Isahluko 3
Ingabe Izinkolo Zezwe Zihola Ngendlela Okuyiyo?
“INKOLO iye yaba ngelinye lamabutho anamandla kakhulu emlandweni,”28 kuphawula iThe World Book Encyclopedia. Kodwa ingabe izinkolo zezwe ziye zaba ngamandla angempela okuthula nokulondeka? Ziye zabafundisa yini abalandeli bazo ukuthi uthando lobuzalwane kumelwe lube ngaphezu kwemingcele yobuzwe nokwehlukana ngezinhlanga? Futhi, ingabe amasonto eLobukholwa, amaKatolika, namaProthestani, nawobuOrthodox, aye akubonakalisa kuyiqiniso ukusho kwawo ukuthi alandela uJesu Kristu ‘njengeNkosi Yokuthula’? Noma ingabe eqinisweni aye aba nengxenye enzondweni efaka ikusasa lomuntu engozini? Ukubheka umlando walokhu kuzonikeza impendulo emangalisayo.
2 Ngokuqondene nalokhu, iParade Magazine yathi: “Umlando ufundisa izifundo kulabo abazimisele ukufunda. Esinye sezifundo eziyinhloko siwukuthi izimpi zokungezwani okungokwenkolo nokwamahlelo cishe njalo zingezimbi kakhulu, zihlala isikhathi futhi kunzima kakhulu ukuzixazulula.”29 Futhi njengoba iChicago Tribune yaphawula: “Yileyo naleyonkolo enkulu ishumayela ukuthula nobuzalwane nomusa, kodwa okunye kokucindezela okunonya nokungenakubekezelelwa kakhulu emlandweni kuye kwenziwa ngegama likaNkulunkulu.”30 Ecabanga ngamaqiniso anjalo angokomlando, umhleli wephephandaba uC. L. Sulzberger ubuza ngokufanelekile: “Nakuba lendaba ingase ingathandeki, akumelwe yini kuqashelwe ukuthi ngaphandle kwezinye izimbangela—ukunqotshwa kweminye imibuso, ubuzwe, izimpi—inkolo iye yaba usongo olukhulu ngokuphikelelayo ekuphileni kwesintu?”31
3 Yebo, umlando ungcoliswe igazi lezimpi ezisekelwe ngokwenkolo. Ekhulwini lethu nje, phakathi nezimpi ezimbili zezwe nangemva kwazo, siye sabona umkhuba odabukisayo wamakholwa andawonye ebulalana wodwa—umKatolika ebulala umKatolika, umProthestani ebulala umProthestani, umMuslim ebulala umMuslim, nezinye. Futhi abefundisi ngakwezinye izinhlangothi, nakuba bengabenkolo efanayo, babusisa amabutho ngokushesha ayezobe ebulala abafowabo ngokwenkolo.
4 Amasonto eLobukholwa aphakathi kwasoleka kakhulu kulendaba. Ngani? Ngoba athi amelele uNkulunkulu weBhayibheli neNdodana yakhe uJesu Kristu, owathi: “Ngalokho bonke bayakukwazi ukuthi ningabafundi bami, uma nithandana.” (Johane 13:35) Kodwa ukubulalana okungaphezu kwakho konke kuye kwenzeka khona kanye enkabeni yeLobukholwa. Njengoba umhleli weWaterloo Courier yaseIowa asho: “AmaKristu futhi awakaze anengwe ukulwa namanye amaKristu. Ukuba kwakunjalo, eziningi zezimpi ezimbi kakhulu eYurophu zazingeke zibe khona. . . . IMpi Yezwe I neyesi-II, ezaqopha umlando ongakaze ube khona wamaKristu ebulala amaKristu, zazingeke zibe khona.”32
5 Kulendaba, iBhayibheli lisobala: Labo abakhonza uNkulunkulu batshelwa ukuba ‘bafune ukuthula, bakujonge,’ ukuba ‘bakhande izinkemba zabo zibe ngamakhuba,’ nokuba ‘bangabe besafunda ukulwa.’ (1 Petru 3:11; Isaya 2:2-4) “Sithandane, kungabi-njengoKayini owaba-ngowomubi [uSathane uDeveli], wabulala umfowabo.” (1 Johane 3:10-12) Kodwa abalandeli bezinkolo zalelizwe bayaqhubeka bebulala abafowabo, njengoba kwenza uKayini, futhi abefundisi babo baye basekela labo abalandela leyonkambo. Ngakho-ke, uma ungowenkolo ethile, zibuze: ‘Ukuba bonke abantu emhlabeni babengabenkolo yami, ingabe izimpi zaziyophela futhi lomhlaba manje ngabe uyindawo yokuthula kwangempela?’
6 Isimo sokwehlukana nesokulwa kwezinkolo zomhlaba sibonisa ukuthi uNkulunkulu akayena umsekeli wazo. Lokhu kungase kubamangalise labo abacabanga ukuthi zonke izinkolo kumelwe zibe ngezilungile ngoba zithi zimelele uNkulunkulu. Nokho iBhayibheli libonisa ngokusobala ukuthi “uNkulunkulu kasiye owesiyaluyalu kepha ngowokuthula.” (1 Korinte 14:33) Liyabonisa futhi ukuthi kukhona kokubili inkolo yeqiniso nenkolo yamanga. Liyaphawula futhi ukuthi ukukhulekela okusekelwe eqinisweni kuphela, nokungenakho ukuzenzisa, okusekelwa uNkulunkulu.—Mathewu 15:7-9; Johane 4:23, 24; Thithu 1:16.
7 Ngenxa yokuthi izinkolo zezwe ziye zaziphatha kabi ngenxa yezinzuzo zezombangazwe, ezentengiselwano, nezenhlalo, iBhayibheli lizifanisa nesifebe. Lichaza ‘lesifebe,’ lithi: ‘Kwafunyaniswa kuye igazi labo bonke ababebulewe emhlabeni.’ (IsAmbulo 17:1-6; 18:24) Yebo, izinkolo zalelizwe zinecala legazi elikhulu ngokuphathelene nakho konke ukubulawa kwabantu emlandweni womhlaba! Ziyolandisa ngenxa yalokhu.
8 Ngokusobala, noma iyiphi inkolo emikhuba yayo iphambene neBhayibheli ayinakulokotha iphumelele ekuholeleni isintu ekuthuleni kweqiniso nokulondeka. Kungakho uJesu athi ngabaholi benkolo yamanga bosuku lwakhe: “Bangabaholi abayizimpumputhe; kepha nxa impumputhe ihola impumputhe, ziyakuyela emgodini zombili.” (Mathewu 15:14) Ngokufanayo, izinkolo zezwe namuhla ‘zingabaholi abayizimpumputhe’ endabeni yempi nakwezinye izici zokuphila ezibalulekile ngokufanayo.
Ingabe Izinkolo Zezwe Zikhuthaza Ukuziphatha Okuhle?
9 Ukhona yini ongajabulela ukuthula kweqiniso nomakhelwane bakhe noma ukulondeka kwangempela uma izindinganiso zeqiniso zokuziphatha okuhle zingalondolozwa? Lapho izindinganiso ezinjalo zingekho, ukuqamba amanga, ukweba, ukuphinga, nemikhuba efanayo kuyavama. Ngakolunye uhlangothi, uthando lweqiniso ngomakhelwane kumelwe lukhuthaze ukuziphatha okuhle.
10 IBhayibheli liveza umbono kaNkulunkulu ngokuziphatha okuhle ngalendlela: “Othanda omunye uwugcwalisile umthetho. Ngokuba lokhu ukuthi: Ungaphingi, ungabulali, ungebi, ungafisi, noma ukhona omunye umyalelo, kuyahlanganiswa kulelizwi elithi: Wothanda umakhelwane wakho njengalokhu uzithanda wena. Uthando alwenzi okubi kumakhelwane.”—Roma 13:8-10.
11 Nokho, okubaluleke kakhulu kunalokhu, ingabe ukholelwa ukuthi umuntu angaba nokuthula noNkulunkulu, abe nesiqiniseko somusa waKhe nesivikelo, uma engenzi ngokwezindinganiso zikaNkulunkulu zokuziphatha okuhle? Ubungamlalela yini uNkulunkulu ongakufuni ukuziphatha okuhle okunjalo kulabo abathi bayamkhonza?
12 Ukuze uNkulunkulu afune ukuba kunanyathelwe ezindinganisweni zakhe, bekuyodingeka enze kukhanye ukuthi lezozindinganiso ziyini. Lokho uye wakwenza eZwini lakhe, iBhayibheli. (2 Thimothewu 3:16, 17) Ukuthi umuntu ngamunye kumelwe azenzele izindinganiso zakhe siqu zokuziphatha abese ephila ngazo kungokungenangqondo ngokufanayo nokuthi umuntu ngamunye makazenzele imithetho yakhe yomgwaqo abese ehamba ngayo. Uyazi ukuthi umphumela ubungaba yini. IBhayibheli ngokunengqondo libonisa ukuthi kunendlela eyodwa kuphela eletha ukuvunyelwa uNkulunkulu. Njengoba uJesu asho, zonke ezinye izindlela ziholela ekubhujisweni kuphela.—Mathewu 7:13, 14; Luka 13:24.
13 Ingabe ikakhulukazi amasonto eLobukholwa, ayazisekela izindinganiso zikaNkulunkulu zokuziphatha ngaleyondlela ebekela wonke umhlaba isibonelo? Ukuphila kwabaningi abangamalungu alawomasonto kwembulani? Ingabe uyilungu lesonto elithile? Khona-ke zibuze: ‘Ukuba wonke umuntu emhlabeni ubephila njengamalungu enkolo yami, ingabe lokho bekuyobuqeda ubugebengu, ukungathembeki kwezamabhizinisi, ukulwa, nokuziphatha okubi kobulili?’
14 IBhayibheli lixwayisa ngokuthi “imvubelo eyingcosana ibilisa inhlama yonke” nangokuthi “ukujwayelana nababi konakalisa ukuziphatha okuhle.” (Galathiya 5:9; 1 Korinte 15:33) Ngenxa yalesizathu liyala amaKristu futhi ngokuthi “ningahlangani nomuntu obizwa ngokuthi ungumzalwane, uma eyisifebe, noma engohahayo, noma engokhonza izithombe, noma eyisithuki, noma eyisidakwa, noma engumphangi; ningaze nadla nokudla nonjalo. . . . Xoshani omubi phakathi kwenu.”—1 Korinte 5:11-13.
15 Kuyiqiniso, umuntu angase awe abese evuka futhi. Kodwa kuthiwani ngalabo abazenza umkhuba izinto ezinjalo? Uma labantu bethi bakhonza uNkulunkulu, bangabazenzisi. Ngokuqinisekile uyabuzonda ubuzenzisi, futhi iBhayibheli libonisa ukuthi noNkulunkulu uyabuzonda kanye nalabo abangabazenzisi. (Mathewu 23:27, 28; Roma 12:9) Kuthiwani-ke ngenkolo yakho? Ingabe iyawulandela umyalo weBhayibheli othi “xoshani” labo abaphikelelayo ekweqeni imithetho kaNkulunkulu nabangabonisi ukuphenduka kweqiniso? Noma ingabe iyabavumela abanjalo ukuba bahlale besesimweni esihle, ngaleyondlela bonakalise abanye? Ingabe kuyona ukuziphatha okuhle kumane kuyinto nje ekhulunyelwayo kodwa eqinisweni ibe ishalazela ukwenza okubi, noma ikuvumele nokukuvumela?—Mathewu 15:7, 8.
16 Abefundisi abaningi ngokwandayo bathi ukuhlobonga, ukuphinga, nobungqingili akukhona okungalungile ngempela. Kodwa abahambisani nokucabanga kukaNkulunkulu. IZwi lakhe lisho ngokukhanyayo: “Ningadukiswa. Nazifebe, nabakhonza isithombe, naziphingi, nazihlobongi, nabesilisa abalalanayo, namasela, nabahahayo, nazidakwa, nazithuki, nabaphangi abayikulidla ifa lombuso kaNkulunkulu.”—1 Korinte 6:9, 10.
Imiphumela Yokwenqaba IZwi LikaNkulunkulu
17 Isizathu esiyisisekelo esenza izinkolo zalelizwe zibe sesimweni sokwehlukana kangaka, nesobuyaluyalu siwukuthi aziyinaki imithetho kaNkulunkulu njengoba itholakala eZwini lakhe, iBhayibheli. Yebo, abefundisi abaningi bayalenqaba iBhayibheli njengeliyiZwi likaNkulunkulu eliphefumlelwe. Nokho, umphostoli uPawulu ophefumlelwe wathi: “Yonke imibhalo iphefumulelwe nguNkulunkulu.” (2 Thimothewu 3:16) UPawulu futhi wasikhuthaza ukuba singalamukeli iBhayibheli “njengezwi labantu kepha njengezwi likaNkulunkulu, njengokuba liyilo isibili.” (1 Thesalonika 2:13) Ngokuqinisekile uJehova uNkulunkulu, uMdali wendawo yonke esabekayo onguMninimandla onke, wayengayiloba incwadi futhi aqikelele ukuba ilondoloze ubuqotho bayo phakathi namakhulu eminyaka!
18 Nokho, iNew Catholic Encyclopedia ithi: “Izinkulumo eziningi ezingokweBhayibheli azilona iqiniso uma zahlulelwa ngokolwazi lwanamuhla lwesayensi nolomlando.”39 Ebhala kuyiU.S. Catholic, umpristi othile wathi indalo yomhlaba yayingenakwenzeka ngendlela okuchazwe ngayo kuGenesise. Futhi ngokulandisa okulapho kokudalwa komuntu, wathi: “Isintu asizange siqale ngaleyondlela.”40 Umbhishobhi wase-Episcopal wathi: “IBhayibheli linamaphutha, ukungaqondi nokuziphikisa. Ngakho-ke kuyaqondakala ukuthi kungani amasonto amakhulu obuKristu engalibheki iBhayibheli njengelingenzi phutha.”41 ENgilandi, umbhishobhi waseAnglican wabhekisela ovukweni lukaKristu “njengesalamusi lamathambo.”42
19 Kanjalo-ke, abefundisi abaningi bayalilulaza iBhayibheli noma abafundisi abalandeli babo ukulihlonipha nokulandela imithetho kaNkulunkulu eliyiqukethe. Leso isizathu esiyinhloko sokungazi okukhulu ngeZwi likaNkulunkulu kulo lonke eLobukholwa. Umkhulumeli wezinkolo uM. J. McManus wabhala lokhu ngabantu abasontayo: “Ukuthambekela okumbalwa enkolweni kusongela ukululaza inkolo ehleliwe ngawo-1980 njengoba kwenza isimo esidabukisayo solwazi lweBhayibheli.” Waphawula ukuthi “iBhayibheli lisalokhu liyincwadi engafundwa, neyabezizwe” kwabaningi abasontayo.43
20 Iye yaba yini imiphumela yakho konke lokhu? Ingabe izinkolo zezwe ziye zabonisa ukuthi zingajivaza izimfundiso zeBhayibheli kodwa zikhiqize ukuthula noma ukuziphatha okuhle phakathi kwamalungu azo? Ngokuphambene, izimo ziya ziba zimbi emhlabeni wonke. Izizwe ezinezinkolo ezingebona ubuKristu ziye zaba izindawo zezinxushunxushu ezandayo, ukwehlukana, ukonakala kwezombangazwe, nokuziphatha okuwohlokayo. Kodwa ikakhulukazi eLobukholwa sekuyisikhathi eside lingelithinteka kakhulu ngokuqondene nobugebengu, ukuziphatha okubi, ukuluthwa imilaliso, ukubanga kwezinhlanga, nempi. Kuye kwenzeka njengoba nje iZwi likaNkulunkulu elithembekile labikezela: “Balilahlile izwi likaJehova, banokuhlakanipha kuni na?”—Jeremiya 8:9.
21 Ubufakazi bungobungenakuphikwa. Bubonisa ukuthi izinkolo zalelizwe aziwona amandla eqiniso okuthula nokulondeka. Futhi ziye zashiya abalandeli bazo bengazi lutho ngethemba leqiniso—uMbuso kaNkulunkulu. Khona-ke, konke lokhu kubonisani?
Ukuphela Kwezinkolo Zezwe Kuyasondela
22 UJesu Kristu wathi: “Yileso nalesosithombo esingatshalwanga nguBaba wasezulwini siyakusishulwa.” (Mathewu 15:13) Izithelo ezimbi eziye zakhiqizwa izinkolo zalelizwe zibonisa ukuthi azimiswanga nguNkulunkulu. Ngakho-ke, iBhayibheli libikezela ngokubhujiswa okuzayo kwazo zonke izimiso zokukhulekela kwamanga.
23 Ekhuluma ngalezimiso ezingokwenkolo ezifanekisa ‘neBabiloni Elikhulu’ elinjengesifebe, uNkulunkulu usho okulandelayo ngokuqondene nombuso wezwe wenkolo yamanga womhlaba wonke: “Izono zalo zifinyelele ezulwini, noNkulunkulu wakhumbula ukungalungi kwalo . . . kuyakufika ngalusuku lunye izinhlupheko zalo, ukufa, nokulila, nendlala, futhi liyakushiswa liqedwe ngomlilo; ngokuba iNkosi uNkulunkulu elahlulelayo inamandla.”—IsAmbulo 18:2, 5-8.
24 Phawula ukuthi lembubhiso izofika ngokuzuma okumangalisayo, njengokungathi “ngalusuku lunye.” Inkolo yamanga izobhujiswa, iqedwe, yizo kanye izizwe zezombangazwe ebifeba nazo isikhathi eside, kube ukumangala nokwethuka kubantu abaningi.—IsAmbulo 18:10-17, 21; 17:12, 16.
25 Ngakho-ke isimemezelo saphezulu ngesokuthi: “Phumani kulo, bantu bami, ukuze ningahlanganyeli nalo izono zalo, nokuba ningamukeli okwezinhlupho zalo.” (IsAmbulo 18:4) Ukuthatha isinyathelo esinjalo kusho ukuthi umuntu ubheka inkolo yamanga njengoba uNkulunkulu eyibheka. Kusho ukuthi umuntu uyayenyanya ngenxa yezithelo zayo ezibolile, ubuzenzisi bayo, nokukholelwa kwayo ezeni. Kumelwe kube nokunengeka ngenxa yendlela inkolo yamanga eye yamelela ngayo uNkulunkulu phambi kwesintu nangendlela eye yahlanganyela ngayo ekuhluphekeni nasekucindezelekeni kwabantu. (Roma 2:24; Jeremiya 23:21, 22) Uma ukuqaphela lokhu, uyoyeka noma ikuphi ukusekela obunakho ezinkolweni ezinjalo, ngaleyondlela ubonise ukusekela kwakho okugcwele isahlulelo sikaNkulunkulu kuzo.
26 Nokho, akwanele ukumane uyeke nje. Kumelwe ufune futhi uthole ukukhulekela kweqiniso, okungenabuzenzisi okuyokulethela ukuthula nesivikelo sikaNkulunkulu lapho imbubhiso ebikezelwe ifika. Labo abahlanganyela ekukhulekeleni kweqiniso okunjalo kumelwe kube ngabantu kakade ‘asebekhande izinkemba zabo zaba ngamakhuba, abangasafundi ukulwa.’ (Isaya 2:4) Kumelwe kube ngabantu abalikholelwayo iZwi likaNkulunkulu futhi baphile ngalo, balivumele libe ngamandla aqondisayo ekuphileni kwabo. (IHubo 119:105) Kumelwe babonise uthando loqobo, olungenabuzenzisi ngabanye abantu. (Johane 13:35; Roma 13:8) Ingabe kukhona ukukhulekela okunjalo namuhla? Izigidi ziye zakuthola phakathi koFakazi BakaJehova. Baziwa emhlabeni wonke ngokunamathela kwabo emithethweni kaNkulunkulu etholakala eBhayibhelini. Futhi ukuthula nokulondeka abakujabulelayo ngisho kwamanje kuphakamisa ukuba yiqiniso namandla kweZwi likaNkulunkulu.
27 OFakazi BakaJehova basikhathalela ngokujulile isimo esiyingozi inkolo yamanga eye yaletha abantu kuso. Bazama ngobuqotho ukunikeza iZwi likaNkulunkulu indawo yokuqala ekuphileni kwabo. Umenywa ukuba ubhekisise imihlangano yabo eHholo LoMbuso labo elisendaweni yakini futhi uzihlolele izinga ababonisa ngalo umoya kaNkulunkulu futhi bajabulele ukuthula nokulondeka okulethayo. Uyobona indlela abafunda futhi basebenzise ngayo lokho uNkulunkulu akufunayo kulabo abayosinda ekubhujisweni okuzayo futhi baphile oHlelweni Olusha lwakhe lokulunga ngaphansi kokubusa koMbuso wakhe wasezulwini.
[Imibuzo Yesifundo]
1. Imiphi imibuzo ebalulekile ngokuqondene nezinkolo zezwe ephakanyiswa lapha?
2. Imithombo ehlukahlukene isitshelani ngombhalo ongokomlando?
3. Imuphi umkhuba oyihlazo wenkolo umlando walelikhulu lethu lama-20 owembulayo?
4. (a) Kungani amasonto eLobukholwa engasoleka kakhulu? (b) Omunye umhleli uthini ngempi?
5. (a) IBhayibheli libatshelani ngokukhanyayo labo abakhonza uNkulunkulu ngeqiniso? (b) Imuphi umbuzo amalungu esonto okumelwe abhekane nawo ngokuqondene nesonto lawo?
6. Isimo sokwehlukana nesokulwa sezinkolo zezwe sibonisani?
7. (a) Iyiphi inkulumo esetshenziswa yiBhayibheli ekuchazeni izinkolo zezwe? (b) Iliphi icala ezibekwa lona?
8. Amazwi kaJesu ngokuqondene ‘nabaholi abayizimpumputhe’ asebenza kanjani namuhla?
9, 10. (a) Kungani ukubambelela ezindinganisweni zeqiniso zokuziphatha kubalulekile mayelana nokuthula nokulondeka? (b) Njengoba kufundisa iBhayibheli, yini ekhuthaza ukuziphatha okunjalo?
11, 12. (a) Umuntu ongabambeleli ezindinganisweni zokuziphatha okuhle angakulindela yini ukujabulela ukuthula noNkulunkulu? (b) Ubani obeka lezozindinganiso ngokufanelekile?
13-15. (a) Imiphi imibuzo mayelana nokuziphatha edinga ukubuzwa ngokuqondene namalungu esonto lakhe umuntu? (b) IBhayibheli lithi yini okumelwe yenziwe ngelungu lebandla eliphikelela liphula imithetho kaNkulunkulu? (c) Ingabe lokhu kuyenziwa emasontweni?
16. (a) Abefundisi abaningi bathini manje ngokuziphatha kobulili? (b) IBhayibheli lithini ngokuziphatha okunjalo?
17-19. (a) Umphostoli uPawulu wayelibheka kanjani iBhayibheli? (b) Abefundisi abaningi namuhla balibheka kanjani iBhayibheli?
20, 21. Iye yaba yini imiphumela yokwenqaba izimfundiso zeBhayibheli?
22, 23. IBhayibheli lithi yini eyokwehlela izinkolo zamanga zalelizwe?
24. Imbubhiso enjalo iyofika kanjani, futhi ivela kumuphi umthombo?
25. (a) KusAmbulo 18:4 abantu abafisa ukuvunyelwa uNkulunkulu bakhuthazwa ukuba benzeni? (b) Yini okumelwe ishukumisele umuntu ukuba athathe isinyathelo esinjalo?
26. (a) Ngokungaphezulu, yini umuntu okumelwe ayithole ukuze ajabulele ukuthula nesivikelo sikaNkulunkulu? (b) Luhlobo luni lwabantu okumelwe umuntu alufune uma efuna ukuthola labo abaqhuba ukukhulekela kweqiniso?
27. Yini oyokwazi ukuzibonela yona ngawakho ngokuba khona emihlanganweni yoFakazi BakaJehova eHholo LoMbuso labo?
[Ibhokisi ekhasini 29]
Abefundisi abaningi ngokwandayo bamukela lokho iBhayibheli elikulahla njengokuziphatha okubi kobulili, njengoba lezihloko eziyisibonelo neziqephu zezindaba zibonisa:
“Lapho Okubi Sekuba Kuhle Abefundisi Bayositshela.” “[ISonto laseNgilandi] manje selishiya isimo salo sesidala sokuzithoba emthethweni. Ubulili ngaphambi komshado, nomngane oyedwa noma ngaphezulu, . . . kusukela manje kuyocatshangelwa njengobamukelekayo ngokokuziphatha.”—Alberta Report.33
“Abefundisi Abasho Lutho Ngobulili Ngaphambi Komshado.” “Abefundisi baseMelika baye bathula ngokuyisono ekushumayeleni ngobulili ngaphambi komshado . . . Besaba ukuthi bangalahlekelwa ngamanye amalungu abo. UIsaya wayazi ngabapristi abanjalo. ESahlukweni 1 sencwadi yakhe, ucaphuna iNkosi ithi ngabo, ‘ngiyakufihla kini amehlo ami; yebo, lapho nenza imikhuleko eminingi, angiyikuzwa; izandla zenu zigcwele igazi.’”—Telegraph, North Platte, Nebraska.34
“Ukuphinga Kubhekwa Kangconywana.” “Umfundisi waseNgilandi . . . wabethusa abantu lapho eveza umbono weSonto ngaseMyalweni Wesikhombisa. . . . Wathi, ‘isimo sethu siwukuba ngabanakekelayo kunokuba ngabahluleli.’”—The Sunday Times, Perth, Australia.35
“Abangakholelwa KuZiqu-zintathu Bamukela Ukushadiswa Kongqingili.”—The New York Times.36
“Iqembu elimisiwe leUnited Church of Canada liye lasekela ukugcotshwa kongqingili njengabefundisi.”—The Toronto Star.37
“Vumelani Ubufebe Ngokomthetho—Yikhambi LoSanta.”—Uhlu lwesikhulu samaKatolika kuyiPhiladelphia Daily News.38
[Izithombe ekhasini 25]
Abefundisi baye bangcolisa izandla zabo ngegazi besekela omashiqela