Isikhumulo Sezindiza “Ikanku”—Siyabonakala Kodwa Asinamsindo

NGUMLOBELI WE-PHAPHAMA! EJAPANE

LAPHO usondela eKansai International Airport ngendiza, uzobona isiqhingi esinegama eliwuphawu elibhalwe ngesiNgisi elithi “Kansai.”a Lesi siqhingi saseJapane sisebangeni elingamakhilomitha amahlanu ukusuka ogwini lweTheku lase-Osaka. Ubona nje isikhumulo sezindiza nezakhiwo ezihlobene naso kuphela. Eqinisweni, lesi siqhingi senzelwe ukusetshenziswa njengesikhumulo sezindiza. Njengoba savulwa ngo-September 1994, lesi sikhumulo sezindiza sibizwa ngesifekethiso esithi Kanku, okuyisifushaniso segama laso lesiJapane elithi, Kansai Kokusai Kuko.

Ibhuloho lezithuthi ezihamba ngesivinini esikhulu, elingamakhilomitha angu-3,75 ubude, lixhumanisa isiqhingi esiyisikhumulo sezindiza nezwe, lenze sifinyeleleke ngomgwaqo nangojantshi. Lesi siqhingi senziwe saba nezinto zezikhumulo zemikhumbi nezinkonzo zokuwelisa. Kodwa kungani kwakhiwa isiqhingi esisha esiphelele ngenxa yesikhumulo sezindiza?

Isikhumulo Sezindiza Esingenamsindo

Inani elandayo lezihambeli ezibuka amazwe nezivakashi eziza endaweni yaseKansai libangele ukwanda kwenani lezindiza ezidumayo endaweni yokuhlala ezungeze i-Osaka International Airport. Ukuze kusizwe abantu abahlala lapho kulesi sicefe somsindo, kwamiswa umthetho wewashi kusukela ngo-9:00 ebusuku ukuya ku-7:00 ekuseni. Kusukela ngo-1974 ayikho imvume eye yanikezwa yokunezela izindiza ezengeziwe zamazwe. Ngakho, kwaba nesidingo esiphuthumayo sesikhumulo sezindiza esasizonakekela abagibeli abengeziwe nempahla esingazwakali emphakathini.

Ukwakha isikhumulo sezindiza esasingase sisetshenziswe ubusuku nemini ngaphandle kokubangela isicefe—kwakuyinselele enkulu kulabo ababehileleke kulomsebenzi. Okuwukuphela kwekhambi elavela kwakuwukwakha isiqhingi kude kakhulu nendawo ehlala abantu bese senziwa isikhumulo sezindiza. Umsebenzi omkhulukazi ngempela!

Uhulumeni wesizwe nohulumeni bezindawo bekanye nosomabhizinisi bendawo basekela ngokwezimali lomsebenzi obiza izigidi eziyizinkulungwane ezingu-55 zamaRandi, bamisa inkampani ezimele ukuba yakhe futhi inakekele ukusebenza kwalesi sikhumulo sezindiza esisha. UMnu. Keisuke Kimura, iphini likamongameli wesigungu seKansai International Airport Company, watshela i-Phaphama!: “Njengoba siyinkampani ezimele, sasingenakukwazi ukuchitha isikhathi esiningi ekwakheni isiqhingi. Umsebenzi kwakumelwe wenziwe ngokushesha.”

“Ukwakha Isiqhingi”

Ukuletha inhlabathi ngasogwini kunzima, kodwa ukwakha isiqhingi ebangeni elingamakhilomitha amahlanu ukusuka ogwini kunzima nakakhulu. Ukuze kwakhiwe isiqhingi esiyisikhumulo sezindiza esingamahekthare angu-511, kwasetshenziswa isihlabathi nenhlabathi engama-cubic meter angu-180 000 000 eyayizofakwa ngaphansi. “Lokho kulingana nemibhoshongo ecijile engu-73—ngiqonde ukuthi emikhulukazi eyenziwa iNkosi uKhufu,” kuchaza uMnu. Kimura.

Esiqwini solwandle, ekujuleni okulinganiselwa emamitheni angu-18, kunongqimba lobumba oluthambile olwaluzomuncwa amanzi. “Izinqwaba eziyisigidi zesihlabathi, ezingamasentimitha angu-40 ububanzi, zaziwulukuhlelwa kulolo bumba ukuze kumuncwe amanzi akulo futhi ziqinise isisekelo. Ngenxa yesisindo salesi sihlabathi, amanzi amunceka kulolu ngqimba lwenhlabathi oluthambile olungamamitha angu-20, lwancipha lwaba ngamamitha angu-14,” kuchaza uMnu. Kenichiro Minami, owayengamele umsebenzi wokufakwa kwesihlabathi. “Esasikwesaba kakhulu kwakuwukungalingani kwenhlabathi yangaphansi. Sasebenzisa ama-computer ekubaleni ngokuqondile ukuthi ingafakwa kuphi inhlabathi ukuze kulingane phansi.”

Sekukonke, ukujula kwenhlabathi efakiwe kwafinyelela amamitha angu-33, okungalingana nesakhiwo esinezitezi eziyishumi. Nokho, ngaphansi kwesisindo salenhlabathi, isiqu solwandle siye sazika futhi siyaqhubeka sizika. Kulinganiselwa ukuthi isiqu solwandle sisazozika elinye imitha nengxenye eminyakeni engu-50, senze isiqhingi sisale singamamitha amane phezu kolwandle.

Ngo-1991, ngisho nangaphambi kokuba isiqhingi sakhiwe sonke, kwaqalwa umsebenzi wesakhiwo okugitshelelwa kuso nesakhiwo esiwumbhoshongo sokuqondisa izindiza. Ngemva kweminyaka engaphezu kwengu-7 yokusebenza kanzima, ukwakhiwa kwesiqhingi, isikhumulo sezindiza, nezakhiwo ezihlobene naso kwaqedwa.

Sikhulu Kodwa Izinto Zitholakala Eduze

Abagibeli abafikayo bathola ukumangala okujabulisayo. “Ngesikhathi sifika endaweni yokuthatha imithwalo, izikhwama zethu zazilapho,” kusho isihambi sase-United States. Yini ebangela ukuhamba kwezinto okushelelayo? “Isakhiwo okugitshelelwa kuso sikhulu kodwa izinto zitholakala eduze,” kusho uMnu. Kazuhito Arao, ophethe isakhiwo okugitshelelwa kuso. “Abagibeli akudingeki badlule emaphaseji adidayo, avame ezikhumulweni zezindiza zamazwe.”

Indlela esakheke ngayo isakhiwo okugitshelelwa kuso ilula kodwa iyingqayizivele. Isakhiwo esiyinhloko senziwe ngendlela yokuba abagibeli bangahambahambi ngokungadingekile. Abazogibela izindiza ezihamba ngaphakathi, lapho bephuma esiteshini sesitimela bangaqonda ngqó endaweni yokuhlola amathikithi bese bengena esangweni lokuyogibela ngaphandle kokwehla benyuka nezitebhisi.

Kusukela esakhiweni esiyinhloko, lapho kunezindawo zokuhlola amathikithi, amahhovisi ezifiki, nendawo yezintela, kunezakhiwo okungathi yizimpiko ezingamamitha angu-700 ezibheke enyakatho naseningizimu, eziholela emasangweni okugibela angu-33. Abagibeli abasebenzisa amasango akude nesakhiwo esiyinhloko bangahamba ngesimiso sezokuthutha esizihambelayo, esibizwa ngokuthi i-Wing Shuttle. Ziyisa abagibeli emasangweni abawafunayo phakathi nemizuzu emihlanu—sekuhlangene nesikhathi esichithwe kulindwe isithuthi.

Isikhumulo Sezindiza Esingase Sibonwe

“Njengoba lesi sikhumulo sezindiza sisolwandle ngokuphelele, asisithwe yilutho,” kusho uMnu. Arao. “Yebo, siyezwa ukuthi abashayeli bezindiza bathi siyisikhumulo sezindiza okulula ukwehlela kuso,” kuvuma uMnu. Kimura.

Abanye bancoma nendlela esibukeka ngayo. Ukuklanywa okunobuhlakani kwesakhiwo okugitshelelwa kuso esimise okwezimpiko zendiza kuye kwahehela eKanku izihambeli eziningi ezibuka amazwe. Zithanda nokubuka izindiza lapho zisuka nalapho zihlala kulesi sikhumulo sezindiza esingavamile esiyisiqhingi. “Kuye kwadingeka sakhele izihambeli ezivakashela lesi sikhumulo sezindiza indawo yokubuka engaphezu kwesikhungo sokunakekelwa kwalendawo, nakuba sasingahlosile ukwenza kanjalo ekuqaleni,” kusho uMnu. Kimura. Abantu abalinganiselwa ku-30 000 ngosuku bavakashela lesi sikhumulo sezindiza ukuze babuke nje indawo.

Uma uvakashela eJapane eduze nendawo yaseKansai, kungani ungangeni noma uphume eKanku ngendiza—isikhumulo sezindiza esingase sibonwe kodwa esingenakuzwiwa omakhelwane baso.

[Imibhalo yaphansi]

[Umthombo Wesithombe ekhasini 25]

Kansai International Airport Co., Ltd.