwa iyajabulisa abangitshela ngayo. Ngemva kokufunda lesisihloko, ngaqaphela ukuthi kwakuyoba ukungahlakaniphi ukufaka engozini ukuphila kwami, engakunikezwa uJehova uNkulunkulu, ngenxa nje yenjabulo yesikhashana.
J. S., United States
Ingculaza Ngakhonza njengomshumayeli wesikhathi esigcwele iminyaka engaphezu kwemithathu. Nokho, manje angisakwazi. Nginengculaza. Ngiyanibonga ngokusidingida ngokucacile lesisihloko esinzima esihlokweni esithi “Ukusiza Abanengculaza.” (March 22, 1994) Ngiyabona ukuthi nikhathalela izithakazelo zawo wonke umuntu. Nokho, kubonakala sengathi abaningi abaziqondanga izingxenye zalesisihloko ezazikhuthaza ukuzwela abanalesisifo futhi baye bagxila ‘ezinyathelweni ezifanelekile zokuphepha.’ Kusengathi lesisihloko sanikeza abanye imvume yokubashalazela. Ngiyazibuza ukuthi kazi kuyokwenzekani lapho sengibangwa nezibi futhi sengiludinga ngempela uthando nokusekela kwabafowethu. Ingabe abanye bayokwenqaba ukungivakashela ngoba besaba ukuthola leligciwane?
M. N., United States
Siyakwazisa lokhukukhulumela okuqotho. Kwakungeyona inhloso yethu ukukhuthaza ukungazisekeli izisulu zengculaza. Yiqiniso, sathi: “Ngokombono wamanje okuvunyelwana ngawo, ukuhlangana nje okuvamile akuyidluliseli ingculaza. . . . Umuntu akudingekile esabe ngokungadingekile ukuba phakathi kwabantu abanengculaza.” Izinyathelo zokuphepha ezasikiselwa zingasiza abanye ukuba bazizwe belondekile ngandlela-thile njengoba besebenzelana ngozwela nezisulu zengculaza.—ED.