Isahluko 25

Ngingawunqoba Kanjani Umkhuba Wokushaya Indlwabu?

“Ngaqala ukushaya indlwabu ngineminyaka engu-8 ubudala. Ngokuhamba kwesikhathi ngafunda umbono kaNkulunkulu mayelana nale ndaba. Ngangizizwa kabi njalo lapho ngiwela kulo mkhuba. Ngangizibuza: ‘UNkulunkulu angamthanda kanjani umuntu onjengami?’”—ULuiz.

LAPHO ufinyelela esikhathini sokuthomba, izinkanuko zobulili zingaba namandla ngokukhethekile. Ngakho ungase uwele emkhubeni wokushaya indlwabu.a Abaningi bangathi akuyona into enkulu. Bathi, “Akekho olimalayo.” Nokho, kunesizathu esihle sokugwema lo mkhuba. Umphostoli uPawulu wabhala: “Ngakho-ke, bulalani amalungu emizimba yenu . . . ngokuqondene . . . [nesifiso] sobulili.” (Kolose 3:5) Ukushaya indlwabu akusibulali isifiso sobulili kodwa kuyasikhulisa. Ngaphezu kwalokho, cabanga ngalokhu okulandelayo:

● Ukushaya indlwabu kugxilisa izimo zengqondo zobugovu. Ngokwesibonelo, lapho umuntu eshaya indlwabu, usuke egxile emizweni yomzimba wakhe siqu.

● Ukushaya indlwabu kwenza umuntu abheke abobulili obuhlukile njengezinto zobulili noma amathuluzi okuzanelisa.

● Ukucabanga kobugovu okugxile emkhubeni wokushaya indlwabu kungenza kube nzima ukwanelisa ubuhlobo bobulili emshadweni.

Kunokuba uzinikele ekushayeni indlwabu ukuze unciphise izifiso zobulili ezivaleleke ngaphakathi, lwela ukuhlakulela ukuzithiba. (1 Thesalonika 4:4, 5) Ukuze likusize wenze lokho, iBhayibheli litusa ukuba ugweme izinto ezingakuvusela inkanuko yobulili kwasekuqaleni. (IzAga 5:8, 9) Noma kunjalo, kuthiwani uma usuyisigqila somkhuba wokushaya indlwabu? Mhlawumbe uzamile ukuwuyeka kodwa wehluleka. Kungalula ukuphetha ngokuthi ngeke ushintshe, nokuthi ngeke ukwazi ukuphila ngezindinganiso zikaNkulunkulu. Yileyo ndlela umfana okuthiwa uPedro ayezibheka ngayo. Uthi, “Lapho ngiphinde ngiwenza lo mkhuba, ngangizizwa kabi. Ngangicabanga ukuthi ngeke ngithethelelwe ngalokho engangikwenzile. Ngangikuthola kunzima ukuthandaza.”

Uma uzizwa kanje, yima isibindi. Usengasizakala. Intsha eningi—kanye nabantu abadala—bawunqobile umkhuba wokushaya indlwabu. Nawe ungawunqoba!

Ukubhekana Nomuzwa Wecala

Njengoba sekushiwo, labo abaye bawela emkhubeni wokushaya indlwabu ngokuvamile bahlushwa umuzwa wecala. Ngokungangabazeki, ‘ukudabuka ngendlela yokuhlonipha uNkulunkulu’ kungakwenza ufune ukunqoba lo mkhuba. (2 Korinte 7:11) Kodwa ukuzilahla ngecala ngokweqile kungakulimaza. Kungakwenza udumazeke kakhulu uze ufune ukudikila.—IzAga 24:10.

Ngakho lwela ukuba nombono ofanele ngale ndaba. Ukushaya indlwabu kuwuhlobo oluthile lokungcola. Kungakwenza ‘isigqila sezifiso nezinjabulo ezihlukahlukene’ futhi kukhuthaza imicabango emibi. (Thithu 3:3) Ngesikhathi esifanayo, ukushaya indlwabu akukhona ukuziphatha okubi okwedlulele, njengobufebe. (Jude 7) Uma unenkinga yokushaya indlwabu, akufanele uphethe ngokuthi sewenze isono esingenakuthethelelwa. Into ebalulekile ukulwa nesifiso sokwenza lo mkhuba futhi ungayeki ukulwa!

Kulula ukudangala ngemva kokushelela. Lapho ushelela, khumbula amazwi ezAga 24:16: “Olungile angawa ngisho nakasikhombisa, kodwa ngokuqinisekile uyovuka; kodwa ababi bayokwenziwa ukuba bakhutshwe yinhlekelele.” Ukushiyeka kwesikhashana akukwenzi ube umuntu omubi. Ngakho ungadikibali. Kunalokho, hlolisisa ukuthi yini ebangele ukuba uphinde ushaye indlwabu, bese uzama ukuyigwema leyo nto.

Zinike isikhathi sokuzindla ngothando nomusa kaNkulunkulu. Umhubi uDavide, naye owayenabo ubuthakathaka, wathi: “Njengoba ubaba ebonisa umusa emadodaneni akhe, kanjalo uJehova ubonisé umusa kulabo abamesabayo. Ngoba yena uyakwazi ukwakheka kwethu, ekhumbula ukuthi siluthuli.” (IHubo 103:13, 14) Yebo, uJehova uyakubona ukungapheleli kwethu futhi “ukulungele ukuthethelela.” (IHubo 86:5) Ngakolunye uhlangothi, ufuna senze umzamo wokuthuthuka. Ngakho iziphi izinyathelo ezisebenzayo ongazithatha ukuze unqobe lo mkhuba?

Hlaziya izinto ozijabulisa ngazo. Ingabe ubukela amabhayisikobho noma izinhlelo ze-TV noma ungena ezingosini ze-Internet ezivusa inkanuko? Umhubi wathandaza ngokuhlakanipha kuNkulunkulu: “Yenza ukuba amehlo ami adlule angakuboni okungenanzuzo.”b—IHubo 119:37.

Phoqa ingqondo yakho ukuba igxile kwezinye izinto. UmKristu ogama lakhe linguWilliam uyeluleka: “Ngaphambi kokuba ulale, funda okuthile okuhlangene nezinto ezingokomoya. Kubaluleke kakhulu ukuba umcabango wakho wokugcina wosuku ube ngokomoya.”—Filipi 4:8.

Xoxa nothile ngale nkinga. Amahloni angase akwenze kube nzima ukukhuluma nothile ngale ndaba. Kodwa ukwenza kanjalo kungakusiza ukuba unqobe lo mkhuba! Yilokho okwatholwa umKristu ogama lakhe nguDavid. Uthi, “Ngaxoxa nobaba ngasese. Ngeke neze ngikukhohlwe lokho akusho. Emomotheka ngendlela eqinisekisayo, wathi, ‘Ungenza ngiziqhenye kakhulu ngawe.’ Wayazi ukuthi kwakudingeke ngiqunge isibindi esingakanani ukuze ngikhulume naye. Akukho mazwi ayengangikhuthaza futhi angenze ngizimisele ngaphezu kwalawa.

“Ubaba wabe esengibonisa imiBhalo embalwa ukuze angisize ngibone ukuthi ‘ngangingalahlekile kakhulu,’ futhi wavula neminye ukuze aqiniseke ukuthi ngiyakuqonda ukungathí sina kwenkambo yami engalungile. Wathi angilwele ukungaweli kulo mkhuba kuze kube isikhathi esithile, khona-ke sasizoxoxa ngakho futhi. Wathi ngingakuvumeli ukushelela kungithene amandla, ngimane ngiqhubeke isikhathi esijana ngingayishayanga indlwabu.” Uphetha ngani uDavid? Uthi: “Ukuba nomuntu othile oyaziyo inkinga yami futhi engisiza kwakuyinzuzo enkulu kakhulu.”c

[Imibhalo yaphansi]

UMBHALO OYINHLOKO

“Balekela izifiso zobusha, kodwa phishekela ukulunga, ukholo, uthando, ukuthula, kanye nalabo ababiza iNkosi ngenhliziyo ehlanzekile.”—2 Thimothewu 2:22.

ICEBISO

Thandaza ngaphambi kokuba izifiso zibe namandla. Cela uJehova uNkulunkulu akunike “amandla angaphezu kwavamile” ukuze ubhekane nesilingo.—2 Korinte 4:7.

UBUWAZI . . . ?

Noma yimuphi umuntu obuthaka angazinikela ezifisweni zakhe zobulili. Kodwa kudinga indoda noma owesifazane wangempela ukubonisa ukuzithiba ngisho noma esekusithekeni.

ENGIZOKWENZA!

Ngingagcina ingqondo yami isezintweni ezimsulwa uma ngi- ․․․․․

Kunokuba ngizinikele enkanukweni, ngizo- ․․․․․

Engingathanda ukukubuza umzali wami (abazali) ngale ndaba ․․․․․

UCABANGANI?

● Kungani kubalulekile ukukhumbula ukuthi uJehova “ukulungele ukuthethelela”?—IHubo 86:5.

● Njengoba kunguNkulunkulu owadala imizwa yobulili, ethi futhi kufanele uhlakulele ukuzithiba, yiliphi ithemba analo ngawe?

[Amazwi acashunwe esihlokweni ekhasini 182]

“Njengoba sengiyinqobile le nkinga, ngingaqhubeka nginonembeza ohlanzekile phambi kukaJehova, futhi lokhu kuyinto engingenakuyenana ngalutho!’’—USarah

[Isithombe ekhasini 180]

Uma uwa lapho ugijima, akusho ukuthi kumelwe uyoqala phansi—ngokufanayo uma kwenzeka uphinde ushaya indlwabu, intuthuko osuyenzile ayesuleki