Isahluko Seshumi
UMbuso “Ongasoze Wachithwa”
1. Izenzakalo zezwe ziye zagcizelela liphi iqiniso kuwo wonke umlando wesintu?
NSUKU ZONKE izenzakalo zezwe zigcizelela iqiniso lokuthi abantu abayitholanga injabulo ngokwala ubukhosi bukaJehova nokuzama ukuzibusa. Asikho isimiso sokubusa kwabantu esiye saletha izinzuzo ezilinganayo esintwini. Nakuba abantu beye bathuthuka kakhulu olwazini lwesayensi kunanini ngaphambili, abakwazanga ukunqoba ukugula noma ukuqeda ukufa, ngisho nakumuntu oyedwa. Ukubusa kwabantu akuyiqedanga impi, ubudlova, ubugebengu, ukukhohlakala noma ubumpofu. Emazweni amaningi abantu basabuswa yimibuso ecindezelayo. (UmShumayeli 8:9) Ubuchwepheshe, ukuhaha nokungazi kungcolisa izwe, amanzi nomoya. Ukusaphazwa komnotho yizikhulu kukwenza kube nzima kwabaningi ukuba bathole izidingo zokuphila. Izinkulungwane zeminyaka yokubusa komuntu zilenze laba sobala leli qiniso: “Indlela yomuntu ayikuye uqobo; akukuyo indoda ukuba ihambe, iqondise izinyathelo zayo.”—Jeremiya 10:23.
2. Yiliphi okuwukuphela kwekhambi lezinkinga zesintu?
2 Liyini ikhambi? UMbuso kaNkulunkulu, uJesu afundisa abalandeli bakhe ukuba bawuthandazele: “Umbuso wakho mawuze. Intando yakho mayenzeke nasemhlabeni, njengasezulwini.” (Mathewu 6:9, 10) Kweyesi-2 Petru 3:13, uMbuso kaNkulunkulu wasezulwini uchazwa ngokuthi “amazulu amasha,” azobusa ‘umhlaba omusha,’ okungukuthi, umphakathi wabantu olungile. UMbuso kaNkulunkulu wasezulwini ubaluleke kakhulu kangangokuthi uJesu wagxila kuwo lapho eshumayela. (Mathewu 4:17) Wabonisa indawo okufanele ube nayo ekuphileni kwethu, ekhuthaza: “Khona-ke, qhubekani nifuna kuqala umbuso nokulunga kwakhe.”—Mathewu 6:33.
3. Kungani kuphuthuma kakhulu ukufunda ngoMbuso kaNkulunkulu manje?
3 Kuyaphuthuma ukufunda ngoMbuso kaNkulunkulu manje, ngenxa yokuthi maduzane lowo Mbuso uzothatha isinyathelo sokukushintsha phakade ukubuswa kwalo mhlaba. UDaniyeli 2:44 uyabikezela: “Ezinsukwini zalawo makhosi [ohulumeni ababusa manje] uNkulunkulu wasezulwini uyakumisa umbuso [ezulwini] ongasoze wachithwa nobukhosi bawo bungayikushiyelwa kwabanye abantu [abantu abasoze baphinde babuse umhlaba], kepha uyakuchoboza, uqede yonke le mibuso [yamanje], wona uqobo ume phakade.” Ngakho ekupheleni kwalezi zinsuku zokugcina, lo Mbuso uyobhubhisa sonke lesi simiso sezinto esibi. Khona-ke, ukubuswa komhlaba uMbuso wasezulwini ngeke kusabekelwa inselele. Yeka indlela okufanele sijabule ngayo ngokuthi isisondele impumuzo lokhu okuyoyiletha!
4. Mayelana noMbuso, yini eyenzeka ezulwini ngo-1914, futhi kungani lokho kubalulekile kithi?
4 Ngo-1914, uKristu Jesu wamiswa njengeNkosi futhi wanikezwa igunya ‘lokubusa phakathi kwezitha zakhe.’ (IHubo 110:1, 2) Ngawo futhi lowo nyaka, kwaqala ‘izinsuku zokugcina’ zalesi simiso sezinto esibi samanje. (2 Thimothewu 3:1-5, 13) Ngesikhathi esifanayo, izenzakalo uDaniyeli ayezibone embonweni ongokwesiprofetho zenzeka ngokoqobo ezulwini. ‘Umdala wezinsuku,’ uJehova uNkulunkulu, wanika iNdodana yomuntu, uJesu Kristu, “ukubusa, nobukhosi, nombuso, ukuze bonke abantu, nezizwe, nezilimi bayikhonze.” Ebika ngalo mbono, uDaniyeli wabhala: “Ukubusa kwayo kungukubusa okuphakade okungayikudlula, nombuso wayo yiwo ongayikuchithwa.” (Daniyeli 7:13, 14) UNkulunkulu uyosebenzisa lo Mbuso wasezulwini osezandleni zikaKristu Jesu ukuze avulele abathandi bokulunga ithuba lokujabulela insada yezinto ezinhle ayezihlosile lapho ebeka abazali bethu bokuqala abangabantu ePharadesi.
5. Yimiphi imininingwane yoMbuso esiyithakazelela kakhulu, futhi ngani?
5 Ingabe uyafisa ukuba yisikhonzi esiqotho salo Mbuso? Uma kunjalo, uyokuthakazelela kakhulu ukwazi indlela owakheke ngayo nosebenza ngayo lo hulumeni wasezulwini. Uyothanda ukwazi ukuthi wenzani manje, yini oyoyifeza esikhathini esizayo, nokuthi yini oyidingayo kuwe. Njengoba uhlolisisa lo Mbuso, uyowazisa nakakhulu. Uma ukwamukela ukubusa kwawo, uyokuhlomela kangcono ukutshela abanye izinto ezimangalisayo uMbuso kaNkulunkulu oyozenzela isintu esilalelayo.—IHubo 48:12, 13.
Ababusi BoMbuso KaNkulunkulu
6. (a) UMbuso KaMesiya uwukubonakaliswa kobukhosi bukabani, futhi imiBhalo ikubonisa kanjani lokhu? (b) Esikufundayo ngoMbuso kufanele kusithinte kanjani?
6 Zisuka amadaka, lokho kuhlolisisa kwembula ukuthi lo Mbuso KaMesiya uwukubonakaliswa kobukhosi bukaJehova. NguJehova owanika iNdodana yakhe “ukubusa, nobukhosi, nombuso.” Ngemva kokuba iNdodana kaNkulunkulu isigunyazwe ukuba iqale ukubusa njengeNkosi, amazwi ezulwini amemezela ngokufanele ukuthi: “Umbuso wezwe ngempela uye waba umbuso weNkosi yethu [uJehova uNkulunkulu] nokaKristu wayo, futhi [uJehova uyobusa] njengenkosi kuze kube phakade naphakade.” (IsAmbulo 11:15) Ngakho, konke esikubonayo ngalo Mbuso nalokho okufezayo kungasisondeza kuJehova uqobo. Esikufundayo kufanele kugxilise kithi isifiso sokuzithoba phakade ebukhosini bakhe.
7. Kungani kusithakazelisa ngokukhethekile ukuthi uJesu Kristu unguMbusi oyiPhini likaJehova?
7 Cabangela neqiniso lokuthi uJehova ubeke uJesu Kristu esihlalweni sobukhosi njengoMbusi oyiPhini lakhe. NjengeNgcweti uNkulunkulu ayisebenzisa ekwenzeni umhlaba nabantu, uJesu wazi izidingo zethu kangcono kunathi. Ngaphezu kwalokho, kwasekuqaleni komlando wabantu, wabonisa ukuthi ‘intokozo yakhe yayikanye namadodana abantu.’ (IzAga 8:30, 31; Kolose 1:15-17) Ubathanda kakhulu abantu kangangokuba weza mathupha emhlabeni wanikela ngokuphila kwakhe njengesihlengo sethu. (Johane 3:16) Ngakho wasivulela indlela yokukhululwa esonweni nasekufeni nethuba lokuphila phakade.—Mathewu 20:28.
8. (a) Ngokungafani nokubusa kwabantu, kungani uhulumeni kaNkulunkulu uyohlala njalo? (b) ‘Isigqila esithembekile nesiqondayo’ sihlobana kanjani nohulumeni wasezulwini?
8 UMbuso kaNkulunkulu unguhulumeni ongantengantengi, oyohlala njalo. Okuwenza uhlale njalo yiqiniso lokuthi uJehova ngokwakhe akafi. (Habakuki 1:12, qhathanisa ne-NW.) Ngokungafani namakhosi angabantu, uJesu Kristu, uNkulunkulu amphathise ubukhosi, naye akafi. (Roma 6:9; 1 Thimothewu 6:15, 16) UKristu uyobusa ezulwini nabanye abangu-144 000, abayizinceku eziqotho zikaNkulunkulu ezivela “kuzo zonke izizwana nezilimi nabantu nezizwe.” Nabo banikwa ukungafi. (IsAmbulo 5:9, 10; 14:1-4; 1 Korinte 15:42-44, 53) Iningi labo selisezulwini kakade, kanti insali yabo esesemhlabeni ‘iyisigqila esithembekile nesiqondayo’ sosuku lwanamuhla, esiqhubekisela phambili ngokwethembeka izithakazelo zalowo Mbuso lapha emhlabeni.—Mathewu 24:45-47.
9, 10. (a) Yimaphi amathonya ahlukanisayo futhi onakalisayo ayosuswa uMbuso? (b) Uma singafuni ukuba yizitha zoMbuso kaNkulunkulu, yiziphi izinto okufanele sigweme ukuhileleka kuzo?
9 Maduze nje, ngesikhathi sakhe esimisiwe, uJehova uyothuma amabutho akhe esahlulelo ukuba ahlanze umhlaba. Ayobabhubhisa phakade labo bantu abenqaba ngamabomu ukuvuma ubukhosi bakhe nabeyisa amalungiselelo othando awenza ngoJesu Kristu. (2 Thesalonika 1:6-9) Lolo kuyoba usuku lukaJehova, isikhathi esekukade sisilindele sokulwelwa kwakhe njengoMbusi Wendawo Yonke. “Bheka, usuku lukaJehova luyeza, lunonya, lunokufutheka, lunokuvutha kolaka, . . . [ukuba] luchithe izoni zawo kuwo [umhlaba].” (Isaya 13:9) “Lolo suku lungusuku lolaka, usuku lokuhlupheka nolosizi, usuku lwencithakalo nolokuyize, usuku lobumnyama nolwesigayegaye, usuku lwamafu nolobumnyama obukhulu.”—Zefaniya 1:15.
10 Yonke inkolo yamanga nabo bonke ohulumeni babantu namabutho abo, abaye basetshenziswa umbusi waleli zwe omubi ongabonakali, bayobhujiswa phakade. Bonke abazihlanganisa naleli zwe ngokuphishekela indlela yokuphila enobugovu, engathembekile neyokuziphatha okubi bayocoboshiswa. USathane namademoni akhe bayosuswa bangabe besaxhumana nabakhileyo emhlabeni, bavalelwe iminyaka eyinkulungwane. UMbuso kaNkulunkulu uyobe usuphethe zonke izindaba zomhlaba. Yeka impumuzo lokho okuyoba yiyo kubo bonke abathanda ukulunga!—IsAmbulo 18:21, 24; 19:11-16, 19-21; 20:1, 2.
Indlela Imigomo YoMbuso Eyofinyelelwa Ngayo
11. (a) UMbuso KaMesiya uyoyifeza kanjani injongo kaJehova ngomhlaba? (b) UMbuso uyobalethelani abantu abaphila emhlabeni ngaleso sikhathi?
11 UMbuso KaMesiya uyoyigcwalisa ngokuphelele injongo kaNkulunkulu yokuqala ngomhlaba. (Genesise 1:28; 2:8, 9, 15) Isintu siye sahluleka ukusekela leyo njongo kuze kube namuhla. Nokho, “umhlaba owakhiwe ozayo” uyoba ngaphansi kweNdodana yomuntu, uJesu Kristu. Bonke abayosinda lapho uJehova ekhipha isahlulelo kulesi simiso esidala bayosebenza ngobunye ngaphansi kukaKristu iNkosi, bajabulele ukwenza noma yini abayala ukuba bayenze, ukuze umhlaba ube yipharadesi lembulunga yonke. (Heberu 2:5-9) Sonke isintu siyojabulela umsebenzi wezandla zaso futhi sizuze ngokugcwele enaleni yomkhiqizo womhlaba.—IHubo 72:1, 7, 8, 16-19; Isaya 65:21, 22.
12. Izikhonzi zoMbuso ziyopheleliswa kanjani engqondweni nasemzimbeni?
12 Lapho u-Adamu no-Eva bedalwa, babephelele, futhi injongo kaNkulunkulu yayiwukuba umhlaba ugcwaliswe yinzalo yabo, yonke ibe nezingqondo nemizimba ephelele. Leyo njongo iyogcwaliseka ngokumangalisayo ngaphansi kokubusa koMbuso. Lokhu kuyodinga ukuba kususwe yonke imiphumela yesono, futhi ukuze kufezeke, uKristu akakhonzi njengeNkosi nje kuphela kodwa futhi ungumPristi Ophakeme. Uyozisiza ngesineke izikhonzi zakhe ezilalelayo ukuze zizuze enanini elihlawulela izono lomhlatshelo wakhe wobuntu.
13. Ngaphansi kokubusa koMbuso, abantu bayozuza kanjani ngokomzimba?
13 Ngaphansi kokubusa koMbuso, abakhileyo emhlabeni bayozuza ngendlela emangalisayo ngokomzimba. “Khona amehlo ezimpumputhe ayakuvulwa, zivuleke nezindlebe zezithulu. Khona unyonga luyakutshekula njengendluzele, nolimi lwesimungulu luyakuhuba.” (Isaya 35:5, 6) Inyama emibimbibimbi ngenxa yokuguga noma izifo iyoba yintsha kuneyomntwana, namahlalakhona ayothathelwa indawo ubungqabavu. “Inyama yakhe ibe ntsha kuneyomntwana, abuyele emihleni yobusha bakhe.” (Jobe 33:25) Kuyofika isikhathi lapho kungekho noyedwa oyoba nesizathu sokuthi “Ngiyagula.” Ngani? Ngoba abantu abesaba uNkulunkulu bayobe bethulwe umthwalo wesono nemiphumela yaso ebuhlungu. (Isaya 33:24; Luka 13:11-13) Yebo, uNkulunkulu ‘uyosula zonke izinyembezi emehlweni abo, futhi ukufa ngeke kusaba khona, noma ukulila noma ukukhala noma ubuhlungu ngeke kusaba khona. Izinto zangaphambili zidlulile.’—IsAmbulo 21:4.
14. Kuhlanganisani ukufinyelela ukuphelela kobuntu?
14 Nokho, ukufinyelela ukuphelela kuhilela okungaphezu nje kokuba nomzimba nengqondo ephelele. Kuhlanganisa nokuzibonakalisa kahle izimfanelo zikaJehova, ngenxa yokuthi sadalwa ‘ngomfanekiso kaNkulunkulu, samfuza.’ (Genesise 1:26) Ukuze kufezeke lokho, kuyodingeka imfundo eningi. Ezweni elisha, “kuyohlala ukulunga.” Ngakho, njengoba u-Isaya abikezela, ‘abakhileyo bezwe bayofunda ukulunga.’ (2 Petru 3:13; Isaya 26:9) Le mfanelo yenza kube nokuthula—phakathi kwabantu bazo zonke izinhlanga, phakathi kwabangane, emkhayeni, futhi ngaphezu kwakho konke, phakathi kwabantu noNkulunkulu. (IHubo 85:10-13; Isaya 32:17) Labo abafunda ukulunga bayoqhubeka befundiswa ukuthi iyini intando kaNkulunkulu ngabo. Njengoba ukuthanda uJehova kuya kugxila ezinhliziyweni zabo, bayolandela izindlela zakhe kuzo zonke izici zokuphila kwabo. Bayokwazi ukusho njengoba kwasho uJesu, ‘ngaso sonke isikhathi ngenza izinto ezijabulisa uBaba.’ (Johane 8:29) Yeka ukuthi ukuphila kuyojabulisa kanjani lapho lokho kwenzeka kuso sonke isintu!
Izinto Esezifinyelelwe Kakade
15. Usebenzisa imibuzo ekulesi sigaba, qokomisa izinto ezifinyelelwe uMbuso futhi ubonise okumelwe ngabe siyakwenza manje.
15 Izinto eziphawulekayo esezifinyelelwe uMbuso kaNkulunkulu nezikhonzi zawo zisobala. Imibuzo nemibhalo elandelayo kuzokukhumbuza ezinye zalezi zinto esezifinyelelwe, kanye nezinto zonke izikhonzi zoMbuso ezingazenza futhi okumelwe ngabe ziyazenza manje.
UMbuso wamelana nobani kuqala, kwaba namuphi umphumela? (IsAmbulo 12:7-10, 12)
Ukuqoqwa kwamalungu asele aliphi iqembu okuye kwagxilwa kukho selokhu uKristu abekwa esihlalweni sobukhosi? (IsAmbulo 14:1-3)
Yimuphi umsebenzi uJesu abikezela ukuthi wayeyowenza ngemva kokugqashuka kosizi olukhulu, njengoba kulotshwe kuMathewu 25:31-33?
Yimuphi umsebenzi oyisandulela songenhla owenziwa namuhla? Wenziwa obani? (IHubo 110:3; Mathewu 24:14; IsAmbulo 14:6, 7)
Kungani abaphikisi bezombangazwe nabezenkolo beye bahluleka ukuvimbela umsebenzi wokushumayela? (Zakariya 4:6; IzEnzo 5:38, 39)
Yiziphi izinguquko eziye zaba khona ekuphileni kwalabo abazithoba ekubuseni koMbuso? (Isaya 2:4; 1 Korinte 6:9-11)
UMbuso Weminyaka Eyinkulungwane
16. (a) UKristu uyobusa isikhathi eside kangakanani? (b) Yiziphi izinto ezimangalisayo eziyokwenziwa phakathi naleso sikhathi nangemva kwaso?
16 Ngemva kokujikijelwa kukaSathane namademoni akhe kwalasha, uJesu Kristu nezindlalifa ezikanye naye ezingu-144 000 bayobusa njengamakhosi nabapristi iminyaka eyinkulungwane. (IsAmbulo 20:6) Phakathi naleyo nkathi, isintu siyopheleliswa, kususwe phakade isono nokufa okwabangelwa ngu-Adamu. Ekupheleni kokuBusa Kweminyaka Eyinkulungwane, lapho uJesu esephumelele ukufeza isabelo sakhe njengomPristi neNkosi enguMesiya, ‘unikela umbuso’ kuYise, “ukuze uNkulunkulu abe yikho konke kuwo wonke umuntu.” (1 Korinte 15:24-28) Kulelo qophelo, uSathane uyokhululwa okwesikhashana avivinye isintu esihlengiwe ukuthi siyabusekela yini ubukhosi bukaJehova bendawo yonke. Lapho uvivinyo lokugcina seluphelile, uJehova uyobhubhisa uSathane nezihlubuki eziyoba ngakuSathane. (IsAmbulo 20:7-10) Labo abasekele ubukhosi bukaJehova—ilungelo lakhe lokubusa—bayobe bebubonise ngokuphelele ubuqotho babo obungenakuzanyazanyiswa. Bayobe sebeba nobuhlobo obufanele noJehova, abamukele njengamadodana namadodakazi, avunyelwe ngokwaphezulu ukuba athole ukuphila okuphakade.—Roma 8:21.
17. (a) Yini eyokwenzeka eMbusweni ekupheleni kweminyaka eyinkulungwane? (b) Kushiwo ngamuphi umqondo ngempela ukuthi uMbuso ‘awusoze wachithwa’?
17 Ngakho-ke, indima efezwa nguJesu nabangu-144 000 ngokuphathelene nomhlaba iyoshintsha. Uyoba yini umsebenzi wabo esikhathini sangemva kwalokho? IBhayibheli alisho. Kodwa uma sibusekela ngokwethembeka ubukhosi bukaJehova, siyobe siphila ekupheleni kokuBusa Kweminyaka Eyinkulungwane ukuze sibone lokho uJehova akuhlosile ngabo nangendawo yakhe yonke ebabazekayo. Noma kunjalo, ukubusa kukaKristu iminyaka eyinkulungwane kuyoba “okuphakade,” noMbuso wakhe ‘awuyikuchithwa.’ (Daniyeli 7:14) Ngamuphi umqondo? Okokuqala ngenxa yokuthi igunya lokubusa ngeke lidlulele kwabanye abanezinhloso ezihlukile, ngoba nguJehova oyobe enguMbusi. Futhi, uMbuso ‘awusoze wachithwa’ ngenxa yokuthi lokho okufezile kuyohlala phakade. (Daniyeli 2:44) UmPristi oyiNkosi enguMesiya namakhosi angabapristi akanye nawo bayodunyiswa phakade ngenxa yenkonzo yabo yokwethembeka kuJehova.
Ingxoxo Yokubukeza
• Kungani uMbuso kaNkulunkulu uwukuphela kwekhambi lezinkinga zesintu? INkosi yoMbuso kaNkulunkulu yaqala nini ukubusa?
• Yini oyithanda ngokukhethekile ngoMbuso kaNkulunkulu nalokho oyokufeza?
• Yiziphi izinto ezifinyelelwe uMbuso esizibonayo kakade, futhi thina sinayiphi ingxenye kuzo?
[Isithombe ekhasini 92, 93]
Ngaphansi koMbuso kaNkulunkulu, bonke abantu bayofunda ukulunga