Isifundo 16

Ingxoxo Eyakhayo

1, 2. Yini efanele iphawule ingxoxo yethu na?

¹ Engxoxweni yethu yansuku zonke sinikelwa ithuba lokudumisa uNkulunkulu. “Sizincoma ngoNkulunkulu usuku lonke; igama lakho siyalibonga kuze kube-phakade,” kwaloba umhubi weBhayibheli. Ingabe leso akusona yini isimo esitusekayo ngabo bonke abakhulekeli bakaNkulunkulu na? Siwubufakazi bokuzimisela ukusebenzisa izindebe zomuntu ngokuvumelana nentando kaJehova.—IHu. 44:8.

² Ukuzimisela okunjalo kubalulekile, ngokuba ngenxa yokungapheleli okuzuzwe ngefa kungahle kube-nokuthambekela ukusho lokho okungahle kudabukise abanye kunokuba kubakhe. (Jak. 3:8-12) Yeka indlela okuhle ngayo-ke, ukuba sikhumbule njalo isikhuthazo soMbhalo sokukhuluma lokho oku‘lungele ukwakha njengokuswelekileyo, ukuze kubavezele umusa abezwayo.’—Ef. 4:29.

3, 4. Yini ehilelekile engxoxweni ngaphandle kokukhuluma, futhi singazijwayeza yona kuphi na?

³ Phela, kufanele kukhunjulwe ukuthi ingxoxo ihilela nokulalela, ngokuba ingxoxo iwukwenanana kwemicabango. Khuluma lokho okwakhayo, kepha nikela nabanye ithuba lokukhuluma. Zijwayeze ikhono lokubuza imibuzo efanele, edonsa lowo okhulumayo. Bese ubonisa isithakazelo soqobo kulokho anokukusho, kunokusebenzisa isikhathi akhuluma ngaso ukuceba lokho oyokusho ngokulandelayo. Ukubonisa kwakho isithakazelo esinjalo emicabangweni yabanye kuyobakha.

⁴ Maningi amathuba engxoxo eyakhayo. Ngokwesibonelo, lapho usekhaya nomkhaya; lapho ukanye nosebenza nabo noma ofunda nabo; nalapho uhlanganyela nalabo okholwa kanye nabo. Eziningi izinkulumo zethu esikolweni senkonzo zisinikeza amathuba okuthuthukisa ikhono lengxoxo.

5-7. Nikela okunye ukusikisela kokuthuthukisa ingxoxo yomkhaya, ikakhulu ngezikhathi zokudla.

⁵ Ekhaya. Ingxoxo ekhaya inganikela kakhulu enjabulweni yomkhaya, njalo ifanele umzamo odingekile ukuthuthukiswa. Kokubili amadoda nabafazi bayajabula lapho abaganene nabo bebonisa isithakazelo soqobo kulokho abakushoyo. Nabantwana bayazisa lapho abazali babo belalela lokho abakushoyo futhi bebonisa ukubakhathalela ngempela. Kepha uma uphazamisa noma uma uphenya umagazini lapho omunye ekhuluma nawe, noma ngenye indlela ethile ubonisa ukungabi-nasithakazelo, ingxoxo ekhaya lakho iyokonakala masinyane. Akakho ngempela ojabulela ukuxoxa nomuntu ongakuthakazeleli lokho anokukusho.

⁶ Izikhathi zokudla zinikela elihle ithuba ngengxoxo yomkhaya eyakhayo. Kokunye ukudla kolunye nolunye usuku okunye kwengxoxo kungaba-nomongo etekisini leBhayibheli lwalolosuku njengoba lifunyanwa encwajaneni ethi Ukuhlola ImiBhalo Nsuku Zonke. Kokunye ukudla, izihloko ezifundwe kwezisand’ ukuphuma ezikhishwayo zeNqabayokulinda noma iPhaphama! zingaveza ingxoxo ethakazelisayo nenosizo. Kepha musa nanini ukuhlanganisa ingxoxo yasekudleni ngesu kangangoba kungabi-bikho-ndawo yenkulumo ezenzekelayo nokujatshulelwa kokudla ngokuphumula.

⁷ Ngokwemvelo elinye nelinye ilunga lomkhaya linganikela engxoxweni eyakhayo ngesikhathi sokudla. Lesi akusona isikhathi sokubeka izikhalo; leyonto enjalo ingaphazamisa ukugayeka. Kepha ngokuhamba kosuku umuntu uzwa izinto ezifundisayo noma mhlawumbe ezihlekisayo. Angahle ahlangane nokujabulisayo enkonzweni yasensimini. Mhlawumbe ufunda okuthile okuthakazelisayo kuphephandaba noma ukuzwa emsakazweni. Kungani ungakukhumbuli ukukuhlanganyela nawo wonke umkhaya ngesikhathi sokudla na? Kungakabi-yisikhathi eside, esikhundleni sokudla ngokushesha nangokuphaphatheka, uyofumana ukuthi nonke nilangazelela lezizikhathi zokuxoxa ndawonye.

8-10. Kungani izingxoxo zomuntu uqobo phakathi kwabazali nabantwana zibalulekile, futhi zingakhuthazwa kanjani ngabazali na?

⁸ Ngabazali, kubalulekile nokuba-nezingxoxo zomuntu uqobo nomunye nomunye wabantwana babo, kude nawo wonke umkhaya. Imiphumela emihle iyavela lapho kwenziwa ngomoya wokuphumula, ekhaya noma lapho kwehliswa isitaladi ngezinyawo. Izingxoxo ezinjalo zilungiselela ithuba lokulungiselela omusha izinguquko zomzimba ayakuzizwa emzimbeni wakhe njengoba ekhula. Futhi lezizingxoxo zikhanyisa okusenhliziyweni yomusha, lokho okuyizifiso zakhe ngempela nemigomo yakhe ekuphileni, futhi zinikela ithuba lokwakha lokhu ngendlela enosizo.

⁹ Uma, phakathi nokuqhubeka kwengxoxo enjalo, umntanakho usho ubunzima azihilele kubo, ukumthethisa masinyane ngokunokwenzeka kuyoyiphelisa ingxoxo khona lapho. Futhi, ekhumbula ahlangene nakho ngesikhathi esedlule, abengenakuzisho futhi lezizindaba. Ngokuvamile kuhle kakhulu ukulalela nokuhlola ngemibuzo ebonisa isimo sokuqonda ngakuwe. Ngakho-ke ngomusa kepha ngokuqina ungasiza ukulungisa izindlela zakhe lapho eduke khona ezimisweni zeBhayibheli.

¹⁰ Nakuba ingxoxo ibalulekile ekuphileni okujabulisayo komkhaya, lokhu akusho ukuthi umuntu udinga ukukhuluma ngaso sonke isikhathi. Eqinisweni, kuhle ngezinye izikhathi ukuba-nethuba lokucabanga wedwa, ukuzindla ngezindaba ngokuthula. Njalo izikhathi zokuthula ziyaziswa kaningi ngamalunga omkhaya.

11, 12. Yimaphi amathuba akhona okufakaza, ngaphandle kwenkonzo yasensimini evamile na?

¹¹ Ukwenza amathuba okufakaza. Ikhono lokuxoxa ngokwemvelo liyithinta kanjani inkonzo yomuntu na? Hayi-ke, uke wazibuza yini ukuthi kungani abanye oFakazi ngaso sonke isikhathi sengathi banokuhle abahlangene nakho na? Bekungenzeke yini ukuthi kungokuba baqalisa ingxoxo na? Isaga seBhayibheli sithi: “Izindebe zabahlakaniphileyo ziyasakaza ukwazi.”—IzAga 15:7

¹² Ngisho nangaphandle kwevamile inkonzo yasensimini, kukhona amathuba amaningi okungenisa abantu engxoxweni nokukhuluma nabo ngoJehova. Amakhosikazi emizi obuKristu, ngokwesibonelo, angafakaza komakhelwane noma kubathengeli abangahle baphambukele ekhaya. Abantwana bangahle babenamathuba okungenisa abafunda nabo engxoxweni ngeBhayibheli lapho beya esikolweni noma phakathi namakilasi. Nalabo abasebenza ngaphandle kwasekhaya bangahle bakwazi ukufakaza ezindaweni zabo zomsebenzi, mhlawumbe ngesikhathi sokudla kwasemini. Nalapho uhamba ngezinyawo epaki, umi odwendweni esitolo noma ulindele ibhasi kunokwenzeka ukungenisa abanye engxoxweni eyakhayo. Kwamanye amazwe, lapho kukhona khona ukwenqatshelwa kokushumayela uMbuso, inkonzo iqhutshwa ikakhulu ngezingxoxo ezingengasimiso. Ukuthi lendlela yokushumayela iyaphumelela kubonakala ngokukhula okusheshayo enanini lezinceku zikaNkulunkulu weqiniso elibonwa kaningi kulezozindawo.

13-16. Yiziphi izindlela ezingasetshenziswa ukuqhubezela ingxoxo evula indlela yokufakaza na?

¹³ Ukusebenzisa izimo ezahlukahlukene ukunikeza ubufakazi, singahle sidinge nje izwi uku“vul’indlela ngomvulamlomo” njengoba kushiwo, nokwenanana kwengxoxo kuyoqhubeka. UJesu wabeka isibonelo kulokhu. Ngenye imini bebade wema emthonjeni eSamariya ukuphumula wacela amanzi okuphuza kowesifazane owayezokukha amanzi lapho. Njengoba ngokuvamile abaJuda babengakhulumisani namaSamariya, lokhu kwammangaza owesifazane. Wabuza umbuzo. UJesu waphendula ngokubeka amazwana ngokuba-kwakhe namanzi ayenganikeza ukuphila okuphakade, kummangaza ngokuqhubekayo. Ngenxa yalokho, ithuba lanikezwa lokufakaza kuye. Qaphela ukuthi uJesu akazange aqale ngokufakaza okude; wasebenzisa ingxoxo enobuhlobo ukulungiselela indlela.—Joh. 4:5-42.

¹⁴ Nawe ungaziqalisa ezinjalo izingxoxo ezakhayo. Lapho usalindele ibhasi ungahle ukwazi ukukhanga omunye ngendatshana yephephandaba noma yomagazini ephethe inkinga ethile enjengokungcoliseka komoya noma impi, futhi ubuze: “Ucabanga ukuthi kungani lezizimo zibe-zimbi kangaka eminyakeni esand’ukudlula na? Ucabanga ukuthi siyoze sifike isikhathi lapho wonke umhlaba uyokuba-yindawo ejabulisayo yokuhlala na?” Futhi kufunyanwe kuphumelela ukuqalisa ukuxoxa ngenkinga ethile esand’ukwenzeka yakuleyondawo, bese ubuza: “Ucabanga ukuthi liyini ikhambi na?” Lokhu ngokwemvelo kuholela engxoxweni yekhambi leqiniso—umbuso kaNkulunkulu. Phela, ubuhlakani bufanele busetshenziswe. Akukho-ndingeko yokuphoqelela ingxoxo lapho abantu bengaphenduli. Kepha uyofumana ukuthi abanye balalela ngenjabulo, ngisho njengoba kwenza owesifazane waseSamariya emthonjeni.

¹⁵ Enye indlela yokwenza amathuba okuxoxa ngeZwi likaNkulunkulu wukubeka izincwadi zeBhayibheli lapho zingabonwa kalula khona. Lapho lokhu kwenziwa ekhaya, izivakashi kaningi zibeka amazwana ngazo, zivula indlela yokufakaza okuhle. Uma ufunda esikolweni sasobala, incwadi noma umagazini oshiywe phezu kwedeski lakho cishe uqinisekile ukushukumisa omunye ukubuza, “Yini leyo na?” Ngakho-ke unethuba lokumtshela, unikeza ubufakazi. Noma uma ufunda izincwadi zeBhayibheli ngesikhathi sakho sokudla kwasemini noma lapho uhamba ngokokuthutha abantu, lokhu kungavula indlela yokuxoxa nabantu abanosikisiki lokwazi ngombuso kaNkulunkulu.

¹⁶ Izingxoxo nabajwayelene nawe zingaholela ngokwemvelo nazo engxoxweni yamaqiniso eBhayibheli. Izingxoxo ezinjalo ngokuvamile zihilela lokho abantu abakwenzile—lapho baya khona, lokho abakubona noma abakuzwa—noma izinto abaceba ukuzenza. Njalo lapho unethuba lokukhuluma, kungani ungakhulumi ngalokho obukwenza na? Ngemuva kokuba-khona emhlanganweni wesifunda, yisho kosebenza naye noma kumakhelwane ukuthi ubukuphi nesihloko senkulumo yeningi; angahle abuze imibuzo ngayo. Beka amazwana kwabanye ngalokho okufunda kuNqabayokulinda noma iPhaphama! njengoba nabo bexoxa ngalokho abakwenzayo. Uma uthole ingqondo evumayo, bayocela indaba engaphezulu. Manje usunethuba lokunikeza ubufakazi obuqhubekayo. Izingxoxo ezinjalo ezicetshelwe ukukhomba ezinjongweni zikaNkulunkulu ziyakha ngempela.

17-20. Sikisela izihloko zengxoxo eyakhayo lapho ninoFakazi abakanye nawe.

¹⁷ Lapho ninokholwa kanye nabo. Lapho uhlangene nabafowethu nodade abangokomoya, futhi, kuhle nje ukuthi ingxoxo ibe-sendaweni ephakeme, leyo efanele izikhonzi zezindaba ezilungileyo. Injongo yayo akufanele nje kube-wukuzilibazisa, kepha ukwakha.

¹⁸ Amathuba amahle engxoxo eyakhayo anikezwa ngaphambi nangemuva kwemihlangano eHolweni loMbuso. Musa ukukwenza injwayelo ukuphaphazela ngemuva kokuphela kwemihlangano. Kungani ungaxoxi nabazalwane abadala kakhulu, abanolwazi, kanye nalabo abangahle bakhophoze nabathambekele ukuba-yizinkomo ezidla zodwa na? Kuningi okungaxoxwa ngakho. Xoxa ngamaphuzu athakazelisa kakhulu kwezisand’ ukuphuma zeNqabayokulinda. Ubungahle uxoxe ngesabelo esizayo Esikolweni Senkonzo esingokwaseZulwini. Abanye bangahle babenemiqondo emisha ongayisebenzisa enkulumweni yakho, noma mhlawumbe ungasikisela imiqondo yokusiza othile ngesabelo sakhe. Okuhlangenwe nakho ensimini kungahlanganyelwa, noma ubungahle ukhulume ngengxenye ethile ejatshulelwe kakhulu emhlanganweni ngalolosuku. Izingxoxo ezinjalo ziyakha ngempela.

¹⁹ Emihlanganweni emikhulu kakhulu kukhona amathuba okuxoxa nabafowethu nodade abavela ezindaweni ezahlukene. Abaningi oFakazi bayazimisela ukuqalisa izingxoxo lapho befolela ukudla noma lapho beya nalapho bevela emabaleni omhlangano. Enye indlela enhle yokukwenza lokhu wukutshela umfowethu noma udade igama lakho, bese ubuza elakhe. Buza indlela aba-nguFakazi ngayo. Lokhu ngokuvamile kuholela engxoxweni ejabulisayo, eyakhayo.

²⁰ Endleleni uyohlanganyela enkonzweni yasensimini kulungiselelwa elinye ithuba lengxoxo enosizo. Esikhundleni sokungenela ingxoxo engasho-lutho, kungani ungaxoxi ngendlela yokusondela kubanini-zindlu kuleyondawo ethile, noma izihloko abebengahle bathambekele kakhulu ukuxoxa ngazo. Kuhle nokuxoxa ngendlela yokuphatha amazwi okuphikisa angahle aphakanyiswe. Kuqabula kakhulu futhi kufanele ukucabanga nokuxoxa ngezindaba ezingokomoya ngezikhathi ezinjalo.—Fil. 4:8, 9.

21-24. Uma ingxoxo yeqembu ipheza ukubangeyakhayo, yini esingayenza luqobo ngayo na?

²¹ Uma nganoma yisiphi isikhathi useqenjini labafowethu nodade lapho ingxoxo ibangengasho-lutho noma engakhi kakhulu, yini ongayenza na? Kungani ungazami ukuphakamisa umbuzo wokuqondisa ingxoxo ezindleleni ezinosizo ngaphezulu na? Phakamisa indaba eqondene-ngqo futhi ubuze imibuzo ngayo. Ingxoxo enjalo inosizo ikakhulu uma labo abahlanganyelayo belibala isikhashana endabeni eyodwa, benikeza omunye nomunye umhlanganyeli ithuba lokwenza inkulumo ethile.

²² Uma ingxoxo ihilela ukuxoxa ngamanye amalunga ebandla lobuKristu, kunendingeko yokuqaphela ukuthi ingabi-ngengahloniphiyo nesolayo, kunokwakha. Uma omunye engaqala ukukhuluma ngamaphutha omunye, ingabe uyokuba-nesibindi sokuphindisela ingxoxo endaweni eyakhayo na? Ingabe uyokwethembeka enhlanganweni kaJehova futhi uvikela elinye lamalunga ayo na? Ungahle uthi, yindaba encane. Kepha ayiyincane kangako lapho kukhunjulwa ukuthi ukusola enye yezinceku zikaNkulunkulu ezinikezele kungahle kuholele ekusoleni amalungiselelo akhe uNkulunkulu!—Jak. 5:9; 2 Kor. 10:5.

²³ Ngezinye izikhathi ingxoxo ingahle ithathe isimo esiludlana, nezehlakalo ezihlekisayo zingahle zilandwe. Ingxoxo enjalo ingaphumuza futhi ibe-nanosizo. Kepha ukunakekela kudinga ukusetshenziswa ukuthi ingonakali ibe-yinkulumo engazifanele izikhonzi zobuKristu. Iseluleko seBhayibheli sifanele sikhunjulwe: “Ubufebe, nakho konke ukungcola, noma isangabe, makungaphathwa nangegama phakathi kwenu, nj’engokuba kufanele abangcwele, nehlazo, nokubheda, nokulawula, okuyizinto ezingafanele, kepha kunalokho makube-ngukubonga.”—Ef. 5:3, 4.

²⁴ Njalo, njengezikhonzi zikaJehova, ingxoxo yethu ngazo zonke izikhathi mayidumise Yena. Ngokwenza lokhu siyobe-sisebenzisa neseluleko esihle esilotshwe ngumphostoli uPawulu: “Yilowo nalowo kithi makathokozise umakhelwane, kube-kuhle, aze akheke.”—Roma 15:2.