Ukubuka Okwezwe

◼ Izingane zaseBrazil ezingamaphesenti angu-60 zithi ziqambe ziba neminyaka emithathu zibe sezinamazinyo abolile. Esinye sezizathu ukuthi ngemva kokunceliswa amabhodlela ebusuku, avame ukuba neziphuzo ezinoshukela, akusetshenziswa izinto zokuxubha amazinyo eziphumelelayo.—I-FOLHA ONLINE, EBRAZIL.

◼ Manje omama abayingxenye eyodwa kwezine bathola izingane ngokuhlinzwa e-United States. ENew York City, leli nani liye landa ngokuphindwe kahlanu kunelango-1980. Esinye isizathu ukuthi kulula ukungena ohlwini lwabazobeletha ngokuhlinzwa, kodwa izingozi zokuhlinzwa ngale ndlela ngokungadingekile “zinkulu kakhulu.”—I-NEW YORK TIMES, E-U.S.A.

◼ Kule minyaka eyikhulu edlule, izinga lokushisa eMexico City liye lakhuphuka cishe ngo-4° C., uma liqhathaniswa no-0,6° C. emhlabeni wonke. Izazi zithi lokhu kubangelwa ukugawulwa kwamahlathi nokwakhiwa kwamadolobha.—I-UNIVERSAL, EMEXICO.

◼ Imibhangqwana eshadayo engaphezu kwesigamu e-United States isihlala ndawonye kakade. Le mibhangqwana cishe inamathuba aphindwe kabili okuhlukanisa kunaleyo eqale ishade ngaphambi kokuba ihlale ndawonye.—I-PSYCHOLOGY TODAY, E-U.S.A.

Imikhuba Yokusebenza Ecikayo

I-Washington Post iyabika: “Imikhuba yokusebenza ecika kunayo yonke yozakwethu umsindo wezingxoxo ocingweni, [ukusetshenziswa] kwezingcingo ezinezikhulisa-zwi nokukhonona njalo ngomsebenzi omningi.” Phakathi kweminye imikhuba ethukuthelisa ezinye izisebenzi kukhona “ukuba namaqembu phakathi kwezisebenzi, ukufika sekwephuzile emsebenzini, ukukhuluma komuntu yedwa, ukukhuluma nezinye izisebenzi ezingalé kwezindonga ezihlukanisa amahhovisi, ukungahlanzeki kanye nokuxhafuza.” Le mikhuba emibi ikhinyabeza nomkhiqizo wezisebenzi. Kodwa abaningi balabo okwaxoxwa nabo njengoba kwenziwa lolu cwaningo bavuma ukuthi abakaze baxoxe nalabo ababacasulayo ngalokhu. Leli phephandaba lithi: “Kuyaqondakala lokho. Kungenzeka ukuthi nazo lezi zisebenzi ezikhononayo azimsulwa.”

Kunabantu Abaningi Abahlala Emadolobheni

I-CBC News ithi: “Ingxenye yabo bonke abantu abakhona emhlabeni izobe ihlala emadolobheni eminyakeni emibili ezayo.” Ngokombiko weZizwe Ezihlangene, i-United States inenani eliphakeme kunawo wonke labantu abahlala emadolobheni, cishe abantu abangu-9 kwabayishumi bahlala emadolobheni. Eminyakeni engu-55 nje edlule, iNew York neTokyo kwakuwukuphela kwamadolobha ayenezakhamuzi eziyizigidi eziyishumi noma ngaphezulu. Namuhla lelo nani liye landa, futhi sekunamadolobha angu-20 anezakhamuzi ezingaphezu kwezigidi eziyishumi, kuhlanganise neJakarta, iMexico City, iMumbai neSão Paulo. UKofi Annan, unobhala-jikelele we-UN, uthi: “Lokhu kwanda okungalawuleki kuyodinga ukuba amazwe amaningi enze izinguquko ezinkulu kwezomnotho nakwezenhlalo.”

Ukwenqaba Inkonzo Yezempi Ngenxa Kanembeza

I-National Human Rights Committee of the Republic of Korea ithi ukwenqaba inkonzo yezempi ngenxa kanembeza kuyilungelo umuntu angenakuphucwa lona. Le komiti yatusa ukuba leli lungelo liqashelwe ngokusungulwa kwenkonzo yomphakathi esikhundleni senkonzo yezempi. I-Korea Times ithi lokhu kutusa “kuphikisana” nesinqumo samuva seNkantolo Yomthetho-sisekelo esisekela umthetho okhona manje wezempi, ongakuvumeli ukuba abantu benqabe ngenxa kanembeza. INkantolo Ephakeme ithé isishaya-mthetho, hhayi izinkantolo, okufanele sigunyaze lo mthetho. Minyaka yonke, kuboshwa izinsizwa ezingoFakazi BakaJehova ezingu-500 kuya ku-700 eRepublic of Korea ngenxa yokwenqaba ukungenela inkonzo yezempi. Kule minyaka edlule, kuye kwaboshwa oFakazi abangaba ngu-10 000 ngenxa yalesi sizathu.