Isifiso Sokuthandwa

Kudala edolobheni elalisezweni namuhla okuthiwa iTurkey, kwakukhona intombazane okuthiwa uLeya. ULeya kwakungumuntu nje, kodwa udadewabo omncane, uRaheli, emuhle.

URAHELI wahlangana nomuntu owamthanda kangangokuba wavuma ukusebenzela uyise iminyaka engu-7 ukuze ashade naye. Nokho, ngobusuku bomshado, uyise walezi zintombi ngobuqili wamnikeza uLeya esikhundleni sikadadewabo. Asazi ukuthi uLeya wazizwa kanjani ngobuqili bukayise, kodwa kungenzeka wayazi ukuthi lokhu kwakungeyona indlela enhle yokungenela umshado.

Lapho ekuthola lokhu, umkhwenyana wakhononda. Ubaba wachaza ukuthi kwakuyisiko ukushadisa indodakazi endala kuqala. Ngakho, uLeya wazithola eseshade ngobuqili nomuntu owayethanda udadewabo omncane. Yeka indlela okufanele ukuba uLeya wayezizwa ngayo lapho ebona udadewabo ethandwa kakhulu kunaye! ULeya wayengenakulandisa lutho ngokweshelwa kwakhe, futhi wayenezinkumbulo ezimbalwa ezijabulisayo ngomshado wakhe, uma zikhona. Yeka ukuthi kufanele ukuba wayekufisa kanjani ukuthandwa njengoRaheli! Ngakho-ke, ngenxa yezimo ezingaphezu kwamandla akhe, uLeya kungenzeka ukuthi wayevame ukuzizwa engathandwa futhi engafunwa.a

Ngokwezinga elithile, abaningi namuhla bangazwelana noLeya. Sonke sinesidingo esijulile sokuthanda nokuthandwa. Mhlawumbe silangazelela umngane womshado ozosithanda. Sifuna nothando lwabazali bethu, lwezingane zethu, lwabafowethu nodadewethu, kanye nolwabangane bethu. NjengoLeya, singase sibone abanye abajabulela uthando thina esingalutholi.

Kusukela ebuntwaneni sizwa izindaba zothando zabantu abahle abathandanayo bese behlala ngenjabulo ukuphila kwabo konke. Abaculi bacula ngothando; izimbongi ziyalubabaza. Nokho, umcwaningi othile wabhala lokhu ngale ndaba: “Akukho senzo namsebenzi oqalwa ngesifiso nangethemba elikhulu kangaka, bese kuba nokudumala kaningi, njengothando.” Ngempela, ngokuvamile kuba ubuhlobo obuseduze nabathile obuba yinkathazo enkulu kithi—busilethele ubuhlungu esikhundleni senjabulo ehlala njalo. Emazweni amaningi, amaphesenti angu-40 ayo yonke imishado manje aphela ngesehlukaniso, kanti imibhangqwana eminingi engahlukanisi ayijabuli nhlobo.

Emazweni amaningi baye banda abazali abangabodwa nemikhaya engabambisene, lapho nabantwana beba yizisulu. Kodwa, abantwana badinga ukulondeka okungokomzwelo, komkhaya ofudumele nonothando. Khona-ke, kwenzekeni othandweni? Singaphendukelaphi ukuze sifunde ngale mfanelo eyigugu? Izihloko ezilandelayo zizohlaziya le mibuzo.

[Umbhalo waphansi]